ប្រទេសអ៊ុយក្រែន ៖ ប្រធានាធិបតីអាមេរិកលោកចូបៃដិន បានបដិសេធរាល់ការបញ្ជូនកងទាហានអាមេរិក ទៅកាន់អ៊ុយក្រែនក្នុងករណីមានការវាយលុក របស់រុស្សុីចូលប្រទេសនោះ តែទាហានអាមេរិកមានដាក់ពង្រាយនៅទីនោះរួចមកហើយ រួចមន្ទីរប៉ង់តាហ្គោនអាចត្រូវដកទាហានទាំងនោះចេញ។
តាមពិតទៅវត្តមានកងទាហានអាមេរិកនៅអ៊ុយក្រែន មិនមែនជារឿងថ្មីនោះឡើយ ដោយចាប់តាំងពីឆ្នាំ២០១៥មក ពួកទាហានបំរុងនៃកងកម្លាំងឆ្មាំជាតិអាមេរិក បានដូរវេនគ្នាបន្តបន្ទាប់ ដើម្បីជួយបណ្ដុះបណ្ដាលដល់កងទ័ពអ៊ុយក្រែន រួមជាមួយកងទាហាននៃប្រទេសដទៗទៀតជាសមាជិកអូតង់ ពិសេសទាហានកាណាដានិងអាល្លឺម៉ង់។
ទាហានបំរុងនៃកងឆ្មាំជាតិរដ្ឋផ្លរីដាប្រមាណជា២០០នាក់ បានមកដល់មជ្ឈមណ្ឌលហ្វឹកហ្វឺនអន្តរជាតិYAVORIV ភាគខាងលិចអ៊ុយក្រែន ដើម្បីចូលរួមក្នុងបេសកកម្មបណ្ដុះបណ្ដាលមួយ និងជួយដល់កងទ័ពអ៊ុយក្រែន។ ទាហានទាំងនោះបច្ចុប្បន្នដាក់ពង្រាយនៅអ៊ុយក្រែន ក្នុងក្របខណ្ឌនៃបេសកកម្មនេះ។
អ្នកនាំពាក្យមន្ទីរប៉ង់តាហ្គោន លោកJOHN KIRBYអះអាងនាថ្ងៃទី១៨មករាថា យើងនឹងបន្តពិនិត្យសភាពការណ៍នៅលើទីលាន ហើយពិចារណាលើសេចក្ដីសម្រេចនានាដែលត្រូវធ្វើ ដើម្បីការពារកងទាហានយើង។ ចំណែកសេតវិមានវាយតមៃ្លកាលពីថៃ្ងទី១៩មករាថា រុស្សុីអាចវាយប្រហារលើអ៊ុយក្រែនគ្រប់ពេល។
មជ្ឈមណ្ឌលYAVORIV ស្ថិតនៅចុងខាងលិចអ៊ុយក្រែន ចម្ងាយត្រឹមប្រមាណជា១៥គីឡូម៉ែត្រប៉ុណ្ណោះ ពីព្រំដែនប៉ូឡូញហើយបណ្ដាទាហានអាមេរិកនៅទីនោះ ហាក់ពុំមានហានិភ័យភ្លាមៗឡើយ ក្នុងករណីមានការវាយលុករបស់រុស្សុីលើអ៊ុយក្រែនបើប្រទេសនេះហានចូលជាសមាជិកអូតង់។
យោងតាមពួកលោកខាងលិចថា រុស្សុីបានប្រមូលផ្ដុំទ័ពជាង១០០.០០០នាក់នៅជិតព្រំដែនជាមួយអ៊ុយក្រែន។ កងទ័ពរុស្សុីម្យ៉ាងទៀតបានលើមកកាន់បេឡារុស មានព្រំដែនជាប់អ៊ុយក្រែនដែរ ដែលតាមផ្លូវការថាមកធ្វើសមយុទ្ធយោធានៅទីនោះ។
ក្រៅពីពួកទាហានបម្រុងអាមេរិកក៏មានដាក់ពង្រាយកងទាហានពិសេសនៅអ៊ុយក្រែនដែរ ចូលរួមក្នុងការបណ្ដុះបណ្ដាលកងកម្លាំងពិសេសអ៊ុយក្រែន តែអាមេរិកមិនលាតត្រដាងពីចំនួនទាហានប្រភេទនេះនៅអ៊ុយក្រែនឡើយ៕ ដកស្រង់ចេញពីវេបសាយ ៖ yahoo
ចែករំលែកព័តមាននេះ