ភ្នំពេញ-កំពង់ធំ-ព្រះវិហារ-ស្ទឹងត្រែង ៖ បេសកកម្មនៃការស្វែងយល់អំពីរមណីយដ្ឋានបេតិកភណ្ឌពិភពលោករបស់កម្ពុជា ក្នុងរយៈចម្ងាយប្រមាណជាង១.៥០០គីឡូម៉ែត្រ ដែលបានចាប់ផ្តើមនៅភ្នំពេញ កាលពីរសៀលថ្ងៃទី១៣ ឧសភា ដល់យប់ថ្ងៃទី១៥ ឧសភា ២០១៦ កន្លងមកនេះ ត្រូវបានបញ្ចប់ដោយជោគជ័យជាស្ថាពរនៅខេត្តស្ទឹងត្រែង ជាប់ព្រំទល់ឡាវ ជាមួយនឹងការប្រើប្រាស់រថយន្តស៊េរីថ្មីដ៏ទំនើបម៉ាក Mercedes-Benz ម៉ូដែល គឺ GL 400 4MATIC និង GLA 250 4MATIC ដែលមានតម្លៃប្រមាណជាង៣០ម៉ឺនដុល្លារអាមេរិក ដែលត្រូវបានឧបត្ថម្ភទាំងស្រុងដោយក្រុមហ៊ុន ស្តារ អូតូ (ខេមបូឌា) លីមីតធីត ដែលជាក្រុមហ៊ុនតែមួយគត់ទទួលបានសិទ្ធិនាំចូល និងចែកចាយលក់ផ្តាច់មុខនូវគ្រប់ប្រភេទរថយន្តម៉ាក Mercedes-Benz ប្រចាំនៅកម្ពុជា ពីក្រុមហ៊ុនដើមឈ្មោះ Daimler AG (ឌែមលើ អេជី) នៅប្រទេសអាល្លឺម៉ង់។
លោក ឃុន ចាន់ថា ដែលជានាយកគ្រប់គ្រងផ្នែកលក់ និងទីផ្សារនៃក្រុមហ៊ុន ស្តារ អូតូ (ខេមបូឌា) បានបញ្ជាក់ឲ្យដឹងថា បេសកកម្មនៃការស្វែងយល់អំពីរមណីយដ្ឋានបេតិកភណ្ឌពិភពលោករបស់កម្ពុជា ក្នុងរយៈពេលបីថ្ងៃជាមួយរថយន្តប្រណីត Mercedes-Benz នេះ បានឆ្លងកាត់តំបន់រមណីយដ្ឋានសំខាន់មានដូចជា ប្រាសាទសំបូរព្រៃគុហ៍នៃខេត្តកំពង់ធំ ប្រាសាទកោះកេរ្តិ៍ ប្រាសាទព្រះវិហារនៃខេត្តព្រះវិហារ និងទឹកធ្លាក់ល្បាក់ខោន ស្ថិតក្នុងព្រំប្រទល់នៃខេត្តស្ទឹងត្រែង និងខេត្តព្រះវិហារ ជាប់នឹងព្រំដែនកម្ពុជា-ឡាវ។ បេសកកម្មនេះ ធ្វើឡើងដើម្បី ១-លើកកម្ពស់វិស័យទេសចរណ៍នៃតំបន់បេតិកភណ្ឌពិភពលោករបស់កម្ពុជា ដែលភាគច្រើននៃប្រជាជនក្នុងតំបន់មិនធ្លាប់បានទៅទស្សនានៅឡើយ ដោយសារតែស្ថានភាពផ្លូវភាគច្រើននៅមិនទាន់មានភាពល្អប្រសើរនៅ។ ២-បង្កើតបទពិសោធន៍ថ្មី សម្រាប់អ្នកសារព័ត៌មានឲ្យទទួលបាននូវចំណេះដឹងថ្មីៗអំពីការប្រើប្រាស់រថយន្ត Mercedes-Benz ក្នុងការបើកបរលើស្ថានភាពផ្លូវលំបាកៗ និងដើម្បីបង្ហាញឲ្យកាន់តែច្បាស់អំពីបច្ចេកវិទ្យាដ៏ទំនើបចុងក្រោយរបស់រថយន្ត Mercedes-Benz ជូនដល់អតិថិជនឲ្យឈប់បារម្ភពីការប្រើប្រាស់រថយន្តប្រភេទ SUV ដូចជា រថយន្ត GL 400 4MATIC និង GLA 250 4MATIC តទៅទៀត ហើយសូមកុំប្រើរថយន្តប្រភេទនេះតែនៅទីក្រុង ឬតែនៅលើផ្លូវល្អរាបស្មើ ប៉ុន្តែសូមអតិថិជនបើកបររថយន្តទាំងនោះលើគ្រប់ស្ថានភាពផ្លូវនៅកម្ពុជា ទោះជាការបើកបរក្នុងស្ថានភាពពេលមានភ្លៀងធ្លាក់ខ្លាំង មានផ្លូវរអិល ឬលើផ្លូវដីហុយ ផ្លូវមានផុក ផ្លូវលិចទឹក ផ្លូវគ្រហុកតូចធំ ផ្លូវមានទឹកដក់ ផ្លូវឡើងចុះចំណោតខ្ពស់ទាបៗ ផ្លូវមានគ្រួស ផ្លូវដីក្រហម និងផ្លូវមានក្រាលដុំថ្មតូចធំជាដើម។
ហេតុដូច្នេះទើបក្រុមហ៊ុន ស្តារ អូតូ ខេមបូឌា បានបង្កើតកម្មវិធីនេះឡើង និងបានអញ្ជើញអ្នកសារព័ត៌មានមកពីស្ថាប័នផ្សេង ឲ្យបើកបររថយន្តទាំងនោះដោយផ្ទាល់ក្នុងកាលៈទេសៈលំបាកៗប្រកបដោយភាពភ្ញាក់ផ្អើលជាមួយនឹងបច្ចេកវិទ្យាដែលរថយន្តអាចបើកបរដោយខ្លួនឯងក្នុងការឡើងចំណោត និងចុះចំណោត ពិសេសនៅតំបន់ប្រាសាទព្រះវិហារដែលជាទីមានចំណោតខ្ពស់បំផុត ដែលស្ទើរតែគ្រប់រថយន្តដែលបានធ្វើដំណើរដល់ទីនោះមិនហ៊ានប្រថុយក្នុងការបើកបរឡើងទៅដល់កំពូលនៃប្រាសាទឡើយ ប៉ុន្តែជាមួយរថយន្ត Mercedes-Benz GL 400 4MATIC និង GLA 250 4MATIC បើកឡើងប្រុយៗ អត់ដឹងថា ឡើងខ្ពស់ខ្លាំង ឬចុះចំណោតខ្លាំងអីនោះទេ។ រឹតតែពិសេសជាងនេះទៅទៀតនោះ នៅពេលដែលបើកបរលើផ្លូវដែលមានជង្ហុក និងដុំថ្មធំៗ គឺរថយន្តប្រើប្រព័ន្ធកាំមេរ៉ា៣៦០ ដឺក្រេ និងប្រព័ន្ធកាពីតាស់ ដោយស្វ័យប្រវត្តិដែលបានបង្ហាញរូបភាពច្បាស់ៗពីស្ថានភាពផ្លូវ ងាយស្រួលក្នុងការបើកបរ។ រីឯកៅអីរថយន្តវិញ ក៏មានប្រព័ន្ធម៉ាស្សាដែលផ្តល់នូវថាមពលបន្ថែម និងជួយកាត់បន្ថយការនឿយហត់ ហើយនូវផ្តល់ផាសុកភាពយ៉ាងពិសេស ទោះស្ថិតក្នុងដំណើរផ្លូវជិត ឬឆ្ងាយយ៉ាងណាក៏ដោយ។ ដោយឡែកប្រព័ន្ធមើលភ្លើងពេលយប់វិញ មានពន្លឺភ្លឺសស្ញាច ចាំងបានឆ្ងាយ មិនធ្វើឲ្យចាំងភ្នែកដល់អ្នកបើករ ឬអ្នកថ្មើរជើងដទៃទៀត ដែលកំពុងស្ថិតក្នុងដំណើរផ្លូវស្រប ឬបញ្ច្រាសទិសគ្នាក៏ដោយ។
លោក ឃុន ចាន់ថា បានបញ្ជាក់ឲ្យដឹងដែរថា ក្រោយពីបញ្ចប់បេសកកម្មដែលបានឡើងទៅដល់លើកំពូលភ្នំប្រាសាទព្រះវិហាររួចមក នៅព្រឹកថ្ងៃទី១៥ ឧសភា ២០១៦ រថយន្ត Mercedes-Benz ដ៏ទំនើបស៊េរីថ្មីប្រភេទ SUV ទាំងពីរគ្រឿងនោះ ក៏បានបន្តនាំអ្នកសារព័ត៌មានធ្វើដំណើរចាកចេញពីខេត្តព្រះវិហារ ទៅកាន់តំបន់រមណីយដ្ឋានធម្មជាតិ ទឹកធ្លាក់ព្រះនិម្មិត ដែលមានទីតាំងស្ថិតនៅក្នុងទឹកដីស្រុកឆែប ជាប់ព្រំប្រទល់ជាមួយទឹកដីខេត្តចម្ប៉ាសាក់ របស់ប្រទេសឡាវបន្តទៀត។ ខណៈបានទៅចូលចតដល់ក្នុងរមណីយដ្ឋានទឹកធ្លាក់ព្រះនិមិ្មត ភ្លាមនោះ រថយន្តដ៏ទំនើបស៊េរីថ្មីទាំងពីរគ្រឿងនេះ បានទទួលការចាប់អារម្មណ៍ខ្លាំងពីភ្ញៀវទេសចរទូទៅជាច្រើនដែលបានទៅកម្សាន្តដល់ទីរមណីយដ្ឋាន ដោយអ្នកទេសចរ ភាគច្រើនបានចោមរោមមើល និងសុំថតរូបទុកជាអនុស្សាវរីយ៍ទៀតផង។
ជាមួយនឹងមោទនភាពលើរថយន្ត Mercedes-Benz ដែលក្រុមហ៊ុន Star Auto Cambodia បានទទួលសិទ្ធិនាំចូល និងចែកចាយលក់ផ្តាច់មុខនៅកម្ពុជា ហើយទទួលបានចាប់អារម្មណ៍ខ្លាំងពីសំណាក់មជ្ឈដ្ឋានទូទៅបែបនេះហើយ ទើបលោកឃុន ចាន់ថា បានបង្ហាញពីឆន្ទៈថា លោកនិងក្រុមហ៊ុន នឹងរៀបចំកម្មវិធីបែបនេះឲ្យបានល្អ និងមានទ្រង់ទ្រាយធំជាងនេះទៅទៀត ពិសេសយើងនឹងធ្វើដំណើរទៅកាន់តំបន់ទេសចរណ៍ដ៏ល្បីៗរបស់កម្ពុជា ដែលកំពុងតែទទួលបាននូវការចាប់អារម្មណ៍ខ្លាំងពីសំណាក់ភ្ញៀវទេសចរទូទៅ៕
ចែករំលែកព័តមាននេះ