រាជធានីភ្នំពេញ ៖ អ្នកជួញដូរដីធ្លីបានអះអាងថា មួយរយៈនេះដីនៅក្នុងខេត្តមណ្ឌលគិរី ឡើងថ្លៃខ្លាំង ។ ការឡើងថ្លៃទំនងដោយសារគម្រោងសាងសង់ព្រលានយន្តហោះអន្តរជាតិខេត្តមណ្ឌលគីរី នេះ ពិសេសសក្តានុពលទេសចរណ៍នៅទីនោះកាន់តែទាក់ទាញ ។
លោក មាឃ ឬទ្ធីជ័យ ប្រធានក្រុមហ៊ុនអចលនទ្រព្យ Century 21 Zillion Holding ប្រចាំខេត្តមណ្ឌលគីរី បានឱ្យដឹងថា តម្លៃដីធ្លីនៅក្នុងខេត្តមណ្ឌលគីរី បានហក់ឡើងខ្ពស់នៅក្នុងរយៈពេលចុងក្រោយនេះ ។ កាលពីមុនដីនៅតំបន់ក្បែរគម្រោងព្រលានយន្តហោះ ដែលមានតម្លៃ ២០០០ ដុល្លារអាមេរិកទៅ ៣០០០ ដុល្លារអាមេរិកក្នុងមួយម៉ែត្រដើរ បានហក់ឡើងដល់ ៥០០០ ដុល្លារអាមេរិកក្នុងមួយម៉ែត្រដើរ ។ លោកថា តំបន់ខ្លះទៀតដែលមានតម្លៃត្រឹម ២០០០ ដុល្លារអាមេរិកក៏បានហក់ដល់ ៤០០០ ដុល្លារអាមេរិកផងដែរ ។
បើតាមអ្នករកស៊ីដីធ្លីខាងលើថា សម្រាប់អ្នកទិញដីធ្លីនៅក្នុងខេត្តមណ្ឌលគីរី ភាគច្រើនជាវិនិយោគិនក្នុងស្រុកមកពីខេត្តព្រះសីហនុ សៀមរាប និងភ្នំពេញជាដើម ។ ប៉ុន្តែសម្រាប់វិនិយោគិនចិនត្រូវបានឃើញថាចាប់ផ្ដើមចូលទៅកាន់ខេត្តមណ្ឌលគីរី ដើម្បីស្វែងរកឱកាសវិនិយោគរបស់ខ្លួនផងដែរ ។ លោកឬទ្ធីជ័យ ថា នៅដើមឆ្នាំ ២០២២ ខាងមុខនេះ ដីធ្លីនិងសក្ដានុពលវិនិយោគនៅក្នុងខេត្តមណ្ឌលគីរី កាន់តែហក់ឡើងខ្ពស់បន្ថែមទៀត ជាពិសេសនោះនៅពេលគម្រោងព្រលានយន្តហោះអន្តរជាតិចាប់ផ្ដើមអភិវឌ្ឍន៍នៅពេលណានោះ វានឹងហុចសក្ដានុពលក៏ដូចជាទាក់ទាញវិនិយោគិនជាច្រើនទៀត ចូលមកកាន់មណ្ឌលគីរី ។
ដោយសារជំងឺកូវីដ ១៩ គម្រោងសាងសង់ព្រលានយន្តហោះខេត្តមណ្ឌលគិរី បានពន្យារពេល ។ លោក ស៊ីន ចាន់សិរីវុត្ថា អ្នកនាំពាក្យរដ្ឋលេខាធិការអាកាសចរណ៍ស៊ីវិលបានប្រាប់ កោះសន្តិភាព នៅព្រឹកថ្ងៃទី ២៩ តុលា ២០២១ នេះថា គម្រោងសាងសង់ព្រលានយន្តហោះអន្តរជាតិខេត្តមណ្ឌលគីរី បើតាមផែនការចាស់ គឺនឹងត្រូវចាប់ផ្ដើមនៅដើមឆ្នាំក្រោយ ប៉ុន្តែបញ្ហាកូវីដ ១៩ ផែនការនេះក៏ត្រូវពន្យារទៅចុងឆ្នាំក្រោយឬក៏ដើមឆ្នាំ ២០២៣ ។
លោកថា នៅដើមឆ្នាំ ២០២៣ យើងក៏មិនប្រាកដថា នឹងអាចសាងសង់ ឬក៏បើកការដ្ឋានសាងសង់នោះដែរ ពីព្រោះមុននឹងចាប់ផ្ដើមសាងសង់យើងត្រូវការបទដ្ឋានគតិយុត្តិច្រើន ។ មន្ត្រីបានបញ្ជាក់ថា បញ្ហាកូវីដ ១៩ ធ្វើឱ្យអ្នកជំនាញផ្នែកសាងសង់ព្រលានយន្តហោះ មិនអាចចូលមកកម្ពុជា ដើម្បីសិក្សាលម្អិតបាន ហើយក្រុមហ៊ុនដែលទទួលបានសិទ្ធិអភិវឌ្ឍន៍គម្រោងនេះ ក៏បានបង្អាក់សកម្មភាពរបស់ខ្លួន ដោយរង់ចាំមើលស្ថានភាពកូវីដ ១៩ ដោយគេមិនប្រញ៉ាប់ប្រញ៉ាល់ក្នុងការអភិវឌ្ឍឡើយ ៕
ចែករំលែកព័តមាននេះ