ខេត្តកំពង់ចាម ៖ ណាហ្គាវើលបេះដូងសប្បុរស តែងតែផ្តល់នូវជំនួយផ្នែកសម្ភារសិក្សាដល់សិស្សក្រីក្រ និងកុមារកំព្រានៅតាមបណ្ដាខេត្តនានា ។ ជាក់ស្តែងកាលពីថ្ងៃទី១៣ កុម្ភៈ ឆ្នាំ២០១៦ ណាហ្គាវើលបេះដូងសប្បុរស
ខេត្តកំពង់ចាម ៖ ណាហ្គាវើលបេះដូងសប្បុរស តែងតែផ្តល់នូវជំនួយផ្នែកសម្ភារសិក្សាដល់សិស្សក្រីក្រ និងកុមារកំព្រានៅតាមបណ្ដាខេត្តនានា ។ ជាក់ស្តែងកាលពីថ្ងៃទី១៣ កុម្ភៈ ឆ្នាំ២០១៦ ណាហ្គាវើលបេះដូងសប្បុរស បានចែកសម្ភារសិក្សាដល់សិស្សានុសិស្សនៃសាលាបឋមសិក្សាព្រៃត្បះចំនួន៣៨១នាក់ នៅស្រុកស្រីសន្ធរ ខេត្តកំពង់ចាម ។
លោក James Ma នាយកផ្នែកទំនាក់ទំនងបុគ្គលិក និងការងារសង្គមណាហ្គាវើល បានមានប្រសាសន៍ថា៖«ណាហ្គាវើលបេះដូងសប្បុរសបាននាំយកនូវក្តីសង្ឃឹមសម្រាប់សិស្សក្រីក្រ និងកុមារកំព្រាដែលកំពុងប្រឈមនឹងភាពលំបាកនៃការខ្វះខាតថវិកាក្នុងការទិញសម្ភារសិក្សា ។ យើងបានចែកសម្ភារសិក្សាដល់សិស្សទាំងអស់ចំនួន៣៨១នាក់ដែលកំពុងត្រូវការជាចាំបាច់នូវសម្ភារសិក្សាដែលអាចឲ្យសិស្សានុសិស្សបន្តការសិក្សារបស់ពួកគេទៀត ។ រហូតមកដល់បច្ចុប្បន្ននេះ ណាហ្គាវើលបេះដូងសប្បុរសបានឧបត្ថម្ភសម្ភារសិក្សាជាច្រើនដល់កុមារក្រីក្រកម្ពុជា ដែលត្រូវការនូវសម្ភារសិក្សាជាចាំបាច់ចំនួនជាង៧០.០០០នាក់ ។ តាមរយៈការឧបត្ថម្ភនូវសម្ភារសិក្សាដល់កុមារកម្ពុជា ណាហ្គាវើលបេះដូងសប្បុរសសង្ឃឹមថា កុមារកម្ពុជានឹងត្រូវបានលើកទឹកចិត្តឲ្យខិតខំជាងមុន ដើម្បីអនាគតភ្លឺស្វាងរបស់ពួកគេ និងប្រទេសកម្ពុជា» ។
កញ្ញា ជា ដានី បុគ្គលិកណាហ្គាវើលផ្នែករៀបចំកម្មវិធីកម្សាន្ត ដែលបានចូលរួមក្នុងកម្មវិធីនេះ បាននិយាយថា៖«ខ្ញុំរីករាយខ្លាំងណាស់ដែលបានចូលរួមក្នុងកម្មវិធីចែកសម្ភារសិក្សាដែលបានរៀបចំដោយណាហ្គាវើលបេះដូងសប្បុរស ។ ខ្ញុំគិតថា កម្មវិធីនេះគឺមានសារសំខាន់ខ្លាំងណាស់ដើម្បីជួយដល់សិស្សក្រីក្រ និងកុមារកំព្រា ដែលមិនមានលទ្ធភាពទិញសម្ភារសិក្សាទាំងនេះ ។ ខ្ញុំពិតជាមានមោទនភាពណាស់ចំពោះអ្វីដែលក្រុមហ៊ុនរបស់ខ្ញុំបានធ្វើសម្រាប់សហគមន៍របស់យើង» ។
លោក យ៉ាង យុន នាយកសាលាបឋមសិក្សាព្រៃត្បះ បានមានប្រសាសន៍ថា៖«យើងសូមថ្លែងអំណរគុណយ៉ាងជ្រាលជ្រៅចំពោះណាហ្គាវើលបេះដូងសប្បុរសសម្រាប់ការរួមចំណែករបស់ពួកគេ ។ នេះជាលើកដំបូងហើយដែលក្រុមហ៊ុនឯកជនបានមកទស្សនកិច្ចសិក្សានៅសាលារបស់យើង។ សាលារៀនរបស់យើងមានទីតាំងស្ថិតនៅក្នុងតំបន់ដាច់ស្រយាល ដូច្នេះហើយគ្មានក្រុមហ៊ុនណាធ្លាប់បានមកទីនេះដើម្បីជួយសិស្សរបស់យើងនោះទេ ។ វត្តមានរបស់ណាហ្គាវើលបេះដូងសប្បុរស ខ្ញុំជឿថាកុមារនឹងត្រូវបានលើកទឹកចិត្តឱ្យខិតខំសិក្សាបន្តទៀត ដូច្នេះហើយពួកគេនឹងមិនធ្វើឲ្យណាហ្គាវើលបេះដូងសប្បុរសខកចិត្តឡើយ ។ ខ្ញុំសង្ឃឹមថាណាហ្គាវើលបេះដូងសប្បុរសនឹងនៅតែបន្តការចូលរួមចំណែករបស់ពួកគេដល់សហគមន៍របស់យើង» ៕
ចែករំលែកព័តមាននេះ