រាជធានីភ្នំពេញ ៖ នៅឆ្នាំ២០១៥កន្លងមក គម្រោងខុនដូជាច្រើនបានប្រកាស និងចាប់ផ្ដើមសាងសង់នៅតាមទីតាំងនានាទៅតាមគម្រោងរបស់ខ្លួន ។ ចំណែកនៅឆ្នាំ២០១៦ និងនៅឆ្នាំបន្តទៅទៀតនេះ គម្រោងខុនដូដែលបានប្រកាសវិនិយោគ
រាជធានីភ្នំពេញ ៖ នៅឆ្នាំ២០១៥កន្លងមក គម្រោងខុនដូជាច្រើនបានប្រកាស និងចាប់ផ្ដើមសាងសង់នៅតាមទីតាំងនានាទៅតាមគម្រោងរបស់ខ្លួន ។ ចំណែកនៅឆ្នាំ២០១៦ និងនៅឆ្នាំបន្តទៅទៀតនេះ គម្រោងខុនដូដែលបានប្រកាសវិនិយោគ និងចាប់ផ្ដើមសាងសង់កាលពីឆ្នាំមុន នឹងបន្តសាងសង់បញ្ចប់គម្រោងទាំងនោះ ខណៈឆ្នាំ២០១៦នេះ មានគម្រោងតិចតួចប៉ុណ្ណោះបានបោះទុនបន្ថែម ។
លោក ឌឹត ចណ្ណា នាយកក្រុមហ៊ុនអចលនទ្រព្យឡាក់គី បានឱ្យដឹងថា ៖ « នៅឆ្នាំខាងមុខនេះ គម្រោងខុនដូប្រហែលជាមិនមានទៀតទេ ដោយអាចប៉ាន់ស្មានថា អ្នកវិនិយោគត្រូវការពេលវេលានេះដើម្បីលក់គម្រោងចាស់ៗរបស់ខ្លួនឱ្យអស់សិន ។ កាលពីឆ្នាំ២០១៥កន្លងមក គម្រោងខុនដូថ្មីៗបានសម្រុកខ្លាំងមែនទែន ដោយគម្រោងមួយចំនួនលក់បានច្រើន ខ្លះទៀតបានតិចតួច និងមួយចំនួនទៀតក៏ទើបចាប់ផ្ដើមលក់ ។ ដូចនេះ នៅឆ្នាំ២០១៦ ម្ចាស់គម្រោងទាំងនោះអាចបន្តលក់គម្រោងចាស់ឱ្យអស់សិន។ សម្រាប់ម្ចាស់គម្រោងថ្មីៗទៀត អាចនៅចាំមើលសិន ឬចាំឱ្យគម្រោងចាស់របស់គេលក់អស់ ចាំដាក់គម្រោងថ្មីៗទៀត » ។
លោកបន្តថា ៖ « យើងមិនអាចនិយាយថា ឆ្នាំ២០១៦នេះគ្មានគម្រោងខុនដូនោះដែរ វាប្រាកដជាមាន តែបើសិនជាមាន ក៏មិនមានច្រើនដូចកាលពីឆ្នាំ២០១៥ដែរ ព្រោះថា នៅឆ្នាំ២០១៥ គម្រោងជាច្រើនបានប្រកាសវិនិយោគ សាងសង់ និងលក់មិនទាន់អស់នៅឡើយ ដែលត្រូវការពេលវេលាលក់ និងសាងសង់ » ។
លោកបន្ថែមថា ៖ « ការសាងសង់ខុនដូនៅកម្ពុជា គឺសម្រាប់ផ្គត់ផ្គង់ទៅឱ្យអ្នកដែលមានជីវភាពកម្រិតខ្ពស់ៗ តែសម្រាប់កម្ពុជា អ្នកមានកម្រិតជីវភាពខ្ពស់ៗនៅមានតិចតួចនៅឡើយ ។ ម្យ៉ាងទៀត អ្នកដែលមានជីវភាពធូរធារភាគច្រើន ក៏មិននិយមចូលចិត្តរស់នៅក្នុងខុនដូដែរ គឺពួកគាត់ចូលចិត្តស្នាក់នៅក្នុងផ្ទះវីឡា ដែលជាទម្លាប់របស់ប្រជាជនកម្ពុជា ។ មានតែប្រជាជនក្មេងៗមួយចំនួនប៉ុណ្ណោះដែលធ្លាប់ចេញចូល និងរស់នៅក្រៅប្រទេស ទើបពួកគេចូលចិត្ត និងចង់រស់នៅក្នុងខុនដូ ដូចនេះពួកគេអាចនឹងទិញខុនដូស្នាក់នៅ ។ សរុបមក ទីផ្សារខុនដូនៅកម្ពុជារាងពិបាកបន្តិច ដែលម្ចាស់គម្រោងត្រូវរកយុទ្ធសាស្ត្រនានាដើម្បីទាក់ទាញអ្នកទិញ » ។
លោកបញ្ជាក់ថា ៖ « ម្ចាស់គម្រោងគួរតែផ្គត់ផ្គង់ទៅលើខុនដូ ដែលជាតម្រូវការពិតប្រាកដរបស់ប្រជាពលរដ្ឋខ្មែរវិញ ។ មានន័យថា ជាខុនដូមានតម្លៃមធ្យមសមស្របជាមួយនឹងកម្រិតជីវភាពរបស់ប្រជាពលខ្មែរភាគច្រើន ។ ម្យ៉ាងទៀត ដោយសារតែផ្ទះល្វែងនៅក្នុងក្រុងមានតម្លៃថ្លៃៗ ដូចនេះ តម្រូវឱ្យពួកគាត់ទៅរស់នៅឆ្ងាយពីក្រុង តែបើសិនជាខុនដូនៅក្នុងក្រុងមានតម្លៃធូរថ្លៃនោះ ប្រហែលជាមានប្រជាជនខ្មែរភាគច្រើនអាចប្តូរមកស្នាក់នៅក្នុងខុនដូវិញហើយ » ។
ចំណែកលោក ប៉ូ អ៊ាវគង់ ប្រធានក្រុមហ៊ុនអចលនទ្រព្យអេស៊ារៀលអុីស្ទេត ក៏បានឱ្យដឹងដែរថា ៖ « ក្នុងវិស័យខុនដូនៅកម្ពុជា បើគិតជាលក្ខណៈវិជ្ជមាននៅតែមានការវិនិយោគបន្ថែមក្នុងឆ្នាំ២០១៦នេះ ដោយសារខុនដូនៅកម្ពុជាមួយចំណែកធំសម្រាប់ទីផ្សារបរទេស និងមួយចំណែកតូចជាទីផ្សារក្នុងស្រុក ។ អ្នកវិនិយោគទៅលើគម្រោងខុនដូនៅកម្ពុជា ភាគច្រើនពឹងពាក់លើទីផ្សារបរទេសច្រើនជាង ដោយសារតែបរទេសគេមានប្រព័ន្ធទំនាក់ទំនងល្អរវាងអ្នកវិនិយោគ និងអ្នកវិនិយោគ ។ តែយ៉ាងក៏ដោយ ការមកបណ្ដាក់ទុនវិនិយោគបន្ថែមទៅលើខុនដូ ក៏គួរសិក្សាពីតម្រូវការទីផ្សារនៅពេលបច្ចុប្បន្នផងដែរ » ។
លោកបន្តថា ៖ « តម្រូវការខុនដូនៅពេលអនាគតអាចនឹងមានច្រើន ពីព្រោះថាមនុស្សសម័យថ្មីអាចនឹងផ្លាស់ប្តូរមករស់នៅបែបសម័យថ្មី ។ សព្វថ្ងៃនេះ ទីផ្សារខុនដូនៅកម្ពុជាមានចន្លោះពី២០% ទៅ៣០% ជាជនជាតិខ្មែរ ហើយក្រៅពីនោះ គឺជាទីផ្សារសម្រាប់ជនបរទេសដែលមកស្នាក់នៅ និងធ្វើការនៅក្នុងប្រទេសកម្ពុជា » ។
លោក បេ បូរិន ប្រធានការិយាល័យសំណង់នៃមន្ទីររៀបចំដែនដី នគរូបនីយកម្ម សំណង់ និងសុរិយោដី រាជធានីភ្នំពេញ បានមានប្រសាសន៍ថា ៖ « សំណង់អគារខ្ពស់ៗនៅក្នុងរាជធានីភ្នំពេញដែលមានកម្ពស់ចាប់ពី៥ ដល់ជាង៤០ជាន់សម្រាប់ឆ្នាំ២០១៥កន្លងមកនេះ មានចំនួន៦២៨អគារ ដែលបានសាងសង់រួច និងកំពុងសាងសង់ គឺកើនលើសឆ្នាំ២០១៤ ចំនួន៦៧អគារ ឬស្មើនឹង១២% » ។
យោងតាមរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់ បង្ហាញថា ក្នុងឆ្នាំ២០១៥ គម្រោងសាងសង់នៅទូទាំងប្រទេសមានចំនួនសរុប២.៣០៥គម្រោង ដែលមានផ្ទៃក្រឡាសំណង់សរុបចំនួន៧.៦៨៦.១១២ម៉ែត្រការ៉េ មានតម្លៃប៉ាន់ស្មានទុនវិនិយោគប្រមាណ៣.៣៣៨លានដុល្លារ បើធៀបនឹងឆ្នាំ២០១៤ ពោលគឺកើនឡើងប្រមាណ៣៣,១៤% ។
ការរីកដុះដាលនៃវិស័យសំណង់ទាំងនេះ ក៏ដោយសារតែកម្ពុជាមានចំណុចខ្លាំងដូចជា ច្បាប់ លិខិតបទដ្ឋានគតិយុត្ត បទប្បញ្ញត្តិ និងស្តង់ដាយកមកប្រើប្រាស់ធ្វើជាខ្នាតក្នុងការអនុវត្តលើការងារសាងសង់ ការងារជួសជុលការងាររុះរើ ការផលិត និងការត្រួតពិនិត្យលើសុវត្ថិភាព គុណភាព និងសោភ័ណភាព ៕
ចែករំលែកព័តមាននេះ