កញ្ញា វ៉ា ម៉ាលីណា បានព្យាយាមខ្លាំងណាស់ ក្នុងការដណ្តើមយកភាពលេចធ្លោ ការប្រកួត Miss Grand Cambodia 2021។ បើទោះបីជាបានបិទបញ្ចប់ទៅ ហើយរកឃើញម្ចាស់ជ័យលាភីក៏ដោយ
រាជធានីភ្នំពេញ ៖ កញ្ញា វ៉ា ម៉ាលីណា បានព្យាយាមខ្លាំងណាស់ ក្នុងការដណ្តើមយកភាពលេចធ្លោ ការប្រកួត Miss Grand Cambodia 2021។ បើទោះបីជាបានបិទបញ្ចប់ទៅ ហើយរកឃើញម្ចាស់ជ័យលាភីក៏ដោយ តែគេនៅចាំជាក់បានថា វ៉ា ម៉ាលីណា ក៏ជាបេក្ខភាពជើងខ្លាំងមួយដួងដែរ។ ទោះមិនបានក្លាយជាម្ចាស់មកុដ ក៏ ម៉ាលីណា បានជាប់សម្រស់ស្អាតដាច់គេ ដោយកាន់តែគន់មើលយូរទៅនាងពិតជាស្រស់ស្អាតមែន។
វ៉ា ម៉ាលីណា បានក្លាយជាបេក្ខនារីម្នាក់ក្លាហាន មិនចាញ់គេនោះទេ អំឡុងឡើងប្រកួតបវរកញ្ញាកន្លងទៅ។ នាងរមែងធ្វើអោយគណៈកម្មាការតាមដានគ្រប់គ្នា រាល់ការបង្ហាញខ្លួនលើវិញ្ញាសានីមួយៗ។ ម៉ាលីណា តំណាងខេត្តព្រះវិហារ ដែលមានស្នាមញញឹមស្រស់ ដងខ្លួនស្រឡូនខ្ពស់ និងមានសាច់សខ្ចី សក់ខ្មៅរលោងវែង បង្កើនសម្រស់។ ពេលឡើងប្រកួត ម៉ាលីណា រវៀសរវៃណាស់ មិនតក់ស្លុតនោះទេ ហើយទទួលបានការឃ្លាំមើលពីអ្នកទស្សនាគ្រប់ពេល។ ជាលទ្ធផលនាងបានឡើងដល់បេក្ខភាព១០រូបចុងក្រោយ ដែលចម្រាញ់បង្ហាញយកតែ៥រូបកំពូល។
យ៉ាងណា នាងមិនបានចូល Top 5 នោះទេ ហើយក៏មិនបានបាក់ទឹកចិត្តអ្វីដែរ ចាត់ទុកថា ជាបទពិសោធន៍មួយលើវិស័យបវរកញ្ញា នៅកម្ពុជាកំពុងពេញនិយម។ ចំពោះនាងវិញបានសម្រេចថា ខំបង្វឹកខ្លួនឯងអោយល្អសិន បើមិនឆ្នាំក្រោយ ឬឆ្នាំក្រោយមួយទៀត នាងនឹងវិលមកវិញជាថ្មី ព្រោះវិស័យ នេះនាងស្រឡាញ់ និងមានប្រវត្តិតស៊ូណាស់ មុនបានឈ្មោះមកទល់សព្វថ្ងៃនេះ ។ វិស័យបវរកញ្ញា នៅកម្ពុជាសព្វថ្ងៃកំពុងផ្ទុះការគាំទ្រ ហើយបេក្ខភាពដែលមកប្រកួតក៏ឃើញថា មានភាពឆ្លាតវៃ និងចំណេះដឹង ។ ឯមហាជនកាន់តែបាញ់ឆ្ពោះ និងចូលចិត្តតាមដានផងដែរ ។
ចែករំលែកព័តមាននេះ