បើក្រុមហ៊ុនកូរ៉េវិនិយោគនៅថៃ វៀតណាម វិនិយោគនៅកម្ពុជា ផង
- ភ្នំពេញ
រាជធានានីភ្នំពេញ ៖ ប្រមុខដឹកនាំកម្ពុជា សម្ដេច ហ៊ុន សែន បានស្នើទៅប្រធានាធិបតីកូរ៉េ គាំទ្រដល់រូបមន្ត ១ បូក…
រាជធានានីភ្នំពេញ ៖ ប្រមុខដឹកនាំកម្ពុជា សម្ដេច ហ៊ុន សែន បានស្នើទៅប្រធានាធិបតីកូរ៉េ គាំទ្រដល់រូបមន្ត ១ បូក…
រាជធានានីភ្នំពេញ ៖ ប្រមុខដឹកនាំកម្ពុជា សម្ដេច ហ៊ុន សែន បានស្នើទៅប្រធានាធិបតីកូរ៉េ គាំទ្រដល់រូបមន្ត ១ បូក ។ តាមសម្តេចនាយករដ្ឋមន្ត្រី រូបមន្ត ១ បូក មានន័យថា បើសិនជាក្រុមហ៊ុនកូរ៉េមានការវិនិយោគនៅថៃ និងវៀតណាមក៏អាចបន្ថែមការវិនិយោគនៅកម្ពុជាផងដែរ ។
សម្តេចនាយករដ្ឋមន្ត្រី បានស្នើទៅលោក Moon Jae-In ប្រធានាធិបតីកូរ៉េ នៅក្នុងជំនួបមួយដែលធ្វើឡើងនៅសាធារណរដ្ឋកូរ៉េ ទីដែលសម្តេចកំពុងចូលរួមកិច្ចប្រជុំសន្តិភាពពិភពលោកឆ្នាំ ២០២២ ។ ក្នុងជំនួបដែលធ្វើឡើងនៅថ្ងៃទី ១១ ខែកុម្ភៈនោះ ប្រមុខដឹកនាំកម្ពុជាបានស្នើទៅភាគីកូរ៉េច្រើនចំណុចទៀត ។ ក្រៅពីសំណើលើការធ្វើពាណិជ្ជកម្មក៍មានសំណើមនុស្សធម៌ដែរ ។
សម្តេច ហ៊ុន សែន បានស្នើឲ្យកូរ៉េ គាំទ្រ ឬ មានកិច្ចសហប្រតិបត្តិការលើផ្នែកកសិ-ឧស្សាហកម្ម និងការកែច្នៃផលិតផល ដូចជាផលិតផលកសិកម្មជាដើម ដើម្បីធ្វើការនាំចេញទៅកាន់ប្រទេសកូរ៉េ និងបានជំរុញភាគីកូរ៉េឲ្យពន្លឿនកិច្ចព្រមព្រៀងពាណិជ្ជកម្មសេរីរវាងកម្ពុជាកូរ៉េ ឲ្យឆាប់បានចូលជាធរមាន ។
ក្រៅពីនេះកម្ពុជា បានស្នើឲ្យកូរ៉េ ជួយអភិវឌ្ឍន៍ធនធានមនុស្សតាមរយៈការផ្ដល់អាហារូបករណ៍ និងការបណ្ដុះបណ្ដាលផ្សេងៗ រួមនឹងការបង្កើនកូតានាំពលករកម្ពុជាមកធ្វើការនៅប្រទេសកូរ៉េជាដើម ។ ទាក់ទងការធ្វើពាណិជ្ជកម្មនៅកម្ពុជា សម្តេច ហ៊ុន សែន បានបញ្ជាក់ថា នៅពេលនេះជាឱកាសល្អសម្រាប់អ្នកវិនិយោគ ដោយសារកម្ពុជាមានច្បាប់វិនិយោគថ្មី ។
លោក Moon Jae-In បានលើកឡើងថា បច្ចុប្បន្ននេះ មានក្រុមហ៊ុនកូរ៉េប្រមាណជា ៣០០ ក្រុមហ៊ុន កំពុងតែវិនិយោគនៅកម្ពុជា ។ លោកប្រធានាធិបតី ថាកិច្ចព្រមព្រៀងពាណិជ្ជកម្មសេរីកម្ពុជាកូរ៉េនឹងចូលជាធរមានឆាប់ៗហើយវានឹងជំរុញវិស័យសេដ្ឋកិច្ចពាណិជ្ជកម្មរវាងប្រទេសទាំងពីរឲ្យមានភាពល្អប្រសើរឡើង ។
ទំហំពាណិជ្ជកម្មទ្វេភាគីរវាងកម្ពុជា និងកូរ៉េស ម្រេចបានជាង ៨៨៥ លានដុល្លារអាមេរិក ក្នុងឆ្នាំ ២០២០ ។ បើយោងតាមទិន្នន័យរបស់សមាគមពាណិជ្ជកម្មអន្តរជាតិកូរ៉េ ។ កម្ពុជា បាននាំចេញទំនិញសរុបគិតជាទឹកប្រាក់មាន ៣១៨លានដុល្លារអាមេរិកទៅកូរ៉េខាងត្បូងខណៈកម្ពុជា បាននាំចូលពីកូរ៉េខាងត្បូងគិតជាទឹកប្រាក់ ៥៦៧ លានដុល្លារអាមេរិក ។ ទំនិញដែលកម្ពុជានាំចេញទៅកូរ៉េខាងត្បូង ភាគច្រើនជាសម្លៀកបំពាក់ និងផលិតផលស្បែកជើង និងកាបូបជាដើម ។ ចំណែកកូរ៉េខាងត្បូងនាំចូលមកកម្ពុជា ដូចជាភេសជ្ជៈ គ្រឿងអេឡិចត្រូនិក ឱសថ និងរថយន្តដឹកទំនិញ ។
កិច្ចព្រមព្រៀងពាណិជ្ជកម្មសេរីកម្ពុជាកូរ៉េត្រូវគេរំពឹងថា ផ្តល់ផលប្រយោជន៍ជាច្រើន ដោយបង្កើតឲ្យមានពិពិធកម្មទីផ្សារ ដែលកម្ពុជាអាចនាំចេញផលិតផលក្នុងវិស័យកាត់ដេរ ដូចជាសម្លៀកបំពាក់ កាបូប ស្បែកជើងជាដើមនោះ៕
ចែករំលែកព័តមាននេះ