រាជធានីភ្នំពេញ ៖ មន្ទីរពេទ្យរ៉ូយ៉ាល់ភ្នំពេញ សហការជាមួយមជ្ឈមណ្ឌលជាតិផ្តល់ឈាម និងក្រុមហ៊ុនថៃមួយចំនួនទៀតដែលជាដៃគូ បានរៀបចំកម្មវិធីបរិច្ចាគឈាមទៅដល់មជ្ឈមណ្ឌលជាតិផ្ដល់ឈាម ដើម្បីយកអំណោយឈាម
រាជធានីភ្នំពេញ ៖ មន្ទីរពេទ្យរ៉ូយ៉ាល់ភ្នំពេញ សហការជាមួយមជ្ឈមណ្ឌលជាតិផ្តល់ឈាម និងក្រុមហ៊ុនថៃមួយចំនួនទៀតដែលជាដៃគូ បានរៀបចំកម្មវិធីបរិច្ចាគឈាមទៅដល់មជ្ឈមណ្ឌលជាតិផ្ដល់ឈាម ដើម្បីយកអំណោយឈាមនោះទៅជួយសង្គ្រោះជនរងគ្រោះដែលត្រូវការឈាមជាបន្ទាន់ដើម្បីសង្គ្រោះជីវិត ។ កម្មវិធីបរិច្ចាគឈាមនេះធ្វើឡើងកាលពីព្រឹកថ្ងៃទី៤ មីនា ២០១៦ នៅមន្ទីរពេទ្យរ៉ូយ៉ាល់ភ្នំពេញ ស្ថិតនៅតាមបណ្ដោយមហាវិថីសហព័ន្ធរុស្ស៊ី ដោយមានអ្នកចូលរួមបរិច្ចាគសរុបចំនួន១២០នាក់ ។
លោកវេជ្ជបណ្ឌិត វ៉ាត់សាន់ អាភីវ៉ាតាណាគុណ(Watson Appiwatanakoon)នាយករង មន្ទីពេទ្យរ៉ូយ៉ាល់ភ្នំពេញបានមានប្រសាសន៍ថា សកម្មភាពនេះ គឺជាការឆ្លុះបញ្ចាំងនៃកិច្ចសហការរវាងក្រុមហ៊ុនអ្នករកស៊ីថៃនៅស្រុកខ្មែរព្រោះថា ឈាមមិនរើសសញ្ជាតិទេ មិនថាក្រុមសញ្ជាតិណាមួយទេ វាតែប្រភេទ A , B , AB និង O ហើយក្រុមទាំងនេះសញ្ជាតិណាក៏មានដែរ។ លោកបានបន្តថា នេះគឺជាសកម្មភាពគំរូមួយនៃការសហការរវាងអ្នករកស៊ីជាមួយមជ្ឈមណ្ឌលជាតិផ្តល់ឈាមដែលមានបុគ្គលិកទាំងខ្មែរនិងថៃមកបរិច្ចាគឈាមជួយជីវិតជនរងគ្រោះដែលត្រូវការឈាមបន្ទាន់សម្រាប់សង្គ្រោះជីវិត ។
លោកបន្ថែមថា អ្នកជំងឺដែលត្រូវការឈាមវាជារឿងសំខាន់ ហើយការដែលជួយអ្នកជំងឺមិនថាមន្ទីរពេទ្យរ៉ូយ៉ាល់ភ្នំពេញឬមន្ទីរពេទ្យផ្សេងៗទៀតនោះទេ គឺជារឿងដែលយើងទាំងអស់គ្នាមានកាតព្វកិច្ចជួយគ្នាទៅវិញទៅមក ក្នុងពេលអ្នកជំងឺត្រូវការឈាម ។ លោកវេជ្ជបណ្ឌិត វ៉ាត់សាន់ អាភីវ៉ាតាណាគុណ បានសន្យាថា ដើម្បីចូលរួមជួយសង្គ្រោះអាយុជីវិតមនុស្សនោះមន្ទីរពេទ្យរបស់លោកនឹងរៀបចំឱ្យមានកម្មវិធីផ្តល់ឈាមនេះក្នុង១ឆ្នាំ៣ទៅ៤ដង ដើម្បីផ្តល់ឈាមដល់មជ្ឈមណ្ឌលផ្តល់ឈាមបែងចែកទៅតាមមន្ទីរពេទ្យនានាជួយសង្គ្រោះដល់អ្នកជំងឺត្រូវការឈាម ។
លោកវេជ្ជបណ្ឌិត ហុក គឹមចេង ប្រធានមជ្ឈមណ្ឌលជាតិផ្តល់ឈាម បានមានប្រសាសន៍ថា បន្ទាប់ពីការអំពាវនាវរបស់ប្រមុខរាជរដ្ឋាភិបាលឃើញថា យុវជន ប្រជាជន និងក្រុមវិស័យឯកជន មន្ទីរ អង្គភាព ស្ថាប័នទាំងអស់បានចូលរួមបរិច្ចាគឈាមជាបន្តបន្ទាប់ហើយមានភាពសកម្មជាងមុន ។ វាជាក្តីសង្ឃឹមមួយឆ្ពោះទៅមុខដើម្បីទទួលបាននូវអំណោយឈាមដែលចេញប្រភពមកពីអ្នកស្ម័គ្រចិត្ត ច្រើនៗឡើងជាបន្តបន្ទាប់ ។ ជាក់ស្តែងថ្ងៃនេះមជ្ឈមណ្ឌលជាតិផ្តល់ឈាមបានសហការជាមួយមន្ទីរពេទ្យរ៉ូយ៉ាល់ភ្នំពេញដើម្បីជំរុញឱ្យសហគមន៍ថៃ ដែលមានក្រុមហ៊ុននិងវិស័យឯកជនរកស៊ីនៅកម្ពុជាទាំងអស់ចូលរួមបរិច្ចាគឈាម ។ លោកបន្តថា នៅដើមឆ្នាំ២០១៦នេះ ខុសពីឆ្នាំមុនៗ ដោយយើងឃើញថាសកម្មភាពបរិច្ចាគឈាមពីសប្បុរសជននៅឆ្នាំ២០១៦នេះ មានភាពប្រសើរឡើងជាពិសេសនៅរាជធានីភ្នំពេញ ក្នុងមួយខែៗ យើងអាចទទួលឈាមបានជិត៣ពាន់ប្លោក ។
លោកបញ្ជាក់ថា នៅឆ្នាំ២០២០ មជ្ឈមណ្ឌលជាតិផ្ដល់ឈាមនឹងខិតខំធ្វើយ៉ាងផ្សព្វផ្សាយឱ្យពលរដ្ឋកម្ពុជាយល់ដឹង និងចូលរួមបរិច្ចាគឈាមជូនមជ្ឈមណ្ឌលជាតិផ្ដល់ឈាមឱ្យបាន១០០%សម្រាប់យកអំណោយឈាមទាំងនោះទៅសង្គ្រោះជីវិតជនរងគ្រោះនៅតាមមន្ទីរពេទ្យនានា ដោយមជ្ឈមណ្ឌលជាតិផ្ដល់ឈាម នឹងរៀបចំឱ្យមានមជ្ឈមណ្ឌលនៅតាមបណ្ដាខេត្តផងដែរ ៕
ចែករំលែកព័តមាននេះ