រាជធានីភ្នំពេញ ៖ នៅពេលកម្ពុជាប្រកាសបើកទទួលអ្នកទេសចរវ៉ាក់សាំងនៅចុងខែវិច្ឆិកានេះ គេសង្កេតឃើញថា តម្លៃសំបុត្រយន្តហោះពីចិនមកភ្នំពេញបានឡើងថ្លៃគួរឲ្យកត់សម្គាល់ ដែលអាចធ្វើឲ្យប៉ះពាល់ដល់ការចូលមកកម្ពុជារបស់អ្នកទេសចរពីព្រោះតែការចំណាយច្រើនលើការហោះហើរនោះ ។ ជាការកត់សម្គាល់ តម្លៃសំបុត្រយន្តហោះ ពីចិនមកកម្ពុជាកាលពីមុនមានតម្លៃក្រោម ១០០០ ដុល្លារ និងអាចប្រែប្រួលទៅតាមរយៈពេលនៃការទិញ ប៉ុន្តែនៅពេលនេះមានតម្លៃចន្លោះពី ៥០០០ ទៅ ១០០០០ ដុល្លារ ។
លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា បានឱ្យដឹងថា បើសិនជាតម្លៃសំបុត្រយន្តហោះនៅតែខ្ពស់កប់ពពកដដែល វានឹងជះឥទ្ធិពលដល់ការបើកប្រទេសរបស់កម្ពុជានេះផងដែរ ពីព្រោះថា ភ្ញៀវទេសចរ មិនអាចចំណាយថវិកាច្រើនលើការហោះហើរ ត្រឹមតែ ៣ ទៅ ៤ ម៉ោងនោះ ។
តាមលោកស្រី ឆាយ ស៊ីវលីន ការឡើងថ្លៃសំបុត្រយន្តហោះទៅប្រទេសចិន គឺមានរយៈជាងមួយឆ្នាំមកហើយ គឺក្រោយពីមានការផ្ទុះទ្រង់ទ្រាយធំនៅកម្ពុជា ហើយអ្នកដំណើរតាមយន្តហោះក៏កាន់តែតិចធ្វើឱ្យក្រុមហ៊ុនយន្តហោះត្រូវដំឡើងថ្លៃខ្ពស់ដូច្នេះ ។
លោក ហូ វណ្ឌី ទីប្រឹក្សាសមាគមទីភ្នាក់ងារទេសចរណ៍កម្ពុជា បានឱ្យដឹងផងដែរថា ការឡើងថ្លៃសំបុត្រយន្តហោះនេះ ប្រទេសចិនមានការព្រួយបារម្ភចំពោះភ្ញៀវទេសចរ ចេញចូលប្រទេសរបស់ពួកគេដែរ ។ តែលោកជឿថា នៅពេលខាងមុខពោលនៅពេលស្ថានភាពជំងឺកូវីដ ១៩ នៅលើពិភពលោកបានថមថយ តម្លៃសំបុត្រយន្តហោះនឹងធ្លាក់មកនៅទាបវិញជាក់ជាមិនខាន ។
មែនទែនទៅប្រតិបត្តិករវិស័យទេសចរណ៍បានដឹងពីផលលំបាករបស់ក្រុមហ៊ុនអាកាសចរណ៍ដែរ ។ ក្រុមហ៊ុនអាកាសចរណ៍ ដែលបន្តសកម្មភាពហោះហើរនៅពេលកូវីដ ១៩ រាតត្បាត ដែលពុំសូវមានអ្នកជិះនោះ មានតែការដំឡើងថ្លៃទើបអាចទប់ទល់នឹងការខាតបង់បាន ហើយមិនរងការប្តឹងផ្តល់ពីអ្នកដែលបានកក់សំបុត្រទុកនោះ ។
លោកស្រី ឆាយ សីវលីន ឲ្យដឹងទៀតថា បញ្ហាឡើងថ្លៃសំបុត្រនេះ គឺមានជើងហោះហើរពីប្រទេសចិនប៉ុណ្ណោះ សម្រាប់ប្រទេសផ្សេងៗទៀតដូចជាអាមេរិក និងបណ្ដាប្រទេសអាស៊ាន មិនមានការឡើងខ្ពស់ទេ គឺឡើងតិចតួចប៉ុណ្ណោះ ។ «ភ្ញៀវទេសចរ ឬក៏វិនិយោគិនចិនដែលមកដល់កម្ពុជាបានរអ៊ូពីបញ្ហាតម្លៃសំបុត្រយន្តហោះ ឡើងថ្លៃនេះ ប៉ុន្តែពួកគាត់នៅតែហោះចូលមក ដោយសារតែពួកគាត់មានមុខជំនួញសំខាន់នៅកម្ពុជា ឬមុខជំនួញសំខាន់នៅប្រទេសចិនដែលត្រូវតែហោះហើរទៅវិញទៅមក ។
ពាក់ព័ន្ធនឹងបញ្ហានេះដែរ សមាគមទីភ្នាក់ងារទេសចរណ៍កម្ពុជាក៏ត្រៀមជជែកជាមួយខាងក្រុមហ៊ុនឯកជន និងអាកាសយានដ្ឋាននៅកម្ពុជា ដើម្បីសម្រួលថ្លៃសំបុត្រយន្តហោះមកនៅកម្រិតមួយ» ។ សូមជម្រាបថា ចាប់ពីថ្ងៃទី ៣០ វិច្ឆិកាខាងមុខនេះ កម្ពុជានឹងចាប់ផ្ដើមទទួលយកភ្ញៀវទេសចរអន្តរជាតិចាក់វ៉ាក់សាំងរួច ចូលមកទស្សនាតំបន់ទេសចរខេត្តព្រះសីហនុ និងខេត្តកោះកុង ។ អ្នកទេសចរចិនជាក្តីសង្ឃឹមសំខាន់របស់កម្ពុជានៅក្នុងជំហ៊ានដំបូងនេះ ៕
ចែករំលែកព័តមាននេះ