តាមសេចក្តីរាយការណ៍ពីខេត្តកែបនាព្រឹកថ្ងៃទី៣ មេសា អំពីបាតុភូតទឹកសមុទ្រនៅឆ្នេរកែប ដែលមុននេះបានប្រែទៅជាពណ៌បៃតងឫត្រួយចេកដ៏ចម្លែកគួរឱ្យខ្លាចនោះ ពេលនេះស្ថានភាពទឹកសមុទ្របានវិលមកជាពណ៌ធម្មតាវិញហើយ
ខេត្តកែប ៖ តាមសេចក្តីរាយការណ៍ពីខេត្តកែបនាព្រឹកថ្ងៃទី៣ មេសា អំពីបាតុភូតទឹកសមុទ្រនៅឆ្នេរកែប ដែលមុននេះបានប្រែទៅជាពណ៌បៃតងឫត្រួយចេកដ៏ចម្លែកគួរឱ្យខ្លាចនោះ ពេលនេះស្ថានភាពទឹកសមុទ្របានវិលមកជាពណ៌ធម្មតាវិញហើយ ។ ទោះបីជាបែបណា នៅតាមតំបន់ឆ្នេរខ្សាច់កន្លែងលេងទឹក អាជ្ញាធរបានបិទបំរាមមិនទាន់អនុញ្ញាតឲ្យសាធាណៈជន និងភ្ញៀវទេសចរណ៍ចុះហែលទឹកលេងនោះទេ ដោយរង់ចាំលទ្ឋផលក្នុងការយកទឹក និងមច្ឆាសមុទ្រដែលងាប់ទៅពិសោធន៍ អោយបានច្បាស់លាស់សិន ដែលការងារនេះស្ថិតនៅក្នុងចំណាត់ការរបស់ក្រសួងបរិស្ថាននៅឡើយ ។
ក្រុមអាជីវករ អ្នកលក់ម្ហូបអាហារគ្រឿងសមុទ្រ ក៍ត្រូវបានអាជ្ញាធរខេត្តប្រកាសឲ្យផ្អាកការលក់ជូនភ្ញៀវដែរ ព្រោះស្ថិតក្នុងការប្រយ័ត្នប្រយែង ដើម្បីចៀសវាងបាតុភាពអាក្រក់ណាមួយកើតឡើង ។ ចំពោះស្ថានភាពភ្ញៀវទេសចរណ៍ ពិសេសអ្នកទេសចរណ៍ជាតិដែលចូលមកលេងលំហែកាយ តាមឆ្នេរកែបនៅថ្ងៃ៣ មេសា គេពុំទាន់ឃើញមានភ្ញៀវចូលមកច្រើនដូចកាលពីរសៀលថ្ងៃ២ មេសា នោះទេ គឺមានចំនួនតិចតួចបំផុត ។ ទំនងភ្ញៀវដែលមិនបានដឹងពីព័ត៌មាននេះ បើដឹងប្រហែលជាគេមិនទៅទេ ។
តាមសេចក្ដីប្រកាសព័ត៌មានកាលពីថ្ងៃទី២ មេសា ក្រសួងបរិស្ថានបានប្រកាសដល់សាធារណជន និងប្រព័ន្ធផ្សព្វផ្សាយព័ត៌មានថា នាពេលថ្មីៗនេះ បន្ទាប់ពីទទួលសេចក្ដីរាយការណ៍អំពីបញ្ហាទឹកសមុទ្រប្រែពណ៌ទៅជាបៃតងនៅក្នុងភូមិសាស្ត្រខេត្តកែប អគ្គនាយកដ្ឋានគាំពារបរិស្ថានបានចុះទៅពិនិត្យស្ថានភាពជាក់ស្ដែងនិងដងយកសំណាកទឹកសមុទ្រនោះ មកវិភាគនៅមន្ទីរពិសោធន៍កាលពីថ្ងៃទី២ មេសា ឆ្នាំ២០១៦ ។ ជាការសន្និដ្ឋានបឋម បញ្ហាទឺកសមុទ្រប្រែពណ៌ទៅជាបៃតងនេះ គឺបណ្ដាលមកពីការកើនឡើងនូវកម្រិតជាតិស្លែខុសពីប្រក្រតី ដែលអាចបណ្ដាលឱ្យប៉ះណាល់ដល់សុខភាពមនុស្ស និងសត្វ ។
អាស្រ័យហេតុនេះ ក្រសួងបរិស្ថានសូមអំពាវនាវដល់សាធារណជនគ្រប់រូប ជាពិសេសប្រជាពលរដ្ឋរស់នៅតាមតំបន់សមុទ្រខេត្តកែប និងភ្ញៀវទេសចរណ៍ ដែលអញ្ជើញទៅកំសាន្តនៅតំបន់ឆ្នេរសមុទ្រនៃខេត្តកែប មេត្តាប្រុងប្រយ័ត្ត ដោយគួរផ្អាកការចុះងូតទឹកសមុទ្រកំសាន្ត និងបរិភោគគ្រឿងសមុទ្រ ដែលត្រូវបាននេសាទពីតំបន់ដែលកំពុងកើតមានបញ្ហានេះមួយរយៈខ្លី ។
តាមការកត់សម្គាល់ រហូតមកដល់ថ្ងៃ៣ មេសា ការធ្វើពិសោធន៍របស់ក្រសួងបរិស្ថាន ស្ដីពីរឿងទឹកសមុទ្រប្រែពណ៌នេះ មិនទាន់ត្រូវបានប្រកាសជូនដំណឹងបែបណានៅឡើយទេ គិតត្រឹមម៉ោង៥ល្ងាចថ្ងៃដដែលនេះ
ព័ត៌មានចុងក្រោយ
លោក សៅ សុភាព នាយខុទ្ទកាល័យ និងជាមន្ត្រីអ្នកនាំពាក្យក្រសួងបរិស្ថាន មានប្រសាសន៍នាល្ងាចថ្ងៃទី៣ មេសា ថា បាតុភូតធម្មជាតិដែលបានកើតឡើងនេះ មិនមានការប៉ះពាល់ធ្ងន់ធ្ងរ ដូចពាក្យចចាមអារ៉ាមនោះឡើយ ។ លោកថា ស្ថានភាពនេះ២ទៅ៣ថ្ងៃទៀត នឹងវិលទៅរកភាពប្រក្រតីឡើងវិញហើយ ក៏អាចទៅកម្សាន្តបានផងដែរ ។ លោកបានប្រៀបធៀបការប្រែពណ៌ទឹកសមុទ្រទៅជាពណ៌បៃតងថា កាលពីប៉ុន្មានឆ្នាំមុននេះ នៅបឹងយក្សឡោមក៏មានស្ថានភាពដូចគ្នានេះដែរ ដែលប្រការនេះដោយសារកំណើនស្លែ កើនឡើងពេលមានអាកាសធាតុក្តៅទើបធ្វើឱ្យទឹកឡើងពណ៌បៃតង ។
ក្រុមអាជីវករអ្នកលក់ម្ហូបអាហារគ្រឿងសមុទ្រ ក៏ត្រូវបានអាជ្ញាធរខេត្តប្រកាសឲ្យផ្អាកលក់ជូនភ្ញៀវពិសារដែរ រីឯស្ថានភាពភ្ញៀវដែលចូលមកលេងកម្សាន្តនាថ្ងៃនេះ ចាប់ពីម៉ោង៦និង៣០នាទីមកដល់ម៉ោង១០និង៣០នាទីព្រឹក ថ្ងៃទី០៣ មេសា នេះ គេពុំទាន់ឃើញមានភ្ញៀវចូលមកច្រើនដូចកាលពីរសៀលម្សិលមិញនោះទេ មានតិចតួច។
ជុំវិញបាតុភូតលើផ្ទៃទឹកសមុទ្រ ក្រសួងបរិស្ថានបានយកទៅធ្វើការពិសោធន៍រកប្រភព និងមូលហេតុនោះ ពុំទាន់មានប្រភពខាងលើផ្តល់ព័ត៌មានជាក់លាក់អំពីលទ្ធផលថា មកពីមូលហេតុអ្វីនោះនៅឡើយទេ៕
ចែករំលែកព័តមាននេះ