រាជធានីភ្នំពេញ ៖ អ្នកនាំពាក្យរដ្ឋសភាលោក ឡេង ប៉េងឡុង បានថ្លែងថា អ្នកតំណាងរាស្ត្រគណបក្សសង្គ្រោះជាតិដែលត្រូវតុលាការកោះហៅឲ្យពួកគាត់ចូលទៅបំភ្លឺនោះពួកគាត់មានសិទ្ធិក្នុងការមិនទៅក៏បាន ទៅក៏បានអាស្រ័យលើសាមីខ្លួន ។
ការលើកឡើងរបស់អ្នកនាំពាក្យរដ្ឋសភានេះ ក្រោយពីអ្នកតំណាងរាស្ត្រគណបក្សសង្គ្រោះជាតិ នៅរសៀលថ្ងៃទី៤ ខែឧសភា បានចេញសេចក្តីថ្លែងការណ៍ប្រកាសជំហររបស់ខ្លួនថា តំណាងរាស្ត្រគណបក្សសង្គ្រោះជាតិនឹងមិនទៅតាមដីកាកោះរបស់អយ្យការអមសាលាដំបូងរាជធានីភ្នំពេញ ដែលរំលោភបំពានច្បាប់នោះឡើយ ។
អ្នកនាំពាក្យរដ្ឋសភាបន្តថា «រឿងតុលាការខ្ញុំមិនអាចធ្វើអត្ថាធិប្បាយទេ ព្រោះថាតុលាការជាស្ថាប័នមួយដាច់ដោយឡែកពីរដ្ឋសភា ។ កម្ពុជាមានអំណាចបីដាច់ដោយឡែកពីគ្នា និងជាប្រទេសកាន់លទ្ធិប្រជាធិបតេយ្យ អុីចឹងខ្ញុំចង់និយាយថាអំណាចដាច់ដោយឡែកពីគ្នា »។
ទាក់ទិននឹងអ្នកតំណាងរាស្ត្រដែលកំពុងមានអភ័យឯកសិទ្ធិ តែត្រូវបានតុលាការកោះហៅនោះ ត្រូវបានលោក ឡេង ប៉េងឡុង លើកឡើងថា តុលាការកោះហៅ បើយើងទៅក៏ទៅ បើមិនទៅអាងស្អីក៏អាងទៅ ហើយអនុវត្តច្បាប់រៀងៗខ្លួន ។ ផ្ទុយទៅវិញអ្នកតំណាងរាស្ត្រអាងលើមាត្រា៨០ បើពួកលោកអញ្ជើញទៅក៏អត់មានបញ្ហាអ្វីដែរ ។
លោកបន្ថែមថា ការហៅរបស់តុលាការគេសំអាងតាមហេតុផលរបស់គេ ចំណែកអ្នកតំណាងរាស្ត្រគេមិនទៅគេក៏ចេះច្បាប់ដូច្នេះគេចេះដឹងហើយ ។ រដ្ឋសភាមិនទាន់មានបើកកិច្ចប្រជុំទេ លើករណីក្រុមតំណាងរាស្ត្រគណបក្សសង្គ្រោះជាតិ ដែលត្រូវបានតុលាការកោះហៅជាបន្តបន្ទាប់ ។ បើមានកិច្ចប្រជុំ លុះត្រាតែមានសំណើពីក្រសួងយុត្តិធម៌ និងតុលាការ ។
នៅព្រឹកថ្ងៃទី៤ ខែឧសភា គណបក្សសង្គ្រោះជាតិបានបើកិច្ចប្រជុំគណៈកម្មាធិការអចិន្ត្រៃយ៍មួយដឹកនាំដោយលោក កឹម សុខា ប្រធានស្តីទីគណបក្សនៅទីស្នាក់ការគណបក្ស។ បន្ទាប់កិច្ចប្រជុំ គណបក្សបានចេញសេចក្តីថ្លែងការណ៍មួយដោយលើកឡើងថា ក្រុមសមាជិកសភាគណបក្សសង្គ្រោះជាតិ ស្នើសុំឲ្យបញ្ឈប់ជាបន្ទាន់នូវការចេញដីកាកោះហៅតំណាងរាស្ត្រ ដែលមានអភ័យឯកសិទ្ធិសភាពីសំណាក់ស្ថាប័នតុលាការគ្រប់ជាន់ថ្នាក់ ហើយត្រូវគោរពរដ្ឋធម្មនុញ្ញដែលជាច្បាប់កំពូល និងត្រូវអនុវត្តតាមនីតិវិធីច្បាប់ជាធរមាន ដើម្បីធានាការអនុវត្តច្បាប់ឲ្យបានខ្ជាប់ខ្ជួនស្របតាមគោលការណ៍នៃនីតិរដ្ឋ ។
សេចក្តីថ្លែងការណ៍បន្តថា រាល់ការចេញដីកាកោះហៅតំណាងរាស្ត្រដែលមានអភ័យឯកសិទ្ធិសភា ពីសំណាក់អយ្យការអមសាលាដំបូងរាជធានីភ្នំពេញ គឺជាការប្រើប្រាស់អំណាចដោយរំលោភបំពានយ៉ាងធ្ងន់ធ្ងរលើអភ័យឯកសិទ្ធិសភារបស់តំណាងរាស្ត្រដែលធានាការពារដោយមាត្រា៨០នៃរដ្ឋធម្មនុញ្ញ ។
សូមបញ្ជាក់ថា កាលពីថ្ងៃទី៣ ខែឧសភា កន្លងទៅ លោក សៀង សុខ ព្រះរាជអាជ្ញារងអមសាលាដំបូងរាជធានីភ្នំពេញ បានចេញដីកាកោះហៅអ្នកតំណាងរាស្ត្ររបស់គណបក្សសង្គ្រោះជាតិ(CNRP)ចំនួន២រូបបន្ថែមទៀត ឲ្យទៅបំភ្លឺនៅថ្ងៃទី១៦ ខែឧសភា ពាក់ព័ន្ធនឹងករណីលោក កឹម សុខា ជាមួយកញ្ញា ខុម ចាន់ដារ៉ាទី ហៅស្រីមុំ ។ ក្នុងនោះលោក កឹម សុខា ប្រធានស្តីទីគណបក្សសង្គ្រោះជាតិ ក៏ត្រូវបានតុលាការកោះហៅទៅបំភ្លឺដែរ ។
យោងតាមមាត្រា៨០នៃរដ្ឋធម្មនុញ្ញនៃព្រះរាជាណាចក្រកម្ពុជា ឆ្នាំ១៩៩៣ ចែងថា ការចោទប្រកាន់ ការចាប់ខ្លួន ការឃាត់ខ្លួន ឬការឃុំខ្លួនសមាជិកណាមួយនៃរដ្ឋសភា នឹងអាចធ្វើទៅកើត លុះត្រាតែមានការយល់ព្រមពីរដ្ឋសភា ឬពីគណៈកម្មាធិការអចិន្ត្រៃយ៍របស់រដ្ឋសភា ក្នុងចន្លោះសម័យប្រជុំនៃរដ្ឋសភា វៀរលែងតែក្នុងករណីបទល្មើសព្រហ្មទណ្ឌជាក់ស្ដែង ។ ក្នុងករណីខាងក្រោយនេះ ក្រសួងមានសមត្ថកិច្ចត្រូវធ្វើសេចក្ដីរាយការណ៍ជូនរដ្ឋសភា ឬជូនគណៈកម្មាធិការអចិន្ត្រៃយ៍របស់រដ្ឋសភាជាបន្ទាន់ ដើម្បីសម្រេច ។
សេចក្ដីសម្រេចរបស់គណៈកម្មាធិការអចិន្ត្រៃយ៍រដ្ឋសភា ត្រូវដាក់ជូនសម័យប្រជុំរដ្ឋសភាខាងមុខ ដើម្បីអនុម័តតាមមតិភាគច្រើនពីរភាគបីនៃសមាជិករដ្ឋសភាទាំងមូល ។ ក្នុងករណីទាំងអស់ខាងលើនេះ ការឃុំខ្លួន ការចោទប្រកាន់តំណាងរាស្ត្រណាមួយត្រូវផ្អាក ប្រសិនបើរដ្ឋសភាបានបញ្ចេញមតិឱ្យផ្អាកតាមមតិភាគច្រើនបីភាគបួននៃចំនួនសមាជិករដ្ឋសភាទាំងមូល ៕
ចែករំលែកព័តមាននេះ