ខេត្តប៉ៃលិន ៖ បុរសម្នាក់ទៅផឹកស្រា.សក្លែមសាច់ឆ្កែជាមួយមិត្តភក្តិក្នុងភូមិតាំងពីថ្ងៃ ដល់ល្ងាចរហូតស្រវឹងយ៉ាងជោកជាំ ក៏ដើរត្រឡប់ផ្ទះវិញ ស្រាប់តែកើតចិត្តប្រចណ្ឌប្រពន្ធរបស់ខ្លួនជាមួយអ្នកជិតខាង ក៏ចាប់ប្រពន្ធវាយទាត់ធាក់គ្នា បណ្តាលឱ្យសន្លប់ ហើយត្រូវអ្នកជិតខាងឃើញទាន់ ប្រញាប់ដឹកបញ្ជូនទៅសង្គ្រោះនៅមន្ទីរពេទ្យបង្អែកខេត្ត លុះសភាពធ្ងន់ធ្ងរពេកត្រូវក្រុមគ្រូពេទ្យបញ្ជូនបន្តទៅមន្ទីរពេទ្យខេត្តបាត់ដំបងវិញ ។
ហេតុការណ៍នេះកើតឡើង កាលពីវេលាម៉ោង០៥ និង៣០នាទីល្ងាចថ្ងៃទី២៨ កក្កដា ២០១៦ ស្ថិតនៅចំណុចផ្ទះក្នុងភូមិដី.សថ្មី ឃុំស្ទឹងត្រង់ ស្រុកសាលាក្រៅ ។
ជនសង្ស័យជាប្តីឈ្មោះហួន តែម ភេទប្រុស អាយុ៤០ឆ្នាំ ជាកសិករ មានប្រពន្ធឈ្មោះរុន ណាក់ អាយុ៣០ឆ្នាំ រងរបួសធ្ងន់សន្លប់។
ប្រភពបន្តថា មុនពេលកើតហេតុ គេឃើញជនដៃដល់ជាប្តី បានចេញពីផ្ទះតាំងពីថ្ងៃ ទៅជួបជុំផឹកស៊ីជាមួយមិត្តភក្តិនៅក្នុងភូមិ រហូតដល់ពេលល្ងាច ដើរត្រឡប់ទៅផ្ទះវិញ ក្នុងសភាពទ្រេតទ្រោត ។ ពេលទៅដល់ក្បែរប្រពន្ធ ជនដៃដល់ចាប់ផ្តើមជេរបញ្ចោរ ឮសូរដល់ផ្ទះពីរ ផ្ទះបី តែគ្មាននរណាហ៊ានចេញមកឃាត់នោះឡើយ ។
ប្រភពដដែលបញ្ជាក់ថា ពេលនោះប្រពន្ធ ក៏មិនបានតបតអ្វីនោះដែរ ដោយកំពុងអង្គុយភ្លេចខ្លួននៅក្នុងផ្ទះ ស្រាប់តែបុរសជាប្តីបានឡើងទៅទាត់មួយជើងចំកណ្តាលមុខ និងដាល់មួយដៃចំថ្គាមខាងឆ្វេង រួចចាប់បោចសក់បោកផ្តួលទៅខាងក្រោយ បណ្តាលឱ្យប៉ះចំឈើជ្រុងនៅក្បែរនោះរងរបួសធ្ងន់ធ្ងរសន្លប់នៅនឹងកន្លែង (របួសឆ្អឹងជំនីរ និងពោះ) ខណៈស្ត្រីរងគ្រោះ កំពុងតែមានផ្ទៃពោះ៥ខែផងដែរ។ បច្ចុប្បន្ន គេមិនទាន់ដឹងថា កូននៅក្នុងផ្ទៃនាងអាចនឹងស្លាប់ ឬយ៉ាងណានៅឡើយទេ ព្រោះគ្រូពេទ្យបង្អែកខេត្តប៉ៃលិន ឃើញសភាពមិនស្រួល ក៏បញ្ជូនបន្តទៅមន្ទីរពេទ្យខេត្តបាត់ដំបង ។
ជនសង្ស័យត្រូវកំលាំងនគរបាលប៉ុស្តិ៍ស្ទឹងត្រង់ ចុះទៅធ្វើការចាប់ឃាត់ខ្លួនភ្លាមៗ បន្ទាប់ពីទទួលពាក្យបណ្តឹង រួចក៏បញ្ជូនទៅកាន់អធិការដ្ឋាននគរបាលស្រុកសាលាក្រៅ ដើម្បីរៀបចំសំណុំរឿងបញ្ជូនបន្តទៅការិយាល័យព្រហ្មទណ្ឌកម្រិតស្រាលនៃស្នងការនគរបាលខេត្តឱ្យចាត់ការបន្តតាមនីតិវិធី ។
ចែករំលែកព័តមាននេះ