ទំហំទុនវិនិយោគ ១១ ខែ ឆ្នាំ ២០២១ មាន ២៣០០លានដុល្លារ
- ភ្នំពេញ
រាជធានីភ្នំពេញ ៖ ក្នុងរយៈ ១១ ខែឆ្នាំ ២០២១ នេះ ក្រុមប្រឹក្សាអភិវឌ្ឍន៍កម្ពុជា បានអនុម័តលើគម្រោងថ្មី និងគម្រោងពង្រីកផលិតកម្មសរុបចំនួន…
រាជធានីភ្នំពេញ ៖ ក្នុងរយៈ ១១ ខែឆ្នាំ ២០២១ នេះ ក្រុមប្រឹក្សាអភិវឌ្ឍន៍កម្ពុជា បានអនុម័តលើគម្រោងថ្មី និងគម្រោងពង្រីកផលិតកម្មសរុបចំនួន ១៦៤ គម្រោងដែលមានទុនវិនិយោគសរុបប្រមាណ ៤ ពាន់លានដុល្លារអាមេរិក និងបង្កើតការងារបានប្រមាណជាង ១២ ម៉ឺនកន្លែង តែបើប្រៀបធៀបនឹងរយៈដូចគ្នាក្នុងឆ្នាំ ២០២០ គម្រោងវិនិយោគបានថយចុះប្រមាណជា ៣ ពាន់លានដុល្លារអាមេរិក ដោយសារតែឆ្នាំ ២០២០ មានគម្រោងធំៗបានបោះទុនវិនិយោគ ដូចជាគម្រោងរបស់ក្រុមហ៊ុនណាហ្កា ដែលមានទឹកប្រាក់រហូតដល់ ៣៥០០ លានដុល្លារអាមេរិក ។
លោក ជា វុទ្ធី អគ្គលេខាធិការរងក្រុមប្រឹក្សាអភិវឌ្ឍន៍កម្ពុជា បាននិយាយថា បើដកតួលេខវិនិយោគដ៏ធំរបស់ក្រុមហ៊ុនណាហ្គា ៣៥០០ លានដុល្លារចេញ ឃើញថាចំណែកនៃវិស័យឧស្សាហកម្មកម្មន្តសាល មានការកើនឡើងគួរជាទីកត់សម្គាល់ គឺប្រមាណជា ៤៣ភាគរយបើធៀបនឹងឆ្នាំ ២០២០ ក្នុងនោះឆ្នាំ ២០២០ រយៈពេល ១១ ខែ ។
«១១ ខែ ឆ្នាំ ២០២០ មានទុនប្រមាណ ១២០០ លានដុល្លារអាមេរិក តែឆ្នាំ ២០២១ មានរហូតដល់ ១៨០០ លានដុល្លារអាមេរិក ជាពិសេសកំណើនក្នុងការបោះទុនវិនិយោគនៅក្នុងតំបន់សេដ្ឋកិច្ច មានកើនឡើងយ៉ាងគំហុក ដោយក្នុងឆ្នាំ ២០២០ មានតែ ២២៣លានដុល្លារប៉ុណ្ណោះ ហើយនៅក្នុងឆ្នាំ ២០២១ រយៈពេល ១១ ខែនេះយើងមានរហូតដល់ ២៣០០ លានដុល្លារអាមេរិក» នេះជាការបញ្ជាក់របស់លោក ជា វុទ្ធី ។ លោកថា កំណើននេះ ដោយសារតែវត្តមានគម្រោងធំៗបោះទុនវិនិយោគនៅក្នុងតំបន់សេដ្ឋកិច្ចពិសេស ដូចជាគម្រោងរោងចក្រផលិតកង់រថយន្តដែលកំពុងដាក់ដំណើរការ និងនាំចេញ មានទឹកប្រាក់ប្រមាណ ៣៥០ លានដុល្លារអាមេរិកនោះ ។
លោក ប៉ូ អាវគង់ នាយកប្រតិបត្តិក្រុមហ៊ុនអចលនទ្រព្យ Advance បានឱ្យដឹងថា ក្នុងវិបត្តិកូវីដ ១៩ វិស័យឧស្សាហកម្មបានដើរតួនាទីយ៉ាងសំខាន់ ក្នុងការផ្ដល់ឱកាសការងារដល់កម្មករនិយោជិតកម្ពុជា ខណៈវិស័យមួយចំនួនទៀតបានបញ្ឈប់ការងារដល់កម្មករនិយោជិតជាច្រើនព្រោះតែអត់មានតម្រូវការ ។
លោកបន្តថា អ្នកវិនិយោគជាច្រើននៅតែបន្តស្វែងរកទីតាំងសម្រាប់វិនិយោគរបស់ខ្លួននៅក្នុងប្រទេសកម្ពុជាដោយពួកគេបានស្វែងរកដីសម្រាប់សង់រោងចក្រ សង់ឃ្លាំង សម្រាប់ស្តុកទំនិញមុននាំចេញ ដែលធ្វើឱ្យសកម្មនៃការទិញលក់ដីធ្លី និងជួលសម្រាប់ឧស្សាហកម្មរោងចក្រនៅតែមានកំណើនក្នុងវិបត្តិធ្ងន់ធ្ងរឆ្នាំ ២០២១ នេះ ៕
ចែករំលែកព័តមាននេះ