រាជធានីភ្នំពេញ ៖ សាមសុងនឹងបញ្ចេញទូរស័ព្ទស៊េរីថ្មីនៅក្នុងទីផ្សារប្រទេសកម្ពុជាដោយអេក្រង់ និងប្រអប់មានរូបប្រាសាទអង្គរវត្ត ជាមួយនឹង icon រាងផ្ការំដួល ដើម្បីជាការចូលរួមចំណែករក្សានូវបេតិកភ័ណ្ឌជាតិ និងផ្សព្វផ្សាយវប្បធម៌ខ្មែរឲ្យពិភពលោកទាំងមូលបានស្គាល់កាន់តែច្រើនជាងមុន ។
លោក Seungho Choi អគ្គនាយកក្រុមហ៊ុនសាមសុង ថៃអេឡិចត្រូនិក ប្រចាំនៅកម្ពុជា និងឡាវបានឲ្យដឹងថា៖«ដូចដែលលោកអ្នកបានឃើញនៅពេលនេះ យើងបានរចនាប្រអប់ និងscreen saver របស់សាមសុង J5 និង J7 ឲ្យមានរូបប្រាសាទអង្គរវត្ត ដែលឆ្លុះបញ្ចាំងឲ្យឃើញនូវទូរស័ព្ទមួយដែលមានភ្ជាប់មកជាមួយនូវនិមិត្តរូបជាតិខ្មែរពិតប្រាកដ ហើយយើងចង់ចែករំលែកដល់ប្រជាជនខ្មែរគ្រប់ៗគ្នា» ។
សាមសុង J5 និង J7 មានគែមផលិតពីលោហៈ ហើយមានកាមេរ៉ាក្រោយទំហំ១៣មេហ្កាភិចសែល និងអាភិចឆឺ១,៩ព្រមទាំងភ្លើង (flash) LED ចំណែកឯកាមេរ៉ាមុខវិញមានទំហំរហូតដល់ទៅ៥មេហ្កាភិចសែលព្រមទាំមានភ្លើង (flash) ហើយអាភិចឆឺមាន១,៩ដូចគ្នា ។
លោក Seungho Choi បានបញ្ជាក់បន្ថែមទៀតថា៖«យើងនឹងបរិច្ចាគចំណូលចំនួន១ម៉ឺនរៀលពីការលក់សាមសុង J3, J5, J7 នីមួយៗ និងទូរស័ព្ទសាមសុងដែលមានប្រអប់រូបប្រាសាទអង្គរវត្ត សម្រាប់ការអភិរក្សនិងថែរក្សា ប្រាសាទអង្គរវត្តដែលជាសម្បតិ្តវប្បធម៌របស់ប្រជាជនកម្ពុជា» ។
ទូរស័ព្ទសាមសុង Galaxy J5 (2016 )មានអេក្រង់ Super Amoled ទំហំ៥,២អិុញ ចំណែកឯថ្មវិញមានថាមពលរហូតដល់ទៅ៣១០០mAh ដែលអាចដោះចេញពីទូរស័ព្ទបាន ។ វាមានទំហំ១៤៥,៧មិល្លីម៉ែត្រគុណនឹង៧២,៣មិល្លីម៉ែត្រហើយមានទម្ងន់ត្រឹមតែ១៥៨ក្រាមប៉ុណ្ណោះ ។
ចំណែកឯទូរស័ព្ទសាមសុង Galaxy J7 (2016) មានអេក្រង់ Super Amoled ទំហំ៥,៥អុិញ មានថាមពលថ្មរហូតដល់ទៅ៣១០០mAh ដែលអាចដោះចេញពីទូរស័ព្ទបាន។ វាមានទំហំ១៥១,៧មិល្លីម៉ែត្រគុណនឹង៧៦មិល្លីម៉ែត្រ ហើយមានទម្ងន់ត្រឹមតែ១៦៩ក្រាមប៉ុណ្ណោះ ។ ទូរស័ព្ទទាំង២មានរ៉េម២GB និងអង្គចងចាំរហូតដល់ទៅ១៦GB ហើយអាចដាក់បន្ថែមអង្គចងចាំរហូតដល់ទៅ១២៨GB ។ ទូរស័ព្ទទាំង២នេះសុទ្ធតែអាចប្រើប្រាស់បានស៊ីម២ ហើយនឹងមានវត្តមានក្នុងប្រទេសកម្ពុជានៅថ្ងៃទី១១ ខែឧសភា ឆ្នាំ២០១៦ ដោយមានតម្លៃចន្លោះពី២៥០ដុល្លារទៅ២៩០ដុល្លារប៉ុណ្ណោះ ៕
ចែករំលែកព័តមាននេះ