រាជធានីភ្នំពេញ ៖ ក្នុងរយៈពេល ២ សប្ដាហ៍ ដំបូងក្រោយរដ្ឋាភិបាលប្រកាសបើកប្រទេសគ្រប់វិស័យឡើងវិញ ក្រុមប្រឹក្សាអភិវឌ្ឍន៍កម្ពុជាហៅកាត់ថា CDC បានអនុម័តគម្រោងវិនិយោគរបស់ក្រុមហ៊ុនចំនួន ១៤ ក្នុងទឹកប្រាក់សរុប ៥៣២ លានដុល្លារអាមេរិក ។ ក្រុមប្រឹក្សាអភិវឌ្ឍន៍កម្ពុជាបានបង្ហាញឲ្យដឹងនៅលេបណ្តាញទំនាក់ទំនងសង្គមរបស់ខ្លួនថា ក្នុងចំណោមគម្រោងទាំង ១៤ ដែលបានអនុម័ត មានគម្រោងសាងសង់ខ្សែបញ្ជូនអគ្គិសនី ៥០០ គីឡូវ៉ុល ពីភ្នំពេញទៅព្រំដែនកម្ពុជាឡាវ មានទុនវិនិយោគប្រមាណ៣៣០ លានដុល្លារអាមេរិក និងគម្រោងសាងសង់ខ្សែបណ្ដាញបញ្ជូនអគ្គិសនី ៥០០ គីឡូវ៉ុល ពីបាត់ដំបងទៅព្រំដែនកម្ពុជា ថៃ មានទុនវិនិយោគប្រមាណ ១១១ លានដុល្លារអាមេរិក ។
ក្រៅពីគម្រោងវិនិយោគធំៗទាំងពីរនេះ គម្រោងវិនិយោគដទៃទៀតភាគច្រើនគឺជាគម្រោងវិនិយោគលើរោងចក្រឧស្សាហកម្មហើយក្នុងនោះដែរភាគច្រើនកាត់ដេរសម្លៀកបំពាក់ និងស្បែកជើង ដែលសបញ្ជាក់ឱ្យឃើញថាវិស័យឧស្សាហកម្មនៅកម្ពុជា នៅតែមានសក្ដានុពលខ្ពស់ក្នុងការទាក់ទាញវិនិយោគិន ។
គម្រោងធំៗដែល CDC បានអនុម័តនោះអាចបង្កើតការងារជាង ១ ម៉ឺន ៣ ពាន់នាក់ ។ រាជរដ្ឋាភិបាលកម្ពុជាមានជំនឿថា នៅឆ្នាំ ២០២២ ខាងមុខនេះ វិស័យឧស្សាហកម្មនឹងស្រូបយកវិនិយោគិនពីប្រទេសមីយ៉ាន់ម៉ាចូលកម្ពុជា ខណៈប្រទេសនេះវិបត្តិផ្ទៃក្នុង។
លោកឌឹត ចណ្ណា អគ្គនាយកក្រុមហ៊ុនអចលនទ្រព្យឡាក់គីបានមានប្រសាសន៍ថា វាជារឿងល្អណាស់ដែលរាជរដ្ឋាភិបាលកម្ពុជាបានប្រកាសពីការបើកប្រទេសឡើងវិញ ដែលធ្វើឱ្យលំហូរវិនិយោគិនចូលកម្ពុជាឡើងវិញបានដែរ ប៉ុន្តែដោយសារតែប្រទេសមួយចំនួននៅតែមានការរឹតបន្តឹងចំពោះការចេញចូលនៃប្រជាជនដូច្នេះវិនិយោគិនមកកម្ពុជាអាចនឹងមិនទាន់មានច្រើនទេនៅក្នុងឆ្នាំនេះ ហើយនៅឆ្នាំក្រោយ វិនិយោគិនបរទេសនឹងចូលមកជាបន្តបន្ទាប់ ។
លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានលើកឡើងថា វិនិយោគិនបរទេសជាពិសេសវិនិយោគិនជនជាតិចិនអាចនឹងចូលមកម្ពុជា នៅកំលុងត្រីមាសទី ១ ឆ្នាំ ២០២២ ដើម្បីស្វែងរកការវិនិយោគជាបន្តបន្ទាប់ឡើងវិញ ពេលនោះ វិនិយោគិនក្នុងស្រុកក៏ត្រូវត្រៀមខ្លួនសម្រាប់ការស្វាគមន៍វិនិយោគិនបរទេសផងដែរ ៕
ចែករំលែកព័តមាននេះ