រាជធានីភ្នំពេញ ៖ ក្រោយពីឈុតខ្លី នៃបទចម្រៀងមួយ ដែលមានចំណងជើង «Are you ok?» រងនូវការរិះគន់ពីសំណាក់អ្នកទស្សនារួចមក តារាចម្រៀងស្រីប្រចាំនៅផលិតកម្ម…
រាជធានីភ្នំពេញ ៖ ក្រោយពីឈុតខ្លី នៃបទចម្រៀងមួយ ដែលមានចំណងជើង «Are you ok?» រងនូវការរិះគន់ពីសំណាក់អ្នកទស្សនារួចមក តារាចម្រៀងស្រីប្រចាំនៅផលិតកម្ម Galaxy Navatra កញ្ញា តន់ ច័ន្ទសីម៉ា បានចេញមកទទួលកំហុសតែម្នាក់ឯង ។
កញ្ញា តន់ ច័ន្ទសីម៉ា បានបង្ហោះនៅលើបណ្តាញសង្គមហ្វេសបុករបស់ខ្លួនកាលពីយប់ថ្ងៃទី១១ តុលា ២០២១ យ៉ាងដូច្នេះថា ៖ “ក្រុមការងារគ្រប់គ្នា ប្រឹងប្រែងអស់លទ្ធភាពហើយ គឺដើម្បីបទចម្រៀងមួយបទ ដោយបំណងចង់អោយអន្តរជាតិស្គាល់ ប្រសិនបើមានកំហុស សូមអោយកំហុសនេះ ធ្លាក់មកលើខ្ញុំចុះ ក្រុមការងារ គ្មានចេតនាណាមួយ ដែលចង់អោយប៉ះពាល់អារម្មណ៍បងប្អូននោះទេ តែបរិបទពិភពលោកមិននៅរងចាំយើងទៀតទេ សរុបមកខ្ញុំជាអ្នកខុស” ។
បទ «Are you ok?» មានឈុតសម្តែង ដោយតារាៗសម្តែង និងតារាចម្រៀង តន់ ច័ន្ទសីម៉ា ស្លៀកឈុតសិស្សសាលា ហើយកាន់កាំភ្លើង ដែលចំណុចនេះហើយ ត្រូវបានមហាជនរិះគន់យ៉ាងចាស់ដៃ ពិសេសពីអ្នកលេងលើបណ្ដាញសង្គម ដោយចោទប្រកាន់ថា ប្រាសចាកក្រមសីលធម៌ ។
ក្រោយពីមានមតិរិះគន់ ភ្លាមៗ អ្នកឧកញ៉ា ឡេង ណាវ៉ាត្រា បានបញ្ជាទៅលោក យឹម តាស្រង់ ដែលជាអ្នកគ្រប់គ្រងផលិតកម្ម ឲ្យលប់ចោលជាបន្ទាន់ វីដេអូឈុតខ្លី នៃបទ are you ok ចេញពីហ្វេសប៊ុកផេក និង TikTok តែម្តង ដោយតម្រូវឲ្យកែសម្រួលថតសម្តែងឡើងសារជាថ្មី ផងដែរ ។
សូមជម្រាបផងដែរថា “Are you ok ?” ជាពាក្យអ្នកលេង Tik Tok ម្នាក់បាននិយាយលេង ហើយត្រូវបានអ្នកភ្លេងម្នាក់យកទៅធ្វើវីដេអូបញ្ជូលគ្នា បង្ហោះនៅលើ Tik Tok ហើយទទួលបានគាំទ្រពីមហាជនជុំវិញពិភពលោក ហើយថ្មីៗនេះ ផលិតកម្ម Galaxy Navatra ទិញសិទ្ធិពាក្យនោះ យកទៅផលិតជាបទចម្រៀងឲ្យមានលក្ខណៈស្ដង់ដារ ក្នុងតម្លៃ ១២.០០០ដុល្លារអាមេរិក ដែលធ្វើឲ្យម្ចាស់ពាក្យ (ឈ្មោះ ម៉ៅ វុធ) មិននឹកស្មានថា មានឱកាសមានលទ្ធភាពទទួលបានប្រាក់ចំនួនច្រើនបែបនេះឡើយ ហើយលោកយកលុយនោះ ទៅធ្វើផ្ទះ និងជួយម្តាយឪពុកខ្លះ ហើយសល់មួយចំនួនទៀត ទុកធ្វើដើមរកស៊ី ។
គិតមកដល់ពេលនេះ បទ ”Are you ok ?” ត្រូវបានអ្នកនិយមលេង Tik Tok បានយក Cover រាំលេងចែករំលែកពាសពេញពិភពលោក រាប់លានដង ដោយមិននឹកស្មានថា វីដេអូបទចម្រៀងរបស់ប្រទេសកម្ពុជា ទទួលបានគាំទ្រភ្លូកទឹកភ្លូកដីបែបនេះនោះឡើយ ៕
ចែករំលែកព័តមាននេះ