រាជធានីភ្នំពេញ ៖ នាយកដ្ឋានកិច្ចការបរទេស និងពាណិជ្ជកម្ម (DFAT) ប្រទេសអូស្ត្រាលី និងមូលនិធិអង្គការសហប្រជាជាតិ (UNDP) បានចុះហត្ថលេខាលើកិច្ចព្រមព្រៀងថវិកាជំនួយសម្រាប់គាំទ្រ
រាជធានីភ្នំពេញ ៖ នាយកដ្ឋានកិច្ចការបរទេស និងពាណិជ្ជកម្ម (DFAT) ប្រទេសអូស្ត្រាលី និងមូលនិធិអង្គការសហប្រជាជាតិ (UNDP) បានចុះហត្ថលេខាលើកិច្ចព្រមព្រៀងថវិកាជំនួយសម្រាប់គាំទ្រ «គម្រោងបោសសំអាតមីន ដើម្បីលទ្ធផលដំណាក់កាលទី៣» មានទឹកប្រាក់ចំនួន៩លានដុល្លារអូស្ត្រាលី កាលពីថ្ងៃទី១២ មករា នៅអគ្គលេខាធិការដ្ឋានអាជ្ញាធរមីន ។ ពិធីចុះហត្ថលេខាគាំទ្រគម្រោងបោសសំអាតមីនដំណាក់កាលទី៣ នេះ មានការអញ្ជើញចូលរួមពីលោកស្រី Alison Burrows ឯកអគ្គរដ្ឋទូតប្រទេសអូស្ត្រាលីប្រចាំនៅកម្ពុជា និងលោក Napoleon Navaro នាយករងប្រចាំប្រទេសរបស់អង្គការយូអិនឌីភី និងក្រោមអធិបតីភាពរបស់លោកប្រាក់ សុខុន រដ្ឋមន្ត្រីក្រសួងប្រៃសណីយ៍ និងទូរគមនាគមន៍ និងជាអនុប្រធានទី១ អាជ្ញាធរមីន។
លោកប្រាក់ សុខុន មានប្រសាសន៍ថ្លែងអំណរគុណ និងដឹងគុណចំពោះរដ្ឋាភិបាលប្រទេសអូស្ត្រាលី ដែលបានបន្តផ្តល់ជាមូលនិធិ ដើម្បីជួយគាំទ្រដល់រាជរដ្ឋាភិបាលកម្ពុជា ក្នុងការជួយសង្គ្រោះអាយុជីវិត និងអនាគតសម្រាប់ប្រជាជនកម្ពុជា ដែលកំពុងជួបផលប៉ះពាល់ដោយសារមីន និងសំណល់ជាតិផ្ទុះពីសង្គ្រាម។
លោកគូសបញ្ជាក់ថា «យោងទៅលើការគណនាថ្មីៗនេះ បានបង្ហាញថា ផ្ទៃដីមានផលប៉ះពាល់ដោយសារមីន និងសំណល់ជាតិផ្ទុះពីសង្គ្រាមនៅកម្ពុជាមានប្រមាណ១.៦៤០គីឡូម៉ែត្រក្រឡា ដែលកម្ពុជាត្រូវធ្វើការបោសសំអាតចាប់ពីឆ្នាំ២០១៦ ដល់ឆ្នាំ២០២៥ និងត្រូវការថវិកាសម្រាប់ធ្វើការបោសសំអាតប្រមាណ៣៦០លានដុល្លារអាមេរិក» ។
គិតពីខែមករា ដល់ដំណាច់ខែតុលា ឆ្នាំ២០១៥ បានធ្វើការបោសសំអាតមីនសម្រេចលើផ្ទៃដី ១៨៤គីឡូមែត្រក្រឡា រកឃើញមីនប្រឆាំងមនុស្ស១៤.៤៤៨គ្រាប់ មីនប្រឆាំងរថក្រោះ៣២៧គ្រាប់ សំណល់ជាតិផ្ទុះពីសង្គ្រាម៥៥.៨១៨គ្រាប់»។
លោកបន្ថែមថា «គិតពីខែមករា មកដល់ដំណាច់ខែធ្នូ ឆ្នាំ២០១៥ ជនរងគ្រោះមានចំនួន១១១នាក់ បើប្រៀបធៀបនឹងរយៈពេលដូចគ្នាឆ្នាំមុនមាន១៥៤នាក់ ថយចុះ៤៣នាក់ ត្រូវជា២៨%។ ក្នុងនោះមានអ្នករបួស៣៩នាក់ របួសដោយសារមីន១៤នាក់ ពិកាដោយសារគ្រាប់មីន១១នាក់ ពិការដោយសារសំណល់ជាតិផ្ទុះពីសង្គ្រាម១២នាក់ ស្លាប់ដោយសារមីន០៥នាក់ ស្លាប់ដោយសារសំណល់ជាតិផ្ទុះពីសង្គ្រាម១៣នាក់ សរុបស្លាប់១៨នាក់ បើប្រៀបធៀបនឹងរយៈពេលដូចគ្នាឆ្នាំមុនមានមនុស្សស្លាប់២១នាក់ ថយចុះ០៣នាក់ ត្រូវជា១៤%»៕
ចែករំលែកព័តមាននេះ