ផ្អើលឈុល ! សមត្ថកិច្ចព័ទ្ធផ្ទះសំណាក់ លីហ្សា
រាជធានីភ្នំពេញ ៖ មានការភ្ញាក់ផ្អើលយ៉ាងខ្លាំងដោយសមត្ថកិច្ចជាច្រើននាក់បានចុះទៅឡោមព័ទ្ធផ្ទះសំណាក់លីហ្សា ដែលមានទីតាំងស្ថិតនៅផ្លូវK៥ ភូមិទួលសង្កែ សង្កាត់ទួលសង្កែ
រាជធានីភ្នំពេញ ៖ មានការភ្ញាក់ផ្អើលយ៉ាងខ្លាំងដោយសមត្ថកិច្ចជាច្រើននាក់បានចុះទៅឡោមព័ទ្ធផ្ទះសំណាក់លីហ្សា ដែលមានទីតាំងស្ថិតនៅផ្លូវK៥ ភូមិទួលសង្កែ សង្កាត់ទួលសង្កែ ខណ្ឌឫស្សីកែវ កាលពីវេលាម៉ោង៤ និង៣០នាទីរសៀល ថ្ងៃទី៣០ ខែកក្កដា ឆ្នាំ២០១៦ ។
ប្រតិបត្តិការនេះធ្វើឡើងដោយនគរបាលការិយាល័យព្រហ្មទណ្ឌកម្រិតស្រាល នៃស្នងការនគរបាលរាជធានីភ្នំពេញ សហការជាមួយអាជ្ញាធរខណ្ឌឫស្សីកែវ និងមានការសម្របសម្រួលពីលោក សៀង សុខ ព្រះរាជ្ញារងសាលាដំបូងរាជធានីភ្នំពេញ ។
ប្រភពពីសមត្ថកិច្ចបានឲ្យដឹងថា ការឈានទៅឆែកឆេរផ្ទះសំណាក់នេះ គឺបន្ទាប់ពីជនសង្ស័យបានធ្វើសកកម្មភាពឆក់កាបូបនៅក្នុងខណ្ឌចំការមន រួចរត់ទៅសម្ងំលាក់ខ្លួន និងប្រើប្រាស់គ្រឿងញៀននៅចំណុចផ្ទះសំណាក់ខាងលើ ។
ប្រភពបានឲ្យដឹងទៀតថា ជនសង្ស័យដែលត្រូវឃាត់ខ្លួនមាន ១-ឈ្មោះ សុវណ្ណ ឧត្ដមរង្សី ភេទប្រុស អាយុ២៦ឆ្នាំ រៀនជួសជុលទូស័ព្ទ, ២-ឈ្មោះ ពុទ្ធ សំណាង ភេទប្រុស អាយុ១៧ឆ្នាំ, ៣-ឈ្មោះ សេង សុខលាង ភេទប្រុស អាយុ១៦ឆ្នាំ, ៤-ឈ្មោះ ហា៑ង ម៉េងលាង ភេទប្រុស អាយុ២៣ឆ្នាំ, ៥-ឈ្មោះ លី មិញ ភេទប្រុស អាយុ២២ឆ្នាំ, ៦-ឈ្មោះ ហួរ វណ្ឌឌី ភេទប្រុស អាយុ២២ឆ្នាំ, ៧-ឈ្មោះ ឈឹម លីមហេង ភេទប្រុស អាយុ១៦ឆ្នាំ និង ៨-ឈ្មោះ ម៉េង សេង ភេទប្រុស អាយុ១៦ឆ្នាំ ជាសិស្ស ។
ប្រភពព័ត៌មានឲ្យដឹងថា កាលពីវេលាម៉ោងប្រមាណ១២ និង៣៩នាទីថ្ងៃត្រង់ ថ្ងៃទី២៩ ខែកក្កដា ឆ្នាំ២០១៦ ជនសង្ស័យ២នាក់បានធ្វើសកម្មភាពឆក់ការបូបនៅតាមបណ្តោយផ្លូវលេខ៣១០ ខណ្ឌចំកាមន រួចគេចខ្លួនបាត់ ។ ដោយមានការស្រាវជ្រាវសមត្ថកិច្ចក៏បានឈានទៅឆែកឆេរ ផ្ទះសំណាក់ លីហ្សា ចំនួន៤បន្ទប់ គឺបន្ទប់លេខ១០៣, ១០៧, ១១១ និងបន្ទប់លេខ១១៤ ដោយឃាត់ខ្លួនបានជនសង្ស័យជាមុខសញ្ញាឆក់ជាបន្តបន្ទាប់ចំនួន៨នាក់ ព្រមទាំងដកហូតបានម៉ូតូ៥គ្រឿង និងឧបករណ៍សម្រាប់ប្រើប្រាស់គ្រឿងញៀនមួយចំនួនទៀត ។
ក្រោយពេលឃាត់ខ្លួន ជនសង្ស័យទាំង៨នាក់ និងវត្ថុតាង ត្រូវបានបញ្ជូនទៅកាន់ការិយាល័យនគរបាលព្រហ្មទណ្ឌកម្រិតស្រាលរាជធានីភ្នំពេញ ដើម្បីធ្វើការសាកសួរ និងចាត់ការតាមនិតិវិធីច្បាប់ ៕
ចែករំលែកព័តមាននេះ