រាជធានីភ្នំពេញ ៖ ជំងឺកូវីដ ១៩ បានជំរុញឲ្យពលរដ្ឋខ្មែរងាកមកទិញសេវាធានារ៉ាប់រងដែលធ្វើឲ្យវិស័យថ្មីមួយនេះ មានសន្ទុះកើនឡើងក្នុងពេលប្រទេសនានាធ្លាក់ចុះ ។ លោក យក់ ចំរើនឬទ្ធិ…
រាជធានីភ្នំពេញ ៖ ជំងឺកូវីដ ១៩ បានជំរុញឲ្យពលរដ្ឋខ្មែរងាកមកទិញសេវាធានារ៉ាប់រងដែលធ្វើឲ្យវិស័យថ្មីមួយនេះ មានសន្ទុះកើនឡើងក្នុងពេលប្រទេសនានាធ្លាក់ចុះ ។ លោក យក់ ចំរើនឬទ្ធិ អគ្គនាយកក្រុមហ៊ុនហ្វតតេ និងជាអ្នកត្រួសត្រាយវិស័យធានារ៉ាប់រងនៅកម្ពុជាមួយរូបបានឱ្យដឹងថា បើនិយាយពីវិស័យធានារ៉ាប់រងនៅលើពិភពលោកគេបានព្យាករថា នឹងដើរថយក្រោយ ហើយនៅបណ្ដាប្រទេសអាស៊ាន វិស័យនេះបានព្យាករថាដើរថយក្រោយប្រមាណ ១០ ភាគរយ តែសម្រាប់ព្រះរាជាណាចក្រកម្ពុជានៅមានកំណើន ដោយក្នុងនោះវិស័យធានារ៉ាប់រងទូទៅមានកំនើនប្រមាណ ៧ ភាគរយ និងធានរ៉ាប់រងលើអាយុជីវិតមានកំណើនពី១១ ទៅ ១២ ភាគរយ ។
ជារួមមូលដ្ឋានធានារ៉ាប់រងនៅកម្ពុជានៅតូចនៅឡើយសម្រាប់សេដ្ឋកិច្ច មានន័យថា ពលរដ្ឋប្រើសេវាធានារ៉ាប់រងនៅមានចំនួនតិច ។ លោក ចំរើនឬទ្ធិ បានលើកឡើងបន្តថា កត្តាដែលជំរុញឱ្យវិស័យធានារ៉ាប់រងទាំងមូលទទួលបានកំណើនជាវិជ្ជមាន គឺដោយសារតែក្នុងវិបត្តិកូវីដ ១៩ បានជំរុញឲ្យប្រជាពលរដ្ឋទិញបណ្ណធានារ៉ាប់រងលើសុខភាពមានចំនួនច្រើនជាងកាលពីឆ្នាំមុនៗ បើទោះបីជាកាទិញបណ្ណធានារ៉ាប់រងទៅលើសំណង់ និងកត្តាផ្សេងៗទៀតបានថមថយឬនៅទ្រឹងក្ដី ។
លោកថា យើងបានមើលឃើញថា វិស័យដែលជួយច្រើនដល់វិស័យធានារ៉ាប់រងទាំងមូល គឺការធានារ៉ាប់រងទៅលើសុខភាព ដែលមានកំណើនរហូតដល់ ៣០ ភាគរយ ធានារ៉ាប់រងយានយន្តក៏មានកំណើនដែរ ហើយការធានារ៉ាប់រងទៅលើការដឹកជញ្ជូន និងយន្តហោះក៏មានកំណើន ។ មន្ត្រីដដែលបន្តទៀតថា នៅក្នុងវិបត្តិកូវីដ ១៩ នេះ ប្រជាពលរដ្ឋកម្ពុជាកាន់តែច្រើនបានយល់ដឹងពីបញ្ហាសុខភាព ហើយបានទិញបណ្ណធានារ៉ាប់រងទៅលើសុខភាពកាន់តែច្រើនឡើង ។ ដូចពាក្យចាស់មួយនិយាយថា ចង់ជោគជ័យទាល់តែយើងជោគជ័យលើសុខភាពសិន តែបើសិនជាសុខភាពទ្រុឌទ្រោម មិនអាចជោគជ័យអ្វីផ្សេងបានឡើយ ។
លោកបន្ថែមថា នៅក្រោយរាជរដ្ឋាភិបាលកម្ពុជាបានប្រកាសបើកប្រទេសឡើងវិញ លោកជឿជាក់ថា វិស័យធានារ៉ាប់រងនៅកម្ពុជានឹងសញ្ញាវិជ្ជមានកាន់តែខ្លាំងជាងមុន ហើយអ្វីដែលប្រតិបត្តិករវិស័យនេះត្រូវធ្វើដើម្បីជំរុញឱ្យមានចំណែកសេដ្ឋកិច្ចកាន់តែធំនោះគឺការចូលរួមសហការគ្នា ក្នុងផ្សព្វផ្សាយ បញ្ជ្រាបចំណេះដឹងទៅកាន់ប្រជាពលរដ្ឋពីអត្ថប្រយោជន៍នៃធានារ៉ាប់រង ។
លោក ប៊ូ ចន្ទភីរូ អគ្គនាយកនិយ័តករធានារ៉ាប់រងកម្ពុជាបានថ្លែងថា រហូតមកដល់បច្ចុប្បន្ននេះកម្ពុជាទទួលបានការវិនិយោគលើវិស័យធានារ៉ាប់រងជាបន្តបន្ទាប់ មានក្រុមហ៊ុនធានារ៉ាប់រងសរុបប្រមាណ ៤០ ក្រុមហ៊ុន ទាំងធានារ៉ាប់រងទូទៅ និងក្រុមហ៊ុនធានារ៉ាប់រងអាយុជីវិត និងក្រុមហ៊ុនខ្នាតតូចជាច្រើនផងដែរ ។
លោកបន្តថា នៅពេលអនាគត វិស័យនេះនឹងកាន់តែមានការរីកលូតលាស់កាន់តែធំបន្តខណៈវិស័យធានារ៉ាប់រងកម្ពុជានៅមានចំណែកតូចនៅឡើយក្នុងសេដ្ឋកិច្ច ហើយបើធៀបនឹងប្រទេសជិតខាងវិស័យធានរ៉ាប់រងយើងគឺមានទំហំតូចមែនទែន និងត្រូវការអភិវឌ្ឍបន្ថែមទៀតនិងការវិនិយោគពីវិនិយោគិនបន្តបន្ទាប់ទៀត ។ ជាការកត់សម្គាល់ ក្នុងវិស័យធានារ៉ាប់រងកម្ពុជា ក្រុមហ៊ុនជាច្រើនតែងចូលរួមសហការជាមួយធនាគារ ក៏ដូចជាមីក្រូហិរញ្ញវត្ថុដើម្បីលក់កញ្ចប់ធានារ៉ាប់រងរបស់ខ្លួន ៕
ចែករំលែកព័តមាននេះ