រាជធានីភ្នំពេញ ៖ មន្ត្រីអះអាងថា កម្ពុជាបានប្រែក្លាយវិបត្តិកូវីដ ១៩ ជាការកែទម្រង់សេដ្ឋកិច្ច និងបរិយាកាសវិនិយោគនៅកម្ពុជា ដើម្បីស្តារសេដ្ឋកិច្ច និងធ្វើឱ្យកំណើនសេដ្ឋកិច្ចប្រទេសកំពុងអភិវឌ្ឍន៍មួយនេះមាននិរន្តភាពទៅមុខបាន ។…
រាជធានីភ្នំពេញ ៖ មន្ត្រីអះអាងថា កម្ពុជាបានប្រែក្លាយវិបត្តិកូវីដ ១៩ ជាការកែទម្រង់សេដ្ឋកិច្ច និងបរិយាកាសវិនិយោគនៅកម្ពុជា ដើម្បីស្តារសេដ្ឋកិច្ច និងធ្វើឱ្យកំណើនសេដ្ឋកិច្ចប្រទេសកំពុងអភិវឌ្ឍន៍មួយនេះមាននិរន្តភាពទៅមុខបាន ។ ជាមួយក្តីរំពឹងពីកំណើនសេដ្ឋកិច្ចល្អចាប់ពីឆ្នាំ ២០២២ នេះទៅមន្ត្រីអះអាងថា វាអាស្រ័យលើការអនុវត្តគោលនយោបាយប្រកបដោយប្រសិទ្ធភាពផងដែរ ។
លោក វង្សី វិស្សុត រដ្ឋលេខាធិការប្រចាំការនៃក្រសួងសេដ្ឋកិច្ច និងហិរញ្ញវត្ថុ នៅក្នុងវេទិកាសាធារណៈស្តីពី «ការគ្រប់គ្រងម៉ាក្រូសេដ្ឋកិច្ច និងច្បាប់ថវិកា ឆ្នាំ ២០២២» រៀបចំដោយក្រសួងសេដ្ឋកិច្ច និងហិរញ្ញាវត្ថុ នាថ្ងៃទី ១៨ ខែកុម្ភៈ ឆ្នាំ ២០២២ បានថ្លែងថា នៅឆ្នាំ ២០២២ នេះ សេដ្ឋកិច្ចកម្ពុជា រំពឹងថា នឹងកើនឡើងដល់់ ៥.៦% និង ៦.៥% នៅឆ្នាំក្រោយ និង ៧% នៅឆ្នាំ ២០២៤ ។
លោកថា ការធ្វើពិពិធកម្មសេដ្ឋកិច្ច និងការបង្កើតភាពប្រគួតប្រជែងរបស់សេដ្ឋកិច្ច នៅតែជាគន្លឹះធំបំផុតដែលមិនអាចខ្លះបាន ។ ជាមួយគ្នានេះការកែទម្រង់ និងការអនុវត្តគោលនយោបាយផ្សេងៗរបស់រាជរដ្ឋាភិបាល ត្រូវតែមានប្រសិទ្ធភាពជាងមុន និងជំរុញឱ្យមានអភិបាលកិច្ចល្អជាងមុន ។
ច្បាប់វិនិយោគថ្មី ការបង្កើតថ្នាលពាណិជ្ជឌីជីថល់ រួមនឹងកិច្ចព្រមព្រៀងពាណីជ្ជកម្មសេរីភាគីរវាងកម្ពុជា និងប្រទេសនានារួមនឹងកិច្ចព្រមព្រៀងពហុភាគីក្នុងក្របខណ្ឌអាស៊ានជាដើមនោះ ត្រូវគេរំពឹងថា កម្ពុជានឹងមានឱកាសទាក់ទាញ់ការវិនិយោគពីបរទេសច្រើន ។ ច្បាប់ស្តីពី វិនិយោគនេះ បានបង្ហាញកាន់តែច្បាស់នូវការលើកទឹកចិត្តដល់វិនិយោគិនក្នុងស្រុក និងបរទេស ។ ច្បាប់នេះក៏ផ្តោតសំខាន់លើនិន្នាការធុរកិច្ចសកលថ្មីៗ ដោយបានដាក់បញ្ចូលវិស័យឧស្សាហកម្មបៃតង, បច្ចេកវិទ្យាព័ត៌មាន និងទូរគមនាគមន៍ និងឧស្សាហកម្ម ដែលមានបច្ចេកវិទ្យាខ្ពស់ ។ នេះជាការលើកឡើងរបស់លោក សុខ ចិន្តាសោភា អគ្គលេខាធិការក្រុមប្រឹក្សាអភិវឌ្ឍន៍កម្ពុជា នៅក្នុងកិច្ចប្រជុំតាមអនឡាញមួយកាលពីចុងសប្តាហ៍មុខជាមួយស្ថាប័នធុរជនប្រទេសម៉ាឡេស៊ី ។
លោកបានបន្តថា រាល់ប្បញ្ញត្តិក្នុងច្បាប់នេះសុទ្ធតែបង្ហាញពីកិច្ចសម្រួលតាមរយៈការលើកលែងពន្ធក្នុងកញ្ចប់លើកទឹកចិត្ត និងការការពារវិនិយោគសំដៅ ធ្វើឱ្យកាន់តែមានភាពងាយស្រួល រលូន និងប្រសិទ្ធភាពក្នុងការអនុវត្តនីតិវិធីចុះបញ្ជីសម្រាប់ក្រុមហ៊ុនវិនិយោគ ហើយលោកបានសម្ដែងនូវសុទិដ្ឋិនិយមថា កិច្ចប្រឹងប្រែងរបស់រាជរដ្ឋាភិបាលកម្ពុជា ក្នុងការរៀបចំច្បាប់ស្តីពីវិនិយោគនេះ នឹងទទួលបាននូវលទ្ធផលផ្លែផ្កានៅក្នុងរយៈពេលខ្លីខាងមុខ តាមរយៈច្បាប់នេះកម្ពុជាអាចច្បាមយកកាលានុវត្តភាពជាអតិបរមាក្នុងការជំរុញវិនិយោគឱ្យកាន់តែមានសន្ទុះទៅមុខជាបន្តបន្ទាប់ ។
លោក សុខ ចិន្តាសោភា បានគូសបញ្ជាក់ពីភាពចាំបាច់របស់កម្ពុជា ក្នុងការកែលម្អបរិស្ថានវិនិយោគសំដៅជំរុញទាក់ទាញការវិនិយោគ ក្នុងគន្លងប្រក្រតីភាពថ្មីនៃវិបត្តិជំងឺកូវីដ-១៩ ដែលទាមទារឱ្យកម្ពុជាប្រកាន់យកនូវអភិក្រមបុរេសកម្មជាងមុន ក្នុងការជំរុញ និងទាក់ទាញវិនិយោគប្រកបដោយគុណភាព និងចីរភាព ។
គិតត្រឹមដំណាច់ឆ្នាំ ២០២១ ក្រុមប្រឹក្សាអភិវឌ្ឍន៍កម្ពុជា បានទទួលស្វាគមន៍ និងចុះបញ្ជីគម្រោងវិនិយោគមានលក្ខណៈសម្បត្តិគ្រប់គ្រាន់របស់ម៉ាឡេស៊ី ចំនួន ១៦២ គម្រោង ក្នុងទុនវិនិយោគសរុបប្រមាណ ៣.១៥ ប៊ីលានដុល្លារអាមេរិក ៕
ចែករំលែកព័តមាននេះ