រាជធានីភ្នំពេញ ៖ សមាគមអ្នកជំនាញផ្នែកលក់កម្ពុជា កាលពីថ្ងៃទី៩ កក្កដា បានរៀបចំសិក្ខាសាលាមួយស្តីពី «យុទ្ធសាស្ត្រលក់ក្នុងសតវត្សន៍ទី២១» ជូនទៅដល់ម្ចាស់អាជីវកម្ម បុគ្គលិកជំនាញផ្នែកលក់ប្រមាណ៤០០នាក់។
រាជធានីភ្នំពេញ ៖ សមាគមអ្នកជំនាញផ្នែកលក់កម្ពុជា កាលពីថ្ងៃទី៩ កក្កដា បានរៀបចំសិក្ខាសាលាមួយស្តីពី «យុទ្ធសាស្ត្រលក់ក្នុងសតវត្សន៍ទី២១» ជូនទៅដល់ម្ចាស់អាជីវកម្ម បុគ្គលិកជំនាញផ្នែកលក់ប្រមាណ៤០០នាក់។ ពិធីនេះ ប្រារព្ធធ្វើឡើងនៅអគារសហប្រតិបត្តិការកម្ពុជា-កូរ៉េ ដោយមានការចូលរួមជាកិត្តិយសពីលោក គង់ ចំរើនរដ្ឋា ប្រធានសមាគមអ្នកអាជីពផ្នែកលក់កម្ពុជា រួមប្រធានក្រុមហ៊ុនជាច្រើនផ្សេងទៀត ចែករំលែកពីវិធីសាស្ត្រលក់ក្នុងសតវត្សន៍ទី២១។
លោក គង់ ចំរើនរដ្ឋា ប្រធានសមាគមអ្នកអាជីពផ្នែកលក់កម្ពុជា បានមានប្រសាសន៍ថា សិក្ខាសាលានេះរៀបចំឡើងក្នុងគោលបំណងចែករំលែកបទពិសោធន៍ដល់ម្ចាស់អាជីវកម្ម បុគ្គលិកអាជីពផ្នែកលក់ និងអ្នកចាប់អារម្មណ៍បើកអាជីវកម្មថ្មីៗទាំងអស់ពីយុទ្ធសាស្ត្រដែលពួកគាត់ត្រូវប្រើប្រាស់នាពេលបច្ចុប្បន្នដើម្បីឱ្យផលិតផលរបស់ពួកគាត់លក់ដាច់ ក៏ដូចជាបច្ចេកវិទ្យាមួយចំនួនក្នុងការទំនាក់ទំនងអតិថិជនដើម្បីបង្កើតនូវឱកាសលក់ និងអាចលក់លើទីផ្សារប្រកួតប្រជែងបាន។
លោកបន្ថែមថា សមាគមអ្នកជំនាញផ្នែកលក់កម្ពុជាបង្កើតឡើងសម្រាប់ប្រជាជនទាំងអស់គ្នាដែលស្រលាញ់ និងធ្វើការងារក្នុងវិស័យផ្នែកលក់ ហើយនៅក្នុងសមាគមមានគោលដៅសំខាន់ចំនួន៣ គឺ១- ចង់អភិវឌ្ឍន៍បុគ្គលិកបម្រើការងារក្នុងផ្នែកលក់ឱ្យមានជំនាញមួយពិតប្រាកដ, ២-ធ្វើយ៉ាងម៉េចឱ្យពួកគាត់មានលទ្ធភាពប្រកួតប្រជែងនៅក្នុងតំបន់ ព្រោះនៅក្នុងទីផ្សារផ្នែកលក់នៅកម្ពុជាមានចំនួនច្រើន និង៣- ក្តីស្រម៉ៃរបស់យើង គឺយើងនឹងបញ្ជូនពួកគាត់តំណាងកម្ពុជាទៅប្រកួតនៅក្នុងទីផ្សារអន្តរជាតិ ដើម្បីដណ្តើមយកទីផ្សារការងារផ្នែកក្នុងតំបន់អាស៊ាន។
ជាមួយគ្នានោះដែរ ឆ្លងតាមការពន្យល់បង្ហាញ និងការចោទឆ្លើយរវាងអ្នកចូលរួម និងវាគ្មិនលោក សេង តុលា ជាអ្នកគ្រប់គ្រងទូទៅរបស់ក្រុមហ៊ុន Priority Group និងជានាយកទីផ្សារនៃសមាគមអ្នកជំនាញផ្នែកលក់កម្ពុជា ក៏បានលើកឡើងថា សិក្ខាសាលានេះ ពិតជាបានចូលរួមចំណែកមួយក្នុងការផ្តល់នូវចំណេះដឹង និងអាចជួយឲ្យអ្នកចូលរួមកាន់តែមើលឃើញច្បាស់ពីសារសំខាន់នៃតួនាទី និងអាជីពរបស់អ្នកជំនាញផ្នែកលក់ជាដៃគូយុទ្ធសាស្ត្រក្នុងការជួយឲ្យសា្ថប័នដំណើរការកាន់តែរីកចំរើនជានិរន្តរ៕
ចែករំលែកព័តមាននេះ