រាជធានីភ្នំពេញ ៖ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ថា បច្ចុប្បន្នក្រសួងបានរៀបចំលិខិតបទដ្ឋានគតិយុត្តិចប់សព្វគ្រប់សម្រាប់ដាក់ឱ្យដំណើរការនូវរបបសន្តិសុខសង្គមផ្នែកប្រាក់សោធននិវត្តន៍ ។ ប៉ុន្តែការអនុវត្តលើសេវាផ្តល់ប្រាក់សោធននិវត្តន៍កម្មករនិយោជិតនេះ បានពន្យារពេលដោយសារបញ្ហាកូវីដ ១៩ ។
របបប្រាក់សោធននិវត្តន៍កម្មករនិយោជិត ជាសេវាសង្គមមួយ ដែលអ្នកធ្វើការនៅក្នុងវិស័យឯកជនចង់បានពីព្រោះការមានប្រាក់ចូលនិវត្តន៍ជាផ្នែកសំខាន់នៅក្នុងការទ្រទ្រង់ជីវភាពពួកគេពេលចាស់ ឬពេលបាត់បង់សមត្ថភាពការងារ ។
បេឡាជាតិសន្តិសុខសង្គម ជាស្ថាប័នដែលកំពុងអនុវត្តរបបសន្តិសុខសង្គមដល់ជនទាំងឡាយដែលស្ថិតនៅក្រោមបទប្បញ្ញត្តិនៃច្បាប់ស្តីពីការងារ និងបានចុះបញ្ជីកាក្នុងបេឡាជាតិសន្តិសុខ ប.ស.ស ។ របបសន្តិសង្គម ដែលមាន ផ្នែកហានិភ័យការងារ ផ្នែកថែទាំសុខភាព និងផ្នែកសោធននិវត្តន៍ ប៉ុន្តែមកដល់ពេលបច្ចុប្បន្ននេះ បានកំពុងដំណើរការតែផ្នែកហានិភ័យការងារ ផ្នែកថែទាំសុខភាព ។
ដើម្បីទទួលបានសេវារបបសន្តិសុខសង្គមនេះ កម្មករនិយោជិតដែលធ្វើការនៅក្នុងវិស័យឯកជន និងម្ចាស់សហគ្រាស រោងចក្រ ក្រុមហ៊ុន ត្រូវបង់វិភាគទៅតាមច្បាប់កំណត់ ទៅបេឡាជាតិរបបសន្តិសុខសង្គម ។ ចំណែកមន្ត្រីសាធារណៈ រាជរដ្ឋាភិបាលបានបង់ភាគទានជំនួសរហូតមកដល់បច្ចុប្បន្ននេះ ។
នៅក្នុងកិច្ចប្រជុំបូកសរុបលទ្ធផលការងាររបស់បេឡាជាតិសន្តិសុខសង្គម ឆ្នាំ ២០២១ លោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ លើកឡើងថា ច្បាប់ស្តីពីរបបសន្តិសុខសង្គមថ្មី ទទួលបានការអនុម័ត និងដាក់ឱ្យប្រើប្រាស់ដើម្បីអនុវត្តផ្នែក ប្រាក់សោធន សម្រាប់កម្មករនិយោជិត និងផ្នែករបបហានិភ័យការងារ សម្រាប់មន្ត្រីសាធារណៈ ។ លោកបានបញ្ជាក់ថា បច្ចុប្បន្ន ក្រសួងការងារ និងបណ្តុះបណ្តាលវិជ្ជាជីវៈ បានរៀបចំលិខិតបទដ្ឋានគតិយុត្តិចប់សព្វគ្រប់សម្រាប់ដាក់ឱ្យដំណើរការនូវរបបសន្តិសុខសង្គមផ្នែកប្រាក់សោធន ។ ប៉ុន្តែដោយសារតែផលប៉ះពាល់នៃវិបត្តិជំងឺកូវីដ-១៩ ក្រុមប្រឹក្សាជាតិគាំពារសង្គម កំពុងពិនិត្យសម្រេចកាលបរិច្ឆេទ នៃការដាក់ឱ្យដំណើរការនូវរបបសន្តិសុខសង្គមផ្នែកប្រាក់សោធន សម្រាប់កម្មករនិយោជិតដែលស្ថិតនៅក្រោមបទបញ្ញត្តិច្បាប់ស្តីពីការងារ ។
លោក អ៊ុក សមវិទ្យា អគ្គនាយកបេឡាជាតិសន្ដិសុខសង្គម បានឱ្យដឹងថា បច្ចុប្បន្នបេឡាជាតិសន្តិសុខសង្គម បានដំណើរការរបបសន្តិសុខសង្គមផ្នែកថែទាំសុខភាព និងផ្នែកហានិភ័យការងារ ទាំងវិស័យឯកជន និងវិស័យសាធារណៈ គិតត្រឹមឆ្នាំ ២០២១ ដែលក្នុងនោះសម្រាប់វិស័យឯកជនបានចុះបញ្ជីសរុបចំនួន ១៧ ៣១៧ សហគ្រាស ដែលមានសមាជិកសរុបចំនួន ២ ៣០៥ ៩៥៨ នាក់ និងផ្នែកថែទាំសុខភាពចំនួន ១៤ ៦៨៩ សហគ្រាស មានសមាជិកចំនួន ២ ៣០៥ ៩៥៨ នាក់ ។ ចំណែកវិស័យសាធារណៈបានចុះបញ្ជីផ្នែកថែទាំសុខភាពសរុបចំនួន ៣៨ស្ថាប័ន មានសមាជិកសរុប ៣៩៨ ៧៤០ នាក់ និងផ្នែកហានិភ័យការងារចំនួន ៣៥ ស្ថាប័ន មានសមាជិកសរុប ២៤៨ ៨៩២ នាក់ ។
មន្ត្រីអះអាងថា គិតមកដល់ពេលនេះ បេឡាជាតិសន្តិសុខសង្គម បានផ្តល់តាវកាលិកជូនសមាជិករបស់ខ្លួនចំពោះផ្នែកហានិភ័យការងារចំនួន ១០.៦៨ ប៊ីលានរៀល និងផ្នែកថែទាំសុខភាពចំនួន ១៥៦.២០ ប៊ីលានរៀល ៕
ចែករំលែកព័តមាននេះ