រាជធានីភ្នំពេញ ៖ កម្ពុជាទើបតែឈានដល់ការបើកប្រទេសឡើងវិញ ក្រោយពីមានការផ្ទុះឆ្លងជំងឺកូវីដ ១៩ ចុងក្រោយដែលបានដាក់ឈ្មោះថាព្រឹត្តិការណ៍ ២០ កុម្ភៈ ឆ្នាំ ២០២០…
រាជធានីភ្នំពេញ ៖ កម្ពុជាទើបតែឈានដល់ការបើកប្រទេសឡើងវិញ ក្រោយពីមានការផ្ទុះឆ្លងជំងឺកូវីដ ១៩ ចុងក្រោយដែលបានដាក់ឈ្មោះថាព្រឹត្តិការណ៍ ២០ កុម្ភៈ ឆ្នាំ ២០២០ ដែលបានអូសបន្លាយជាង ១ ឆ្នាំនោះ ។ ប៉ុន្តែថ្មីៗនេះសកលលោកបានបារម្ភពីវត្តមានមេរោគកូវីដ ១៩ បំប្លែងថ្មីអូមីក្រុង ។ នៅកម្ពុជា ក៍បានរកឃើញស្ត្រីជនជាតិខ្មែរម្នាក់ ដែលទើបត្រឡប់មកពីប្រទេសហ្គាណា មានផ្ទុកវីរុសបំប្លែងថ្មីនេះដែរ ។ ទោះយ៉ាងណាទាំងថ្នាក់ដឹកនាំ និងអ្នកសេដ្ឋកិច្ចមានជំនឿថា វត្តមានវីរុសកូវីដ ១៩ បំប្លែងថ្មីនេះទំនងមិនអាចបំផ្លាញសង្គម និងសេដ្ឋកិច្ចកម្ពុជានោះឡើយ ។
សម្ដេចតេជោ ហ៊ុន សែន បានថ្លែងនៅក្នុងពិធីសម្ពោធសណ្ឋាគារមួយនៅរាជធានីភ្នំពេញ កាលពីព្រឹកថ្ងៃទី ១៥ ខែធ្នូ ឆ្នាំ ២០២១ ថា វត្តមានមេរោគកូវីដ ១៩ អូមីក្រុង ១ ករណីលើស្ត្រីជនជាតិខ្មែរមកពីប្រទេសហ្គាណា នោះមិនគួរណានាំគ្នាភ័យស្លន់ស្លោនោះទេ តែត្រូវបង្កើនការប្រុងប្រយ័ត្ន ។
សម្ដេចបញ្ជាក់ថា កម្ពុជាទើបតែប្រកាសបើកទទួលទេសចរឡើងវិញ ហើយនៅពេលគេស្លន់ស្លោនៅខាងក្រៅ ធ្វើឱ្យវិធានការប្រទេសទាំងនោះ ត្រូវរឹតបន្តឹងជាថ្មីហើយយើងមិនអាចទទួលបានភ្ញៀវទេសចរដែរ ។ «ខ្ញុំបានលុបចោលវិញចំពោះការហាមឃាត់ការធ្វើដំណើរបស់ពលរដ្ឋមកពីតំបន់អាហ្វ្រិក ដើម្បីបើកទូលាយដល់ប្រជាជនប្រទេសជាច្រើនចូលមកកម្ពុជា» ។ ប្រមុខរដ្ឋាភិបាលបញ្ជាក់ថា ស្ត្រីដែលមានផ្ទុកកូវីដ ១៩ ប្រភេទអូមីក្រុង នឹងជាវិញនៅពេលឆាប់ៗនេះ ពីព្រោះគាត់បានចាក់វ៉ាក់សាំងរួចហើយ ប្រភេទវ៉ាក់សាំចនសុន & ចនសុន ។ សុខភាពគាត់ក៏ធម្មតា អត់មានអ្វីប្លែកទេ តែអ្វីដែលបារម្ភ គឺទារកក្នុងផ្ទៃរបស់ស្ត្រីនោះ ដូច្នេះក្រុមគ្រូពេទ្យត្រូវយកចិត្តទុកដាក់ខ្ពស់ចំពោះអ្នកជំងឺរូបនេះ ។
លោក គី សេរីវឌ្ឍន៍ អ្នកសិក្សាស្រាវជ្រាវពីសេដ្ឋកិច្ចនៅកម្ពុជា បាននិយាយថា អូមីក្រុង មកដល់កម្ពុជា គឺជារឿងមួយដែលគួរប្រុងប្រយ័ត្ន ហើយហានិភ័យនៃការឆ្លងរាលដាលក៏មានដែរ បើពុំមានវិធានការការពារ និងការចូលរួមទាំងអស់គ្នា ។ យ៉ាងណាក្ដី លោកជឿជាក់ថា តាមរយៈបទពិសោធន៍នៃព្រឹត្តិការណ៍សហគមន៍ ២០ កុម្ភៈ ២០២១ កន្លងទៅ រាជរដ្ឋាភិបាលនឹងមានវិធានការ និងចំណាត់ការក្នុងការទប់ស្កាត់មេរោគនេះមិនឱ្យរាលដាល និងធ្វើឱ្យប៉ះពាល់ដល់សេដ្ឋកិច្ចធំធេងដូច ២០ កុម្ភៈ ២០២១ ។
«ទន្ទឹមនឹងនេះដែរ ក៏ត្រូវមានការចូលរួមទាំងអស់គ្នាដើម្បីទប់ស្កាត់នូវមេរោគ ប្រភេទថ្មីនេះកុំឱ្យឆ្លងរាលដាលធំ ដោយក្នុងនោះអាជ្ញាធរត្រូវអប់រំពលរដ្ឋបន្ថែមពីមេរោគមួយនេះ ហើយពលរដ្ឋខ្លួនឯងក៏ត្រូវតែបង្កើនការប្រុងប្រយ័ត្នឱ្យបានខ្លាំងជាងមុន ត្រូវបង្កើនការអនុវត្តន៍វិធានការអនាម័យរបស់ក្រសួងសុខាភិបាល» ។
រាជរដ្ឋាភិបាលទើបតែបានប្រកាសពីការបើកប្រទេសឡើងវិញ ក្រោយពេលពីបានរឹតបន្តឹងអស់រយៈពេលជិត ២ ឆ្នាំ ហើយក្រោយពេលបើកប្រទេសបានប្រមាណជាង ១ ខែ ស្ថានភាពសេដ្ឋកិច្ចរបស់ខ្លួនក៏ឃើញថា មានសកម្មភាពល្អប្រសើរឡើងវិញ ដែលអាចជំរុញឱ្យកំណើនសេដ្ឋកិច្ចក្នុងឆ្នាំ ២០២១ អាចនឹងសម្រេចបានលើស ២,៤% ៕
ចែករំលែកព័តមាននេះ