ខេត្តបាត់ដំបង ថ្ងៃទី8 ខែកក្កដា ៖ ថ្ងៃនេះ ក្រុមហ៊ុនភេសជ្ជៈកម្ពុជា (កូកា-កូឡា) បានចាប់រង្វាន់ចុងក្រោយ សម្រាប់កម្មវិធីអាពាហ៍ពិពាហ៍ 2016 ដោយផ្តល់រង្វាន់ដល់គូស្រករ24គូ ដែលមានសំណាងឈ្នះរង្វាន់ពីកម្មវិធីនេះ គឺដើម្បីជួយឱ្យពួកគេត្រៀមខ្លួនសម្រាប់ជីវិតអាពាហ៍ពិពាហ៍ថ្មោងថ្មីរបស់ខ្លួន។
អ្នកឈ្នះទាំង24គូ បន្ថែមលើគូស្វាមីភរិយាថ្មីដែលទើបនឹងរៀបមង្គលការ 48គូផ្សេងទៀតដែលបាន ឈ្នះការចាប់រង្វាន់លើកទី1 និងលើកទី2 កន្លងទៅ ក្នុងឆ្នាំនេះពីកម្មវិធីរបស់ក្រុមហ៊ុនភេសជ្ជៈកម្ពុជា (កូកា-កូឡា)។ អ្នកឈ្នះទាំងអស់ដែលមានសំណាងក្នុងការចាប់រង្វាន់ក្នុងចំណោមស្វាមីភរិយារាប់ពាន់គូនោះ បានឈ្នះរង្វាន់ដូចជា ៖ ម៉ូតូ ទូរស័ព្ទស្មាតហ្វូន ម៉ាស៊ីនបោកសម្លៀកបំពាក់ ទូទឹកកក និងម៉ាស៊ីនថត ដែលប្រារព្ធធ្វើឡើងនៅឯផ្សារទំនើបបុរីថ្មី។
នេះជាឆ្នាំទី3 នៃកម្មវិធីអាពាហ៍ពិពាហ៍ប្រចាំឆ្នាំ ដែលផ្តល់ជូនដល់គូស្វាមីភរិយាទាំងអស់ឱ្យទទួលបានកាដូភ្លាមៗនូវដំណើរកម្សាន្តក្រេបទឹកឃ្មុំរយៈពេល២យប់៣ថ្ងៃ គូប៉ុងសម្រាប់ចាក់សាំង គូប៉ុងសម្រាប់ពិសាភីហ្សា និងធុងទឹកកក កូកា-កូឡា ដ៏ស្រស់ស្អាត។
ការចាប់រង្វាន់លើកទី1 បានធ្វើនៅភ្នំពេញ ក្នុងខែមករា និងលើកទី2 នៅខេត្តសៀមរាប ក្នុងខែមេសា។ ក្នុងខែមិថុនា ក្រុមហ៊ុនភេសជ្ជៈកម្ពុជា (កូកា-កូឡា) បានពន្យាកម្មវិធីចាប់រង្វាន់របស់ខ្លួនទៅខែបន្ទាប់ ដើម្បីឆ្លើយតបនឹងការចូលរួមដ៏ច្រើនលើសលប់ពីសំណាក់អតិថិជន។
កញ្ញា ឡាវ ស្រីដែត ប្រធានផ្នែកទីផ្សារក្រុមហ៊ុនភេសជ្ជៈកម្ពុជា (កូកា-កូឡា) មានប្រសាសន៍ថា «ការធ្វើកម្មវិធីនៅឆ្នាំនេះ គឺដូចឆ្នាំកន្លងទៅ គឺយើងទទួលបានជោគជ័យយ៉ាងសម្បើម ទាំងអតិថិជន និងទាំងក្រុមហ៊ុន។ យើងបានក្លាយជាផ្នែកមួយក្នុងពិធីមង្គលការអស់រយៈពេលជាង3ឆ្នាំមកហើយ និងបានផ្តល់រង្វាន់ដល់ស្វាមីភរិយាថ្មីរាប់រយគូផងដែរ ហើយពេលនេះ យើងកំពុងតែរង់ចាំមើលពីភាពរីករាយនៃស្វាមី ភរិយាថ្មីជាច្រើនគូបន្ថែមទៀតជាមួយនឹងរង្វាន់ដ៏រំភើបអស្ចារ្យជាច្រើនសម្រាប់កម្មវិធីបន្តបន្ទាប់របស់យើង»។
កម្មវិធីនេះ ផ្តល់ឱកាសដល់គូស្វាមីភរិយាដែលរៀបអាពាហ៍ពិពាហ៍ ឬមានគម្រោងរៀបអាពាហ៍ពិពាហ៍ ចាប់ពីថ្ងៃទី1 ខែតុលា ឆ្នាំ2015 ដល់ថ្ងៃទី30 ខែមិថុនា ឆ្នាំ2016 ។ ដើម្បីចូលរួមកម្មវិធីពិសេសនេះបាន ដោយគ្រាន់តែជាវផលិតផលចម្រុះចំនួន25កេស ដូចជា កូកា-កូឡា ស្ព្រៃ ហ្វាន់តា ស្វិប និង ទឹកពិសាដាសានី ឫុក៏កូកា-កូឡា .5លីត្រ ចំនួន15យួរ និងទឹកពិសាដាសានីចំនួន20យួរ។ ផលិតផលទាំងអស់ដែលបានជាវត្រូវតែស្ថិតនៅក្នុងវិក្កយបត្រតែមួយ។
ចែករំលែកព័តមាននេះ