ខេត្តកំពង់ឆ្នាំង ៖ រដ្ឋបាលសាលាស្រុកបរិបូណ៌ កាលពីរសៀលថ្ងៃទី៩ សីហា ឆ្នាំ២០២១ បានចេញសេចក្តីបំភ្លឺមួយ បន្ទាប់ពេលមានបណ្ដាញសង្គមបានបង្ហោះរូបភាពអមដោយខ្លឹមសារខ្លីៗថា ដីព្រៃលិចទឹកត្រូវបានគេឈូសរំលោភយកសល់តែស្លាកហាមឃាត់ ។…
ខេត្តកំពង់ឆ្នាំង ៖ រដ្ឋបាលសាលាស្រុកបរិបូណ៌ កាលពីរសៀលថ្ងៃទី៩ សីហា ឆ្នាំ២០២១ បានចេញសេចក្តីបំភ្លឺមួយ បន្ទាប់ពេលមានបណ្ដាញសង្គមបានបង្ហោះរូបភាពអមដោយខ្លឹមសារខ្លីៗថា ដីព្រៃលិចទឹកត្រូវបានគេឈូសរំលោភយកសល់តែស្លាកហាមឃាត់ ។ សូមរំលឹកថា ៖ ដីព្រៃលិចទឹកក្នុងភូមិសាស្ត្រភូមិសេះស្លា.ប់ នៅតែមានគេលួចឈូសឆាយយកធ្វើជាកម្មសិទ្ធិ
ក្នុងសេចក្តីជូនដំណឹងរបស់រដ្ឋបាលសាលាស្រុកបរិបូរណ៌បានបញ្ជាក់ថា៖ សាលាស្រុកបរិបូណ៌មានកិត្តិយស សូមបកស្រាយបំភ្លឺជូនសាធារណៈជន បណ្ដាញសង្គម និងសារព័ត៌មានទាំងអស់ មេត្តាជ្រាបថា៖កន្លងមកនេះ (ពិតជាមានការលួចចូលទន្ទ្រានដីព្រៃលិចទឹកពេលយប់ នៅតំបន់ត្រពាំងត្រស់ ជាប់ព្រំប្រទល់ភូមិល្បើក និងភូមិកំពង់អួរ ឃុំខុនរ៉ង ពិតប្រាកដមែន ហើយកម្លាំងគណៈបញ្ជាការឯកភាព រដ្ឋបាលស្រុកនិងសមត្ថកិច្ចជំនាញបានចុះទៅពិនិត្យចុច GPS លើផ្ទៃដីដែលបានខូចខាតឃើញមានទំហំប្រហែល26ហិកតា ដោយបានបោះស្លាកហាមឃាត់៦ស្លាក និងកំណត់មុខសញ្ញាជនល្មើសចំនួន៤នាក់ បានកសាងសំណុំរឿងបញ្ជូនទៅតុលាការអស់ហើយ ។
សូមបញ្ជាក់ថា កន្លងមកនេះ អភិបាលស្រុកបានយកចិត្តទុកដាក់នូវការផ្សព្វផ្សាយច្បាប់ស្តីពីជលផល និងទោសទណ្ឌប្បញ្ញត្តិផ្សេងៗ ជូនដល់គណៈបញ្ជាការឯកភាពរដ្ឋបាលឃុំពិសេសតែងតែដឹកនាំកម្លាំងចម្រុះចុះពិនិត្យមើលផ្ទៃដីលិចទឹកជាប់ជាប្រចាំ នៅគ្រប់តំបន់ទាំងអស់ ធ្វើយ៉ាងណារួមចំណែកថែរក្សាការពារព្រៃលិចទឹក ដែលជាជម្រកត្រីពងកូន ឲ្យខានតែបានដាច់ខាត ទោះបីមិនបានទាំងស្រុងក៏ដោយ ។ ក្នុងន័យនេះរដ្ឋបាលស្រុកបរិបូណ៌ សូមថ្លែងអំណរគុណយ៉ាងជ្រាលជ្រៅ ដល់បណ្ដាញសង្គមហ្វេសប៊ុកទាំងអស់ ដែលបានចូលរួមផ្ដល់ព័ត៌មាន ក្នុងន័យរិះគន់ស្ថាបនា ព្រោះរាល់ការផ្ដល់ព័ត៌មានដែលមានភាពច្បាស់លាស់ និងគ្រប់ជ្រុងជ្រោយជាយន្តការ ក្នុងការជួយជំរុញដល់ការអនុវត្តតួនាទីភារកិច្ចរបស់គណៈអភិបាលស្រុក ឲ្យកាន់តែមានប្រសិទ្ធភាពខ្ពស់ថែមទៀត។
សូមរំឮកដែរថា៖ កាលពីថ្ងៃ៧ សីហា កន្លងមក ក្រុមអ្នកសារព័ត៌មានមួយក្រុមមានគ្នា៤នាក់ បានទៅថតផ្តិតយករូបភាពដោយផ្ទាល់ និងដោយត្រូន ដីព្រៃលិចទឹក នៅក្នុងភូមិសាស្ត្រភូមិភូមិល្បើក និងភូមិកំពង់អួរ ក្នុងឃុំខុនរ៉ងស្រុកបរិបូរណ៌ ។ ក្រោយពេលថតចប់ពេលចេញមកវិញ មិនទាន់បានចេញផ្សាយទេ ព្រោះចុងសប្តាហ៍ ត្រូវរង់ចាំដាក់ផ្សាយនៅដើមសប្តាហ៍ក្រោយ ។ប៉ុន្តែក្នុងនោះ ដោយឃើញរូបភាព មានស្លាកហាមឈូសឆាយដីព្រៃលិចទឹក បែជាត្រូវគេឈូសឆាយព្រៃលិចទឹកអស់ទៅវិញ ។ ទើបនាំគ្នាបង្ហោះក្នុងបណ្តាញសង្គម នូវរូបភាពនិងខ្លឹមសារខ្លីមានន័យថា៖ មានស្លាកហាម តែព្រៃលិចទឹកអស់រលីង។
ក្នុងន័យនេះ សូមបញ្ជាក់ថា៖ សារព័ត៌មាន គ្មានចេតនាបន្ទោសបង្អាប់ដល់រដ្ឋអំណាច ឬមន្ត្រីជំនាញនោះទេ គឺគ្រាន់តែចង់បង្ហាញពីការរិចរិលព្រៃលិចទឹកដែលចេះតែហិនហោចពីមួយឆ្នាំទៅមួយឆ្នាំ ម្តងបន្តិចៗ ពីសំណាក់ជនខិលខូច ដែលប្រើរូបភាពឆ្លៀតឱកាសទាំងថ្ងៃទាំងយប់តែប៉ុណ្ណោះ ហើយមិនមែនតែតំបន់នឹងនោះទេ គឺមានគ្រប់តំបន់ដែលមានព្រៃលិចទឹក ។ សង្ឃឹមថា៖ ជនខិលខូចដែលតែងតែបំពាននឹងត្រូវទទួលទោសចំពោះមុខច្បាប់ ជាមួយគ្នានេះ ដីព្រៃលិចទឹកនឹងត្រូវបានមកជាសម្បត្តិរដ្ឋវិញ លែងជាកម្មសិទ្ឋបុគ្គលជាក់ជាពុំខានឡើយ ៕
ចែករំលែកព័តមាននេះ