ខេត្តព្រះសីហនុ ៖ ព្រឹត្តិការណ៍តន្ត្រីបាល់ទះឆ្នេរខ្សាច់របស់ស្រាបៀរ អាន់ឆ័រ បានប្រារព្ធធ្វើឡើងប្រកបដោយជោគជ័យចំនួនបីថ្ងៃជាប់គ្នា ក្នុងឱកាសចូលឆ្នាំខ្មែរ នៅថ្ងៃពី១៣ដល់១៥ មេសា នៅឆ្នេរសមុទ្រអូរឈើទាល អារីស្តុន ខេត្តព្រះសីហនុ។
នេះគឺជាខេត្តចុងក្រោយហើយដែលស្រាបៀរ អាន់ឆ័រ បានរៀបចំកម្មវិធីតន្ត្រីបាល់ទះឆ្នេរខ្សាច់។ កម្មវិធីតន្ត្រីបាល់ទះឆ្នេរខ្សាច់របស់ស្រាបៀរអាន់ឆ័រនៅមណ្ឌលខេត្តបាត់ដំបង ខេត្តសៀមរាប និងកំពង់ចាម បានបញ្ចប់យ៉ាងជោគជ័យគួរឲ្យកត់សម្គាល់កាលពីសប្តាហ៍កន្លងទៅ ដោយមានការចូលរួមយ៉ាងច្រើនកុះករពីក្រុមបាល់ទះជាច្រើនក្រុម និងភ្ញៀវជាតិ ភ្ញៀវអន្តរជាតិ ដែលបានចូលទស្សនាកម្មវិធីនេះ។
ក្នុងឱកាសបុណ្យចូលឆ្នាំខ្មែរ កម្មវិធីពិសេសរបស់ស្រាបៀរអាន់ឆ័របានទាក់ទាញភ្ញៀវទេសចរក្នុងស្រុក និងក្រៅស្រុកជាច្រើនចូលទស្សនាការប្រកួតវគ្គផ្តាច់ព្រ័ត្របាល់ទះឆ្នេរខ្សាច់ និងចូលរួមកម្មវិធីជាច្រើនដែលបានរៀបចំឡើងយ៉ាងពិសេសដោយស្រាបៀរ អាន់ឆ័រ ដូចជាលេងល្បែងកម្សាន្តដើម្បីឈ្នះរង្វាន់ ជាវសម្ភារកីឡាក្នុងតម្លៃពិសេស ថតរូបទុកអនុស្សាវរីយ៍ និងមានកម្មវិធីកម្សាន្តច្រើនបែបទៀត។ នៅពេលល្ងាចពួកគេបានរីករាយជាវស្រាបៀរអាន់ឆ័រ ដោយមានការបញ្ចុះតម្លៃ រួមទាំងការប្រគំតន្ត្រីដែលចូលរួមពីសំណាក់តារាចម្រៀងល្បីៗប្រចាំព្រះរាជាណាចក្រកម្ពុជាដូចជា ខេមរៈ សិរីមន្ត, សុខ ពិសី, ណាំ បុណ្ណារ័ត្ន, សុខ ស្រីនាង, ខេម សួសវីសា និងកីឡាករិនីបាល់ទះសញ្ជាតិហ្វីពីនល្បីឈ្មោះ Cha Cruz និងតារាចម្រៀងល្បីអន្តរជាតិ Katreeya English បានធ្វើឲ្យកក្រើកដល់ខេត្តព្រះសីហនុ បីរាត្រីជាប់គ្នា។
កីឡាករិនីបាល់ទះសញ្ជាតិហ្វីពីនល្បីឈ្មោះ Cha Cruz គឺកីឡាករអាជីព និងឯកអគ្គរដ្ឋទូតតំណាងឲ្យក្របខ័ណ្ឌលីក Super Liga របស់ប្រទេសហ្វីលីពីន។ កីឡាករិនីបានជាប់ឈ្មោះជា «កីឡាករដែលមានតម្លៃបំផុត» ចំនូនពីរដង ដោយសមាគមបាល់ទះ UAAP និងទទួលជ័យលាភីជើងឯកបាល់ទះ UAAP ក្នុងឆ្នាំ2011 និងឆ្នាំ2012 ។ ចំណែកឯកញ្ញា Katreeya English គឺជាតារាសម្តែង តារាចម្រៀង និងជាតារាដើរម៉ូដដ៏ល្បីល្បាញដែលបានកើតនៅប្រទេសអង់គ្លេស និងមានប្រជាប្រិយភាពនៅអាស៊ី។ នាងបានថតចម្រៀងជាច្រើនបទជាមួយផលិតកម្ម GMM Grammy និងចេញអាប៊ុលចម្រៀងចំនួន៥។ នាងបានសម្តែងក្នុងខ្សែភាពយន្ត និងរឿងភាគជាច្រើនតាមទូរទស្សន៍ និងចូលរួមគាំទ្រព្រឹត្តិការណ៍ទូទាំងពិភពលោក ។ ជាពិសេសនាងបានថតចម្រៀងបទ «They Call Us The Royals» សម្រាប់ក្លិបក្រុមបាល់ទាត់ Reading F.C. ក្នុងក្របខ័ណ្ឌ Football League Championship ក្នុងឆ្នាំ២០១៥។
ដោយធ្វើឲ្យអ្នកគាំទ្របាល់ទះ និងភ្ញៀវទេសចរជាតិ និងអន្តរជាតិយ៉ាងច្រើនកុះករដែលមកលេងក្រុងព្រះសីហនុក្នុងឱកាសចូលឆ្នាំខែ្មរ បានចូលរួម និងមានភាពសប្បាយរីករាយយ៉ាងខ្លាំងក្នុងការទស្សនាកម្មវិធីតន្ត្រីបាល់ទះឆ្នេរខ្សាច់របស់ស្រាបៀរទាំងពេលថ្ងៃ និងពេលរាត្រី ស្រាបៀរ អាន់ឆ័រ មានគោលបំណងផ្តល់ជូនបទពិសោធន៍បាល់ទះដែលមានលក្ខណៈពិសេស និងមិនអាចបំភ្លេចបានចំពោះមហាជន និងអ្នកគាំទ្របាល់ទះកម្ពុជា ជាពិសេសជួយពង្រឹងវិស័យបាលទះនៅកម្ពុជា ។
ចំពោះវគ្គផ្តាច់ព្រ័ត្រនៅឆ្នេរសមុទ្រអូរឈើទាល អារីស្តុន ខេត្តព្រះសីហនុ មានការចូលរួមពីក្រុមកំពូលចំនួនប្រាំបីក្រុមមកពីខេត្តបាត់ដំបង សៀមរាប កំពង់ចាម និងខេត្តព្រះសីហនុ គេបានរកឃើញក្រុមជើងឯកចំនួន3ក្រុម គឺក្រុមវិទ្យាល័យហ៊ុនសែនស្មាច់ដែង បានក្លាយជាម្ចាស់ជើងឯកក្នុងក្របខ័ណ្ឌពានរង្វាន់បាល់ទះឆ្នេរខ្សាច់របស់ស្រាបៀរ អាន់ឆ័រ ដែលទទួលបានរង្វាន់ទឹកប្រាក់៥.០០០ដុល្លារអាមេរិក។ ចំពោះជើងឯករងបានទៅលើក្រុមតារាបាល់ទះទេសចរណ៍ ទទួលបានរង្វាន់ទឹកប្រាក់២.០០០ដុល្លារអាមេរិក ចំណែកឯចំណាត់ថ្នាក់លេខ៣ បានទៅលើក្រុមយុវជនបាត់ដំបង C និងក្រុម Aqua Family Resortជាប់ចំណាត់ថ្នាក់លេខ៣ស្ទួន ទទួលបានរង្វាន់ទឹកប្រាក់១.០០០ដុល្លារអាមេរិក ព្រមទាំងរង្វាន់ជាច្រើនផ្សេងទៀត សម្រាប់កីឡាករដែលទទួលជ័យលាភី។
ចែករំលែកព័តមាននេះ