រាជធានីភ្នំពេញ ៖ នៅពីមុខឱសថស្ថានមួយកន្លែងមានអ្នកទៅទិញថ្នាំបានឈរតម្រង់ជួរគ្នា ។ អ្នកលក់បានដាក់ខ្សែខណ្ឌមិនឲ្យអ្នកទិញថ្នាំ និងសម្ភារពេទ្យចូលទៅជិតខ្លួនឡើយ ដើម្បីការពារជំងឺកូវីដ ១៩ ដែលឆ្លងតាមផ្លូវដង្ហើម ។ អ្នកទិញស្រែកទិញថ្នាំ ឬរបស់របរនានាបន្ទាប់មក អ្នកលក់យកមកឲ្យមានការប្រុងប្រយ័ត្នជានិច្ច ។ លុយដែលអ្នកលក់ទទួលពីអ្នកទិញត្រូវបាញ់អាកុលសម្លាប់មេរោគ មុនទទួលយកទៅទុក ។ ចំណែកថ្នាំពេទ្យ ឬសម្ភារពេទ្យដែលអ្នកទិញក៍ដូចគ្នាមុនអ្នកទិញទទួលយកបានបាញ់អាកុលសម្លាប់មេរោគដែរ ។
នៅក្នុងចំណោមអ្នកទិញដែលបានទៅកន្លែងលក់ថ្នាំ ៥ នាក់ នៅពេលនោះមានពីរនាក់រកទិញឧបករណ៍ធ្វើតេស្តរហ័សរកមេរោគកូវីដ ១៩ ។ បុរសម្នាក់ត្រូវការទិញឧបករណ៍នេះពីរដើម ។ ចំណែកស្ត្រីម្នាក់ទៀតទិញ ៤ ដើម ។ «ខ្ញុំ និងស្វាមីមានអាការៈឈឺកំពង់ករ ពួកយើងបារម្ភខ្លាចកើតកូវីដ ១៩ ដូច្នេះទិញយកទៅធ្វើតេស្ត ដើម្បីការពារខ្លួនជាមុនកុំឲ្យឆ្លងទៅកូនៗ និងដើម្បីកុំឲ្យជំងឺឈឺធ្ងន់ទាន់ ឆាប់ទទួលបានការព្យាបាល» ស្ត្រីម្នាក់និយាយ ដោយពេលនោះគាត់មានពាក់ម៉ាសការពារផង ។
កម្ពុជាបានកំពុងប្រឈមការឆ្លងរាលដាលជំងឺកូវីដ ១៩ ជាថ្មីជាមួយមេរោគបំប្លែងអូមេក្រុង ។ នៅពេលសង្ស័យដោយមានអាការៈក្តៅខ្លួន ឬឈឺករ និងបានទាក់ទងផ្ទាល់ជាមួយអ្នកកើតជំងឺកូវីដ ១៩ ពលរដ្ឋបានទៅទិញឧកបរណ៍ធ្វើតេស្តរហ័យមកធ្វើតេស្តដោយខ្លួនឯង ។
អ្នកលក់ថ្នាំពេទ្យនៅក្នុងសង្កាត់និរោធនិយាយថា ក្នុងមួយថ្ងៃលោកលក់ឧបករណ៍តេស្តរហ័សនេះពី ៥០ ទៅ ១០០ប្រអប់តូច ដែលស្មើចំនួនឧបករណ៍ពី ១០០ ទៅ ២០០ ។ បុរសអ្នកលក់ថ្នាំពេទ្យដែលសូមមិនឲ្យបញ្ចេញឈ្មោះនិយាយថា នៅក្នុងរយៈពេលប៉ុន្មានថ្ងៃនេះឧបករណ៍តេស្តបានឡើងថ្លៃ ។ លោកបានទិញពីអ្នកបោះដុំក្នុងតម្លៃ ៧០ ដុល្លារមួយប្រអប់ធំតែឥឡូវបានឡើងដល់ ៩០ ដុល្លារមួយប្រអប់ធំ សម្រាប់ឧករណ៍ផលិតនៅប្រទេសកូរ៉េ ។ លោកថា ការឡើងថ្លៃនៅពេលមានតម្រូវការច្រើន ។
នៅកន្លែងលក់ថ្នាំពេទ្យគេអាចទិញឧបករណ៍តេស្តរហ័សនេះក្នុងតម្លៃពី ៣ ដុល្លារ ទៅ ៥ ដុល្លារក្នុងមួយឧបករណ៍ ។តម្លៃនេះ ថោកជាងកាលពីពេលដំបូងៗ ដែលឧករណ៍តេស្តរហ័សនេះនបានអនុញ្ញាតជាផ្លូវការឲ្យប្រើប្រាស់ដោយរដ្ឋាភិបាល ។ កាលពីឆ្នាំទៅឧករណ៍តេស្តរហ័សនេះ មានតម្លៃជាង ១០ ដុល្លារក្នុងមួយគ្រឿង ។
នៅពេលជំងឺកូវីដ ១៩ រាតត្បាត អាកុល និងម៉ាស់ បានក្លាយជាទំនិញយុទ្ធសាស្ត្រមួយ ដែលពលរដ្ឋត្រូវទិញប្រើប្រាស់ប្រចាំថ្ងៃ ហើយនៅពេលនេះទំនងឧករណ៍តេស្តរហ័សនេះក៍សំខាន់ដែរ ។ ក្រៅពីការទិញមកប្រើប្រាស់ក្នុងគ្រួសារ គេសង្កេតឃើញថានៅតាមកម្មវិធីជួបជុំនានា ទាំងផ្លូវការនិងមិនផ្លូវការ មុនចូលប្រជុំ មុនជួបជុំគ្នា តម្រូវឲ្យមានការធ្វើតេស្តរហ័សរកមេរោគកូវីដ ១៩ នេះជាមុនដែរ ៕
ចែករំលែកព័តមាននេះ