ខេត្តកំពង់ឆ្នាំង ៖ ក្នុងឱកាសដឹកនាំមន្ត្រីជំនាញចុះពិនិត្យមើលដំណើរការសាងសង់ទីលានចាក់សំរាមរបស់ក្រុងកំពង់ឆ្នាំង នាព្រឹកថ្ងៃទី០៣ ខែសីហា ឆ្នាំ២០២១នេះ ឯកឧត្ដម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង…
ខេត្តកំពង់ឆ្នាំង ៖ ក្នុងឱកាសដឹកនាំមន្ត្រីជំនាញចុះពិនិត្យមើលដំណើរការសាងសង់ទីលានចាក់សំរាមរបស់ក្រុងកំពង់ឆ្នាំង នាព្រឹកថ្ងៃទី០៣ ខែសីហា ឆ្នាំ២០២១នេះ ឯកឧត្ដម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង បានមានប្រសាសន៍ថា៖ ទីលានចាកសំរាមដែលកំពុងដំណើរការសាងសង់នេះ ពិតជាមានសារៈសំខាន់ខ្លាំងណាស់ ដែលនឹងលើកកម្ពស់សោភ័ណភាព អនាម័យ បរិស្ថានទីក្រុងកំពង់ឆ្នាំងឱ្យកាន់តែប្រសើរឡើង ស្របតាមគោលនយោបាយរាជរដ្ឋាភិបាល ទីក្រុងស្អាត បរិស្ថានល្អ។
ឯកឧត្តមអភិបាលខេត្តកំពង់ឆ្នាំង បានបន្តថា៖ ក្នុងគម្រោងផ្ទៃដីសាងសង់ទីលានចាក់សំរាមនេះមានទំហំប្រមាណជាង១២ហិកតា ដោយសាងសង់លើភូមិសាស្ត្រក្នុងភូមិត្រពាំងស្បូវ ឃុំស្រែថ្មី ស្រុករលាប្អៀរ។ ចំពោះការសាងសង់ទីលានចាក់សំរាម និងអាងចម្រោះទឹកកខ្វក់នេះជាគម្រោងកែលម្អបរិស្ថានក្រុងជុំវិញបឹងទន្លេសាប និងជាកម្ចីរបស់ធនាគារអភិវឌ្ឍន៍អាស៊ី (ADB) ដែលបានចាប់ផ្ដើមសាងសង់ កាលពីខែមេសា ឆ្នាំ២០២០ ហើយគ្រោងនឹងបញ្ចប់នៅដំណាច់ឆ្នាំ២០២១នេះ។ គម្រោងទាំងមូលរួមមានកន្លែងចាក់សំរាម, ស្រះសម្អាតទឹកកខ្វក់ចេញពីសំរាម, ស្រះត្រងទឹកកខ្វក់ ,អគាររដ្ឋបាល, អណ្ដូងសម្រាប់ត្រួតពិនិត្យគុណភាពទឹក, ផ្លូវចូលទីលានកប់សំរាម,បន្ទប់ម៉ាស៊ីនភ្លើង, ប្រព័ន្ធលូរបង្ហូរទឹកភ្លៀង, របងព័ទ្ធជុំវិញទីលានចាក់សំរាម ,និងហេដ្ឋារចនាសម្ព័ន្ធ មួយចំនួនទៀត។
ឯកឧត្តម ស៊ុន សុវណ្ណារិទ្ឋ បានបន្តថា៖ នៅពេលគម្រោងសាងសង់ទីលានចាក់សម្រាមនេះរួចរាល់ នឹងពិតជាបានលើកកម្ពស់សោភ័ណភាព អនាម័យ បរិស្ថានទីក្រុង ទីប្រជុំជន ធានាបានសុខុមាលភាព ល្អប្រសើរ ដែលបានឆ្លើយតបទៅនឹងតម្រូវការចាំបាច់របស់ប្រជាពលរដ្ឋ។ ក្នុងនាមថ្នាក់ដឹកនាំខេត្តជំនួសមុខឱ្យប្រជាពលរដ្ឋទូទាំងខេត្ត ឯកឧត្តម សូមគោរពថ្លែងអំណរគុណយ៉ាងជ្រាលជ្រៅបំផុតចំពោះរាជរដ្ឋាភិបាលកម្ពុជា និងធនាគារអភិវឌ្ឍន៍អាស៊ី ដែលបានផ្ដល់គម្រោងដ៏មានសារៈសំខាន់ ដែលពុំធ្លាប់មានជូនដល់ខេត្តកំពង់ឆ្នាំងផងដែរ៕ ដោយ ៖ ពៅ សុខហ៊ាន
ចែករំលែកព័តមាននេះ