រាជធានីភ្នំពេញ ៖ ទោះបីខេត្តសៀមរាប មិនទាន់បើកទទួលស្វាគមន៍អ្នកទេសចរបរទេសនៅក្នុងជំហ៊ានដំបូងនេះក្តី តែការប្រកាសបើកសកម្មភាពសេដ្ឋកិច្ចឡើងវិញរបស់កម្ពុជា បានធ្វើឲ្យប្រតិបត្តិករទេសចរណ៍ជាច្រើននៅលើទឹកដីអង្គរអបអរសាទរ ។ លោក ជា ពិសិដ្ឋ ម្ចាស់ភោជនីយដ្ឋានរាតាអង្គរនៅក្រុងសៀមរាប បានបង្ហាញនូវការសប្បាយរីករាយ និងសាទរចំពោះការសម្រេចបើកសកម្មភាពក្នុងប្រទេសទ្បើងវិញ របស់រាជរដ្ឋាភិបាលកម្ពុជា ។ លោកថា ការសម្រេចបើកប្រទេសទ្បើងវិញលើគ្រប់វិសយ័នោះ គឺជាដំណឹងដ៏សែនរីករាយមួយសម្រាប់សេវាករទេសចរ និងប្រតិបត្តិករទេសចរទូទាំងប្រទេស សំខាន់នៅខេត្តសៀមរាប ។
អាជីវកររូបនេះលើកឡើងបន្តថា ការបើកប្រទេសដើម្បីទទួលភ្ញៀវទេសចរទ្បើងវិញ ទោះជាក្នុងលក្ខខណ្ឌខ្លះក៏ដោយចុះ ក្រុមអ្នក រកទទួលទានក្នុងវិស័យទេសចរណ៍ នឹងខិតខំដើម្បីបំពេញតាមលក្ខខណ្ឌទាំងអស់នោះ ព្រោះថា ប្រទេសជិតខាងកម្ពុជាក៏បានប្រកាសបើកដូចគ្នានិងមានលក្ខខណ្ឌប្រហាក់ប្រហែលនេះដែរ ។
យ៉ាងណាក៏ដោយលោក ជា ពិសិដ្ឋ បានសំណូមពរមួយចំនួនផងដែរនៅក្នុងដំណើរការបើកសាកល្បងនេះ សំខាន់លោកចង់ឲ្យមានការបន្ធូរបន្ថយពន្ធសម្រាប់សេវាកម្ម អាជីវកម្មទេសចរណ៍ ព្រោះថាសេវាកម្មនេះបានរងការខាតបង់យ៉ាងខ្លាំងនៅក្នុងដំណាក់កាលនៃការរាលត្បាតជំងឺកូវីដ ១៩ នោះ ។ លោកសំណូមពរឲ្យមានការបន្ធូរបន្ថយសម្រាប់ការស្នើសុំបន្តអាជ្ញាបណ្ណ័អាជីវកម្មផងដែរ ដើម្បីបង្កលទ្ធភាពនៃការប្រឹងងើបទ្បើងវិញនោះ ព្រោះថា សេវាកម្មអាហារនេះបានខាតបង់យូរហើយ ពិសេសគ្រប់គ្នានៅជាប់ជំពាក់បំណុលធនាគារទៀតផង ។
កម្ពុជាបានប្រកាសទទួលភ្ញៀវទេសចរវ៉ាក់សាំងក្នុងជំហ៊ានដំបូង គឺនៅខេត្តព្រះសីហនុ និងកោះកុង ដែលបន្ទាប់មកទៀតអាចនៅសៀមរាប និងភ្នំពេញ ។ នៅព្រឹកថ្ងៃទី ១ ខែវិច្ឆិកា ឆ្នាំ ២០២១ នេះ ប្រមុខរដ្ឋាភិបាលបានប្រកាសបើកប្រទេសលើគ្រប់វិស័យចាប់ពីនេះទៅផងដែរ នៅក្នុងនោះសម្តេចបានអំពាវនាវឲ្យពលរដ្ឋដើរកម្សាន្តដែលជាផ្នែកសំខាន់នៅក្នុងការស្តារវិស័យទេសចរណ៍និងសេវាកម្មឡើងវិញ ។
កន្លងមកប្រធានសមាគមទេសចរកម្ពុជា បានឲ្យដឹងថា ពេលជំងឺកូវីដ ១៩ រាតត្បាតកន្លងមកនេះ បានបង្ខំឲ្យក្រុមហ៊ុនភ្នាក់ងារទេសចរនៅកម្ពុជាប្រមាណជាង ៧០០ ក្រុមហ៊ុនបិទទ្វារ ។ ទន្ទឹមនោះបុគ្គលិកក្រុមហ៊ុនភ្នាក់ងារទេសចរស្ទើរតែទាំងអស់ត្រូវបានកាត់រំសាយ ហើយអ្នកបម្រើការងារក្នុងវិស័យទេសចរណ៍ប្រមាណ ៦ ម៉ឺននាក់ ទៅប្រកបកិច្ចកិច្ចការផ្សេង ។
លោកស្រី ឆាយ សីវលីន ប្រធានសមាគមទីភ្នាក់ងារទេសចរកម្ពុជា បានលើកឡើងថា ការបើកដំណើរការទេសចរណ៍អន្តរជាតិឡើងវិញ នឹងជួយឱ្យអាជីវកម្មដែលបិទទ្វារ និងផ្អាកដំណើរមានសកម្មភាពឡើងវិញ ហើយបុគ្គលិកនឹងចូលមកកាន់កន្លែងការងារវិញជាមួយនឹងប្រាក់ចំណូលសម្រាប់ចិញ្ចឹមគ្រួសារ ៕
ចែករំលែកព័តមាននេះ