ខេត្តព្រះសីហនុ ៖ ត្រឹមថ្ងៃដំបូងនៃការចុះអនុវត្តការងារ អាជ្ញាធរជំនាញបានរកឃើញ យ៉ាងហោចណាស់មានយានយន្ត ៦១ គ្រឿង មិនបានបង់ពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទឆ្នាំ២០២១ ដែលនេះជាតួលខខ្ពស់មួយ និងបង្ហាញពីការធ្វេសប្រហែសរបស់ម្ចាស់យានយន្តគ្រប់ប្រភេទក្នុងការមិនទៅបង់ពន្ធជូនរដ្ឋឱ្យបានទាន់ពេលវេលាកំណត់។
ការរកឃើញយានយន្តមិនបានបង់ពន្ធខាងលើ គឺធ្វើឡើងក្រោយពីសាខាពន្ធដារខេត្តព្រះសីហនុ ដឹកនាំដោយលោក ប៉ែត ចក់ អនុប្រធានសាខាពន្ធដារ និងជាប្រធានក្រុមការងារ តំណាងឲ្យលោក សន ស៊ីផល ប្រធានសាខាពន្ធដារខេត្ត ព្រឹកថ្ងៃទី៧ ខែកុម្ភៈ ឆ្នាំ២០២២កន្លងមកនេះ សហការជាមួយកម្លាំងចម្រុះនៃគណៈបញ្ជាការឯកភាពខេត្តព្រះសីហនុ ចុះត្រួតពិនិត្យ ការបង់ពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទឆ្នាំ២០២១ ត្រង់ចំណុចខាងមុខអតីតមន្ទីរគមនាគមន៍ តាមបណ្តោយវិថីឯករាជ្យស្ថិតក្នុងសង្កាត់លេខ០២ ក្រុង/ខេត្តព្រះសីហនុ ។
លោក ប៉ែត ចក់ អនុប្រធានសាខាពន្ធដារខេត្តព្រះសីហនុ បានឲ្យដឹងថា ការដឹកនាំកម្លាំងចម្រុះនៃគណៈបញ្ជាការឯកភាពខេត្តត្រូវបានធ្វើឡើងតាមការណែនាំរបស់ឯកឧត្តម គួច ចំរើន អភិបាលខេត្តព្រះសីហនុក៏ដូចជាការណែនាំពីអគ្គនាយកដ្ឋានពន្ធដារ ស្តីពីការចុះត្រួតពិនិត្យការប្រមូលពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទសម្រាប់ឆ្នាំ(២០២១-២០២២) ។
លោកថា ការត្រួតពិនិត្យនេះ ដើម្បីពង្រឹងលើច្បាប់ស្តីពីសារពើពន្ធ និងអនុលោមភាពនៃការបង់ពន្ធលើមធ្យោបាយយានយន្តគ្រប់ប្រភេទ ដោយចាប់ផ្តើមអនុវត្តចាប់តាំងពីថ្ងៃទី១ ខែកុម្ភៈ ឆ្នាំ២០២២ ។
ម្ចាស់យានយន្តដែលមិនទាន់បានបង់ពន្ធ សូមអញ្ជើញទៅបង់ពន្ធនៅតាមកន្លែងដែលកម្លាំងចម្រុះបានចុះធ្វើការឬក៏ពេលដែលកម្លាំងចម្រុះត្រួតពិនិត្យនៅតាមដងផ្លូវឃើញយានយន្តមិនទាន់បានបង់ពន្ធធ្វើឲ្យមានការយឺតយ៉ាវនិងខាតពេលវេលា ។
លោកប្រធានក្រុមការងារបានឲ្យដឹងបន្ថែមទៀតថា ឆ្លើយតបតាមការប្រកាសរបស់អគ្គនាយកដ្ឋានពន្ធដារឲ្យម្ចាស់យានយន្តនិងយានជំនិះគ្រប់ប្រភេទចូលខ្លួនបង់ពន្ធចាប់ផ្តើមពីថ្ងៃទី១ ខែមិថុនា រហូតដល់ថ្ងៃទី៣០ ខែវិច្ឆិកា ជារៀងរាល់ឆ្នាំ ដើម្បីកុំឲ្យខកខានក្នុងការបង់ពន្ធឲ្យបានទាន់ពេលវេលាដែលអគ្គនាយកដ្ឋានពន្ធដារបានកំណត់និងដើម្បីចៀសវាងការផាកពិន័យ ។
លោកអនុប្រធានសាខាពន្ធដារខេត្តព្រះសីហនុ និងជាប្រធានក្រុមការងារដឹកនាំកម្លាំងចម្រុះចុះត្រួតពិនិត្យយានយន្តដែលមិនទាន់បានបង់ពន្ធផ្លូវបានបញ្ជាក់ឲ្យដឹងជាចុងក្រោយថា នៅក្នុងការត្រួតពិនិត្យថ្ងៃដំបូងជាលទ្ធផលកម្លាំងចម្រុះបានរកឃើញយានយន្តដែលមិនបានបង់ពន្ធផ្លូវសរុបចំនួន៦១គ្រឿង ក្នុងនោះរថយន្តប្រភេទដឹកទំនិញចំនួន២៨គ្រឿង និងរថយន្តប្រភេទទេសចរណ៍ចំនួន៣៣គ្រឿង ៕
ចែករំលែកព័តមាននេះ