បងប្អូនស្រីបង្កើត យកប្តីពីការរស់នៅជាមួយគ្នា ក្នុងជីវភាពក្រីក្របំផុត
ខេត្តកំពង់ឆ្នាំង ៖ ស្តាប់ទៅវាជារឿងគួរថ្កោលទោស ឬដាក់កំហុសដល់បុរសពិការភាពម្នាក់ ដែលរស់ក្នុងសភាពទីទាល់ក្រតែបែរជាមានប្រពន្ធដល់ទៅពីរ
ខេត្តកំពង់ឆ្នាំង ៖ ស្តាប់ទៅវាជារឿងគួរថ្កោលទោស ឬដាក់កំហុសដល់បុរសពិការភាពម្នាក់ ដែលរស់ក្នុងសភាពទីទាល់ក្រតែបែរជាមានប្រពន្ធដល់ទៅពីរ និងប្រពន្ធទាំងពីរក៏ត្រូវជាបងប្អូន នឹងគ្នាទៀតដោយ សង់ខ្ទមនៅជិតគ្នា កសាងក្តីស្នេហាបានកូនសរុបដល់ទៅ១១នាក់ ប៉ុន្តែពេលនេះ បុរសជាប្តីបានធ្លាក់ខ្លួនឈឺ៣ថ្ងៃ ហើយក្រោកពីកន្ទេលមិនរួចដោយជំងឺចុកពេញពោះមិនដឹងកើតរោគអ្វីនោះទេ មិនហ៊ានទៅពេទ្យ ព្រោះគ្មានប្រាក់សូម្បី១០០រៀលដាក់លើផ្ទះ នេះជាព្រហ្មលិខិត ឬ ជាព្រេងវាសនា0x017d7 ។ ទោះយ៉ាងណា នេះជា កម្ម ដែលភាសាបាលីប្រែថាអំពើ ។
គ្រួសារចម្លែកដោយបុរសជាប្តីប្រពន្ធបងផងប្អូនផងនេះ មានទីលំនៅតំបន់សម្លសាប ស្ថិតក្នុងភូមិស្រែអុក ឃុំតាំងក្រសាំង ស្រុកទឹកផុស ។ នៅព្រឹក ថ្ងៃទី២៩ ខែមេសា ភ្នាក់ងារកោះសន្តិភាព បានសុំការអនុញ្ញាតឲ្យលោកមេភូមិ និងលោកស្រី ក្រុមប្រឹក្សាឃុំ ជូនទៅដល់ខ្ទមគ្រួសារខាងលើ ដើម្បីផ្តិតយករូបភាពឲ្យបានជាក់លាក់ ។ តាមការរៀបរាប់របស់ស្ត្រីទាំង២នាក់ ដែលត្រូវជាបងប្អូនបង្កើតនឹងគ្នាយកប្តីមួយពីរនាក់បានឲ្យដឹងថា ស្ត្រីជាបងជាប្រពន្ធទី១ មានឈ្មោះ ជេត ខេង អាយុ៤១ឆ្នាំ បានកូន៥នាក់ កូនបងអាយុ១៧ឆ្នាំ និងស្ត្រីប្អូន ជាប្រពន្ធទី២ មានឈ្មោះ ជេត ខឿន អាយុ៤០ឆ្នាំ មានកូន៦នាក់ កូនបងអាយុ១៨ឆ្នាំ ចំណែកបុរសជាប្តីមានឈ្មោះ អឿន វឿន អាយុ៤៧ឆ្នាំ ពិការជើងខាងឆ្វេង និងភ្នែកម្ខាង។
គាត់ពិការភាពដោយសារជាន់មីន កាលគាត់នៅរកស៊ីកាប់ឈើតាមបន្ទាត់ព្រំដែនខ្មែរថៃ ក្នុងអំឡុងឆ្នាំ១៩៨៨ ។ ប្រភពដដែលបានបន្តថា សព្វថ្ងៃគ្រួសារគាត់ក្រីក្រខ្លាំងណាស់ គ្មានដីស្រែសម្រាប់ធ្វើទេ ខែវស្សាដើរស៊ីឈ្នួលដកស្ទូង និងច្រូតកាត់ឲ្យគេ ចំណែកខែប្រាំងវិញ គឺត្បាញកញ្ជើលក់ដើម្បីចិញ្ជឹមជីវិត។ សព្វថ្ងៃនេះកូនៗមិនបានរៀនសូត្រអ្វីទេ ព្រោះតែភាពក្រីក្រ និងម្យ៉ាងសាលារៀននៅឆ្ងាយជាង៤គីឡូម៉ែត្រ ។ អ្វីដែលពួកគាត់កាន់តែលំបាកទៀតនោះ គ្រាដែលកំពុងតែខ្វះខាតនេះបុរសជាប្តីបានធ្លាក់ខ្លួនឈឺ ចុកក្នុងពោះ មិនអាចងើបពីកន្ទេលបាន មិនដឹងថាជាជំងឺអ្វីនោះទេ ។ពួកគាត់ជាប្រពន្ធទាំងពីរនាក់ បានលើកដៃសំពះសុំអង្វរ ក្តីមេត្តាពីសប្បុរសជន នានាសូមមេត្តាជួយឧបត្ថមដល់គ្រួសារគាត់ផង ព្រោះពេលនេះក្តីលំបាកវេទនាកាន់តែខ្លាំងហើយដោយសារតែប្តីកំពុងមានជំងឺ និងគ្មានប្រាក់យកប្តីទៅមន្ទីរពេទ្យទៀត ។
លោកមេភូមិ ទា សៅ និងលោកស្រីក្រុមប្រឹក្សាឃុំ ចាន់ សុក បាននិយាយដូចគ្នាថា គ្រួសារខាងលើពិតជាក្រីក្រខ្លាំងណាស់ ប្តីប្រពន្ធរួមទាំងកូនៗបង ផងបានស៊ីឈ្នួលធ្វើស្រែ កាប់គាស់គល់ឈើឲ្យគេ និងកាប់ឬស្សី ត្បាញកញ្ជើលក់ ដើម្បីចិញ្ជឹមជីវិត ។ ថ្វីបើគ្រួសារនេះមានប្តី១ពីរនាក់ពិតមែន តែអាជ្ញាធរមូលដ្ឋាន មានក្តីមេត្តា បានដាក់បំបែកឲ្យគាត់ មានពីរគ្រួសារដាច់គ្នា ដើម្បីពេលមានជំនួយមកគឺបានពីរគ្រួសារដែរ ។ ក្នុងនាមពួកគាត់ជាអាជ្ញធរ ភូមិ ឃុំ សូមធ្វើការអំពាវនាវ សុំក្តីមេត្តាពីសប្បុរសជន ជិតឆ្ងាយ សូមជួយគ្រួសារខាងលើនេះផង ពេលនេះពិតជាកំពុងជួបទុក្ខលំបាកខ្លាំងណាស់ សង្ឃឹមថាបងប្អូនពិតជាជួយឧបត្ថម តាមសទ្ឋាជ្រះថ្លា ជួយគ្រួសារក្រីក្រនេះជាពុំខាន ៕
ចែករំលែកព័តមាននេះ