ខេត្តកំពង់ចាម ៖ ណាហ្គាវើល បានផ្តល់នូវការបណ្តុះបណ្តាលជំនាញបាល់ទាត់ដល់កុមារ៦០នាក់ មកពីសាលាបឋមសិក្សាសាលាលេខ៥ និងសាលាបឋមសិក្សាអង្គសេរី ស្ថិតក្នុងស្រុក កំពង់ត្រឡាច ខេត្តកំពង់ឆ្នាំងកាលពីពេលថ្មីៗនេះ គោលបំណងចម្បង គឺដើម្បីជួយអភិវឌ្ឍវិស័យកីឡានៅក្នុងប្រទេសកម្ពុជា។
លោក James Ma នាយកផ្នែកទំនាក់ទំនងបុគ្គលិក និងការងារសង្គមណាហ្គាវើល បានមានប្រសាសន៍ថា «ពេលយើងចុះទៅទស្សនៈសិក្សានៅតាមសាលាដំបូង លោកគ្រូអ្នកគ្រូនៅសាលាបឋមសិក្សាអង្គសេរី និងសាលាលេខ៥ បានប្រាប់យើងថា ពួកគេសង្ឃឹមថានឹងទទួលបានសម្ភារកីឡា និងការបណ្តុះបណ្តាលបាល់ទាត់ ដើម្បីជួយអភិវឌ្ឍវិស័យកីឡានៅតាមសាលារបស់ពួកគេ។ ឆ្លើយតបនឹងសំណើរនេះ ថ្ងៃនេះណាហ្គាវើលបេះដូងសប្បុរស បាននាំយកគ្រូបង្វឹកបាល់ទាត់អាជីព និងសម្ភារកីឡាមួយចំនួន ដើម្បីបណ្តុះបណ្តាលកុមារនៅទីនោះ។ បច្ចុប្បន្ននេះ កុមារជាង៦០០នាក់ បានទទួលផលប្រយោជន៍ពីកម្មវិធីបណ្តុះបណ្តាលបាល់ទាត់របស់យើង។ លើការបណ្តុះបណ្តាលបាល់ទាត់នេះ យើងបានឧបត្ថម្ភបាល់ទាត់ និងបាល់ទះជាង៧០០បាល់ ដល់សាលាបឋមសិក្សាសាលាអនុវិទ្យាល័យ និងអង្គការមិនមែនរដ្ឋាភិបាលចំនួន៦០ស្ថាប័នសម្រាប់សម្រួលដល់សកម្មភាពកីឡារបស់ពួកគេ»។
លោក ឆាយ សង្ហា គ្រូបង្វឹកក្លិបបាល់ទាត់ណាហ្គាវើល បានឲ្យដឹងថា «យើងសប្បាយរីករាយដើម្បីបណ្តុះបណ្តា និងចែករំលែកជាមួយកុមារអំពីជំនាញបាល់ទាត់។ ខ្ញុំបានកត់សម្គាល់ឃើញថា កុមារទាំងអស់បានទទួល និងបានយល់អំពីអ្វីដែលខ្ញុំបានបង្រៀនពួកគេ ពីព្រោះពួកគេលេងបានយ៉ាងល្អនៅពេលអនុវត្តចំណេះដឹងរបស់ពួកគេដែលបានរៀនពីការបណ្តុះបណ្តាលរបស់យើង។ ជាមួយនឹងការអនុវត្តន៍កម្មវិធីបណ្តុះបណ្តាលបាល់ទាត់នេះ កុមារនឹងត្រូវបានបង្រៀននូវជំនាញមូលដ្ឋានមួយចំនួនក្នុងការលេងបាល់ទាត់ដូចជាបច្ចេកទេសទទួលបាល់ បច្ចេកទេសគ្រប់គ្រងបាល់ និងបច្ចេកទេសស៊ុតបាល់ ហើយនិងច្បាប់បាល់ទាត់ជាដើម»។
លោកស្រី ខៀវ សុភាព គ្រួបង្រៀននៅសាលាបឋមសិក្សាសាលាលេខ៥ បានឲ្យដឹងថា «ខ្ញុំពិតជាសប្បាយចិត្តខ្លាំងណាស់ដែលឃើញក្រុមហ៊ុនណាហ្គាវើលមកទីនេះ ដើម្បីបណ្តុះបណ្តាលសិស្សរបស់ខ្ញុំ។ ពីមុនយើងធ្លាប់បានស្នើទៅស្ថាប័នផ្សេងៗទៀត អំពីការបណ្តុះបណ្តាលកីឡាបាល់ទាត់ ប៉ុន្តែគ្មានការឆ្លើយតប។ ថ្ងៃនេះក្រុមហ៊ុនណាហ្គាវើលបានមកទីនេះ ដើម្បីជួយបណ្តុះបណ្តាលសិស្សរបស់យើង»។
លោក ម៉ិល ធី ជាគ្រូបង្វឹកសាលាបឋមសិក្សាអង្គសេរី បានមានប្រសាសន៍ថា «យើងសូមអរគុណដល់ណាហ្គាវើលសម្រាប់ការផ្តល់ទាំងការបណ្តុះបណ្តាលបាល់ទាត់ និងសម្ភារកីឡា។ គ្មានក្រុមហ៊ុនណាមកទីនេះដើម្បីជួយ និងបណ្តុះបណ្តាលកុមាររបស់យើងអំពីរបៀបលេងបាល់ទាត់ឡើយ។ ឥឡូវនេះ ណាហ្គាវើលមកទីនេះ ហើយថែមទាំងនាំយកគ្រូបង្វឹក ដើម្បីបង្រៀងពួកគេថែមទៀត។ ខ្ញុំបានសង្កេតឃើញថា បន្ទាប់ពីបណ្តុះបណ្តាលរួចមក កុមារអាចលេងបានយ៉ាងល្អ ដោយសារតែគ្រូបង្វឹកល្អដែរ។ កម្មវិធីបណ្តុះបណ្តាលបាល់ទាត់នេះ ដែលបានផ្តល់ដោយណាហ្គាវើលបេះដូងសប្បុរស វានឹងជួយអភិវឌ្ឍបាល់ទាត់ក៏ដូចជាវិស័យកីឡាមួយក្នុងប្រទេសកម្ពុជាឲ្យមានការរីកចំរើនមួយកម្រិតទៀត»៕
ចែករំលែកព័តមាននេះ