ការបើកប្រទេសឡើងវិញ ពាណិជ្ជករផ្តើមសង្ឃឹមលើជំនួញ
- ភ្នំពេញ
រាជធានីភ្នំពេញ ៖ ការបើកឱ្យដំណើរការប្រទេសឡើងវិញ បានធ្វើឱ្យអ្នកជំនួញ ធុរជន និងពលរដ្ឋជាទូទៅសាទរ ។ លោកឧកញ៉ា លឹម ហេង…
រាជធានីភ្នំពេញ ៖ ការបើកឱ្យដំណើរការប្រទេសឡើងវិញ បានធ្វើឱ្យអ្នកជំនួញ ធុរជន និងពលរដ្ឋជាទូទៅសាទរ ។ លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា មានប្រសាសន៍ថា ការបើកដំណើរការឡើងវិញលលើគ្រប់វិស័យរបស់រាជរដ្ឋាភិបាលនេះ វាគឺជាដំណឹងដ៏រីករាយសម្រាប់វិស័យឯកជនដែលរង់ចាំអស់រយៈពេលជិត ២ ឆ្នាំមកនេះ ។
លោកឧកញ៉ា លឹម ហេង មានក្តីរំពឹងថា «ខ្ញុំគិតថា នៅពេលយើងបានបើកដំណើរការសេដ្ឋកិច្ចឡើងវិញនេះនឹងធ្វើឱ្យមានកំណើនទាំងផ្ទៃក្នុង និងខាងក្រៅ ។ ដូច្នេះសម្រាប់អាជីវករលើគ្រប់វិស័យនឹងដំណើរការឡើងវិញ ហើយអាចធ្វើឱ្យប្រាក់ចំណូល និងអាជីវកម្មរបស់ខ្លួននឹងមានភាពប្រសើរឡើងវិញ» ។
លោក មៀវ សុខទ្រី ប្រធានសមាគមផលិតចំណីអាហារកម្ពុជា បានឱ្យដឹងថា បើមើលទៅលើបរិបទពិភពលោកទាំងមូលយើងឃើញថា ប្រទេសភាគច្រើនគេកំពុងចាប់ផ្តើមបើកដំណើរការសេដ្ឋកិច្ចដូចគ្នានិងកម្ពុជា ។ លោកសាទរ និងរីករាយដែលកម្ពុជាប្រកាសបើកប្រទេសនាពេលនេះ ។
នៅថ្ងៃទី ១ ខែវិច្ឆិកា ឆ្នាំ ២០២១ ប្រមុខរដ្ឋាភិបាលកម្ពុជា បានប្រកាសបើកប្រទេសលើគ្រប់វិស័យឡើងវិញ ។ សម្តេចនាយករដ្ឋមន្ត្រីបានជំរុញពលរដ្ឋឱ្យដើរកម្សាន្តផង ប៉ុន្តែត្រូវគោរពគោលការណ៍សុខាភិបាល ដែលជាការរស់នៅក្នុងគន្លងថ្មី ពាក់ម៉ាស រក្សាគម្លាតនិងឧស្សាហ៍លាងសម្អាតដៃ ។
តំណាងឱ្យអ្នកផលិតចំណីអាហារក្នុងស្រុកលោក មៀវ សុខទ្រី បានលើកឡើងបន្ថែមថា ចំពោះប្រទេសកម្ពុជាយើងខ្ញុំគិតថា ល្អណាស់ ការបើកសេដ្ឋកិច្ចឡើងវិញបានទាន់ពេលវេលាធ្វើឱ្យវិស័យផ្សេងៗទាំងអស់អាចក្រោកឡើងវិញបាន ។ ការបើកសេដ្ឋកិច្ចឡើងវិញនេះ ខ្ញុំសប្បាយចិត្ត និងសាទរ ហើយអ្នកផលិតផ្សេងទៀតក៏ពួកគាត់សប្បាយចិត្តដូចគ្នាដែរ ៕
ចែករំលែកព័តមាននេះ