រាជធានីភ្នំពេញ ៖ ទីបំផុត ការដោះស្រាយវិវាទរវាងមន្ត្រីនគរបាលខណ្ឌ៧មករា មួយរូប ដែលជាប់ចោទថា បានប្រើអាយកូមវាយក្បាលនារីជិះម៉ូតូមិនពាក់មួកសុវត្តិភាព មិនគោរពច្បាប់ចរាចរបើកបញ្ច្រាស់ទិស នៅព្រឹកថ្ងៃទី១០ ខែកញ្ញា ឆ្នាំ២០២១នេះ ត្រូវបានសមត្តកិច្ចនគរបាលផ្នែកព្រហ្មទណ្ឌខណ្ឌ៧មករា បញ្ជូនទៅកាន់សាលាដំបូងរាជធានីភ្នំពេញ ដើម្បីចាត់តាមផ្លូវច្បាប់ ។
មន្ត្រីនគរបាលរូបនោះឈ្មោះ ម៉ាត់ ពិសី ភេទប្រុស អាយុ៣០ឆ្នាំ មានឋាននន្ទរស័ក្តអនុសេនីយ៍ទោ បម្រើការងារនៅផ្នែកអន្តរាគមន៍ នៃអធិការដ្ឋាននគរបាលខណ្ឌ៧មករា រាជធានីភ្នំពេញ ។
បើតាមសមត្តកិច្ចឲ្យដឹងថា លោក ម៉ាត់ ពិសី ត្រូវបាននគរបាលផ្នែកព្រហ្មទណ្ឌខណ្ឌ៧មករា កសាងសំណុំរឿងចោទប្រកាន់ជាបណ្តោះអាសន្ន ពីបទ.ហិង្សា តាមមាត្រា ២១៧ នៃក្រមព្រហ្មទណ្ឌ ។
សំណុំរឿងដដែលនោះ បានចោទប្រកាន់ លើអ្នកបើកបរម៉ូតូ មិនគោរពច្បាប់ចរាចរណ៍ឈ្មោះ ងន សិលា ភេទប្រុស អាយុ១៨ ពីបទ.មិនបង្គាប់បញ្ជា តាមមាត្រា ៥៤១ នៃក្រមព្រហ្មទណ្ឌ ដូចគ្នា ដែលសំណុំរឿងបានស្ថិតនៅលោក ឆាយ ហុង ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ បើកការស៊ើបសួរ ។
ប្រភពព័ត៌មាន បានឲ្យដឹងទៀតថា បានជាសមត្តកិច្ចកសាងសំណុំរឿងបញ្ជូនមន្ត្រីនគរបាល ជាប់សង្ស័យ ប្រើអាយកូមវាយបែកក្បាលនារីជិះម៉ូតូនោះ ដោយការដោះស្រាយសំណងរដ្ឋប្បវេណី មិនត្រូវរ៉ូវគ្នា រវាងភាគីទាំងពីរ ដោយខាងនារីរងរបួស បានទាមទារប្រាក់សំណង ក្នុងការថ្លៃព្យាបាលរហូតដល់ទៅ ១០,០០០ដុល្លារអាមេរិក ចំណែកមន្ត្រីនគរបាលគឺលោក ម៉ាត់ ពិសី មិនមានលទ្ធភាព ដូច្នោះសំណងរដ្ឋប្បវេណី នៅមិនទាន់បានរលាត់ ទើបសមត្តកិច្ច ត្រូវតែអនុវត្តទៅតាមផ្លូវច្បាប់ ។
ហេតុការណ៍ខាងលើនេះ បានកើតឡើងនាវេលាម៉ោងជិត៨យប់ថ្ងៃទី៨ ខែកញ្ញា ឆ្នាំ២០២១ នៅប៉ុស្តិ៍ត្រួតពិនិត្យបទល្មើសនឹងច្បាប់ចរាចរណ៍ របស់សមត្ថកិច្ច នៃអធិការដ្ឋាននគរបាលខណ្ឌ៧មករា ចំណុចម្ដុំអាងទឹកពហុកីឡដ្ឋានជាតិអូឡាំពិក តាមបណ្ដោយផ្លូវ ២១៥ សង្កាត់វាលវង់ ខណ្ឌ៧មករា រាជធានីភ្នំពេញ ។
តាមរយៈវីដេអូរបស់ក្មេងប្រុសម្នាក់ ដែលបានថតផ្សាយផ្ទាល់លើបណ្តាញសង្គម TikTok បានបង្ហាញថា មុនពេលកើតហេតុជនរងគ្រោះ ពីរនាក់បងប្អូន បានជិះម៉ូតូដោយមិនពាក់មួកសុវត្ថិភាព ពេលនោះ ជិះនៅតាមបណ្ដោយផ្លូវ ២១៥ មកដល់ម្ដុំអាងទឹកពហុកីឡដ្ឋានជាតិអូឡាំពិក ចំណុចគោលដៅត្រួតពិនិត្យ ក៏ព្យាយាមជិះបកក្រោយវិញ ហើយក៏ត្រូវមន្ត្រីនគរបាល យកទិទ្យុទាកទងវាយ បណ្តាលឲ្យនារីជិះខាងក្រោយបែកក្បាល (ដេរ៣ថ្នេរ) និងធ្លាក់ពីលើម៉ូតូផងដែរ ។ ពេលធ្លាក់នោះ នាងបានបោកក្បាលនឹងថ្នល់ ហើយវិលមុខ ក៏បានស្រែកឲ្យមន្ត្រីប៉ូលិសរូបនោះជួយលើក និងជួយជូនទៅពេទ្យ ប៉ុន្តែមន្ត្រីប៉ូលិស បែរជានិយាយថា នារីរងគ្រោះ សម្តែងទៅវិញ ? ។
ក្រោយកើតហេតុ នាំឲ្យមានមតិប្រជាជាពលរដ្ឋជាច្រើន បានថ្កោលទោសយ៉ាងខ្លាំងលើមន្ត្រីនគរបាល ដែលប្រើហិង្សា ហើយក៏មានមតិមួយចំនួនទៀត បន្ទោសទៅលើនារីរងរបួសថា មិនគួរណាល្មើសនឹងច្បាប់ចរាចរណ៍ផ្លូវគោក អត់ពាក់មួកសុវត្ថិភាពនោះដែរ ៕
«អធិការរងខណ្ឌ៧មករា រង់ចាំនារីរងរបួស ចូលខ្លួនមករកដំណោះស្រាយ ករណីប៉ូលិសម្នាក់វាយបែកក្បាលពេលបើកបរល្មើសច្បាប់»
«វីដេអូស្តែងៗ ប៉ូលិសខណ្ឌ៧មករាមួយរូប យកអាយកូមវាយនារីម្នាក់រ.យះក្បាល ធ្លាក់ពីលើម៉ូតូ»
«អត់មួកសុវត្ថិភាព ជិះម៉ូតូគេច ប៉ូលិសខណ្ឌ៧មករា យកអាយកូមវាយក្បាលនារីម្នាក់បែក ?»
ចែករំលែកព័តមាននេះ