រាជធានីភ្នំពេញ ៖ មន្ត្រីជាន់ខ្ពស់កម្ពុជាបានស្នើប្រទេសទីម័រផ្ដល់នូវបទពិសោធន៍ រួមទាំងបទដ្ឋានច្បាប់នានាដែលទាក់ទងនឹងឧស្សាហកម្មប្រេង ឬការរុករកប្រេងកាតដើម្បីយកមកអនុវត្តក្នុងឧស្សាហកម្មប្រេងនៅកម្ពុជា
រាជធានីភ្នំពេញ ៖ មន្ត្រីជាន់ខ្ពស់កម្ពុជាបានស្នើប្រទេសទីម័រផ្ដល់នូវបទពិសោធន៍ រួមទាំងបទដ្ឋានច្បាប់នានាដែលទាក់ទងនឹងឧស្សាហកម្មប្រេង ឬការរុករកប្រេងកាតដើម្បីយកមកអនុវត្តក្នុងឧស្សាហកម្មប្រេងនៅកម្ពុជា ខណៈដែលប្រទេសមានសេដ្ឋកិច្ចកំពុងលូតលាស់មួយនេះ បាននិងកំពុងនាំចូលប្រេងឥន្ធនៈទាំងស្រុងពីប្រទេសវៀតណាម សិង្ហបុរី និងថៃ ។ ចំណែកប្រេងនិងឧស្ម័ននៅបាតសមុទ្រ និងក្រោមដី ព្រមទាំងរោងចក្រចម្រាញ់ប្រេងកាតរបស់ខ្លួន នៅមិនទាន់អាចធ្វើអាជីវកម្មបាន និងលេចជារូបរាងនៅឡើយ ។
ថ្លែងនៅក្នុងជំនួបពិភាក្សាការងារជាមួយ លោកស្រី Felicidadae de souse Guterres ឯកអគ្គរដ្ឋទូតប្រទេសទីម័រប្រចាំកម្ពុជា កាលពីថ្ងៃទី២១ កក្កដា កន្លងមក លោកឧបនាយករដ្ឋមន្ត្រី សុខ អាន រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី បានស្នើឲ្យប្រទេសទីម័រផ្តល់នូវបទពិសោធន៍ រួមទាំងបទដ្ឋាននានាទាក់ទងឧស្សាហកម្មប្រេង ឬការរុករកប្រេងកាតនៅតំបន់សមុទ្រនៃប្រទេសទីម័រ ។
លោកបណ្ឌិតសុខ អាន ថ្លែងថា ៖ « ទីម័រ ជាប្រទេសដែលមានបទពិសោធន៍ខ្ពស់នៅក្នុងឧស្សាហកម្មប្រេង និងឧស្ម័ន ហើយនៅថ្ងៃអនាគតដ៏ខ្លីខាងមុខ ក្រសួងរ៉ែ និងថាមពល នឹងទៅទស្សនកិច្ចនៅប្រទេសនេះដើម្បីរៀនសូត្រនូវបទពិសោធន៍ ក៏ដូចជាស្វែងយល់ពីរបៀបការធ្វើអាជីវកម្មប្រេង និងឧស្ម័ន » ។
នៅក្នុងសិក្ខាសាលាពិគ្រោះយោបល់លើ សេចក្តីព្រាងច្បាប់ប្រេងកាត កាលពីពេលថ្មីៗ នេះ លោក ម៉េង សក្តិធារ៉ា រដ្ឋលេខា ធិការក្រសួងរ៉ែ និងថាមពល បានប្រាប់អ្នកយកព័ត៌មានថា ប្រេងកាតជាសក្តានុពលធំមួយសម្រាប់ការអភិវឌ្ឍសេដ្ឋកិច្ចសង្គម ហើយជាធនធានដែលមិនកកើតឡើងវិញ ដែលទាមទារឱ្យមានការរៀបចំជាគោលនយោបាយ ជាបទប្បញ្ញតិ្តច្បាប់ ដោយផ្អែកលើមេរៀនបទពិសោធន៍របស់ប្រទេសផ្សេងៗនៅលើពិភពលោកដែលបានអនុវត្ត និងធ្វើយ៉ាងណា ឱ្យច្បាប់នេះមានគ្រប់ជ្រុងជ្រោយ មានភាពច្បាស់លាស់ក្នុងការធានាថា យើងអាចធ្វើអាជីវកម្មលើធនធាននេះ ដើម្បីជាផលប្រយោជន៍រយៈពេលវែង ។
គួរបញ្ជាក់ថា កម្ពុជានឹងមានរោងចក្រចម្រាញ់ប្រេងកាតរបស់ខ្លួននៅចុងឆ្នាំ២០១៨ខាងមុខ ដែលជាការវិនិយោគរួមគ្នារវាងក្រុមហ៊ុនខេមបូឌាន ភេត្រូខេមីខល ខូអិលធីឌី (CPC) ជាមួយក្រុមហ៊ុន CNPC Northeast Refining & Chemical Engineering របស់ប្រទេសចិន ។
រោងចក្រចម្រាញ់ប្រេងកាតនេះ នឹងអនុវត្តនៅដំណាក់កាលទី១ ក្នុងទំហំទឹកប្រាក់៦២០លានដុល្លារអាមេរិក ដែលមានសមត្ថភាពផលិតបាន២លានតោនក្នុង១ឆ្នាំ ស្ថិតនៅស្រុកព្រៃនប់ ខេត្តព្រះសីហនុ លើផ្ទៃដីប្រមាណ៤០ហិកតា ក្នុងចំណោមផ្ទៃដីសរុប៤០០ហិកតា ។ រោងចក្រចម្រាញ់ប្រេងកាតនេះ ជាគម្រោងវិនិយោគលើវិស័យប្រេងឥន្ធនៈប្រកបដោយមហិច្ឆតាតែមួយគត់ មិនធ្លាប់មានពីមុននៅកម្ពុជាគិតមកដល់ពេលនេះ នឹងត្រូវប្រើទឹកប្រាក់បណ្តាក់ទុនប្រមាណ៣ពាន់លានដុល្លារអាមេរិក ។ នៅពេលសាងសង់រួចជាស្ថាពរហើយដំណើរការពេញសមត្ថភាព រោងចក្រនេះអាចផលិតប្រេងបាន៥លានតោនក្នុង១ឆ្នាំ ៕
ចែករំលែកព័តមាននេះ