គណៈបញ្ជារការឯកភាពខណ្ឌចំការមន បានដឹកនាំកម្លាំងចម្រុះ ចុះបង្ក្រាបទីតាំង ហ្គេមបា.ញ់ត្រីដែលលួចបើកផ្គើននឹងសេចក្ដីសំរេចរបស់រដ្ឋបាលរាជធានីភ្នំពេញ ក្នុងការចូលរួមទប់ស្កាត់នៃការឆ្លង
រាជធានីភ្នំពេញ ៖ គណៈបញ្ជារការឯកភាពខណ្ឌចំការមន បានដឹកនាំកម្លាំងចម្រុះ ចុះបង្ក្រាបទីតាំង ហ្គេមបាញ់ត្រីដែលលួចបើកផ្គើននឹងសេចក្ដីសំរេចរបស់រដ្ឋបាលរាជធានីភ្នំពេញ ក្នុងការចូលរួមទប់ស្កាត់នៃការឆ្លងរីករាលនៃជំងឺកូវីដ១៩ ។
នៅក្នុងប្រតិបត្តិការខាងលើនេះ បានធ្វើឡើងនៅវេលាម៉ោង១០យប់ ថ្ងៃទី១៧ ខែកញ្ញា ឆ្នាំ២០២១ នៅទីតាំងយីហោ «ជីនសេង ទីក្រុងអាននីម» ស្ថិតនៅតាមបណ្ដោយផ្លូវលេខ៧៨ ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ ។
តាមកម្លាំងសមត្ថកិច្ច បានអោយដឹងថា មុននឹងឈានទៅដល់ការបង្ក្រាបទីតាំងខាងលើ គឺកម្លាំងគណៈបញ្ជាការឯកភាពខណ្ឌចំការមន ដឹកនាំដោយលោក កែវ សំណាង អភិបាលរងខណ្ឌ ជួសមុខអោយលោក ថេង សុថុល អភិបាលខណ្ឌនៃគណៈអភិបាលខណ្ឌចំការមន បានដឹកនាំកម្លាំងចម្រុះមានទាំង កម្លាំងនគរបាលខណ្ឌ កម្លាំងអាវុធហត្ថខណ្ឌ រួមទាំងកម្លាំងប្រជាការពារខណ្ឌ បានធ្វើការល្បាតក្នុងមូលដ្ឋាន និងអនុវត្តន៍តាមសេចក្ដីសម្រេចរបស់រដ្ឋបាលរាជធានីភ្នំពេញ ក្នុងការចូលរួមទប់ស្កាត់នៃការឆ្លងរីករាលនៃជំងឺកូវីដ១៩ ហើយក៏បានមកដល់ទីតាំងខាងលើលើ រួចក៏ឃើញមានការប្រមូលផ្ដុំមនុស្ស លេងល្បែងស៊ីសង ហ្គេមបាញ់ត្រី ដែលផ្គើននឹងវិធានការរដ្ឋបាលរបស់សាលារាជធានីភ្នំពេញ ទើបកម្លាំងសមត្ថកិច្ចធ្វើការឃាត់ខ្លួនជនប្រុសស្រីចំនួន៧នាក់ ក្នុងនោះមានប្រុស៣នាក់ ដែលកំពុងតែនាំគ្នាលេងល្បែងស៊ីសងនៅក្នុងទីតាំងនោះផងដែរ ។
សមត្ថកិច្ចបានអោយដឹងទៀតថា ក្នុងការបង្ក្រាបខាងលើនេះ សមត្ថកិច្ចបានធ្វើបិទឃ្លុបបេទីតាំងនោះជាបណ្តោះអាសន្ន តែមិនបានធ្វើការដកហូតយកសំភារៈអ្វីនោះទេ ហើយចំណែកមនុស្សប្រុសស្រីចំនួន៧នាក់ ក៏ត្រូវបានសមត្ថកិច្ចនាំខ្លួនបញ្ជូនទៅអធិការដ្ឋាននគរបាលខណ្ឌចំការមន ដើម្បីក្រុមគ្រូពេទ្យយកសំណាក រួចក៏ប្រគល់អោយសមត្ថកិច្ចចាត់ការចាត់ការនីតិវិធីច្បាប់ផងដែរ ។
ចែករំលែកព័តមាននេះ