រាជធានីភ្នំពេញ ៖ ក្រុមហ៊ុនHuawei ដែលជាក្រុមហ៊ុនស្មាតហ្វូនលំដាប់លេខបីពិភពលោកប្រចាំប្រទេសកម្ពុជា បានប្រារព្ធពិធីថ្លែងអំណរគុណអ្នកសារព័ត៌មាន«Media Thanks Party and Happy New Year 2016» នាថ្ងៃទី២៤ ធ្នូ នៅភោជនីយដ្ឋាន Promenade Lounge ដោយមានការចូលរួមពីបណ្ដាអ្នកសារព័ត៌មានជាតិប្រមាណ៤៥នាក់ ។
នាយកទីផ្សារជាន់ខ្ពស់របស់ក្រុមហ៊ុន Huaweiប្រចាំប្រទេសកម្ពុជា លោកអែម យុទ្ធូ បានឱ្យដឹងថា កម្មវិធីថ្លែងអំណរគុណអ្នកសារព័ត៌មាននេះ ត្រូវបានក្រុមហ៊ុន Huawei ធ្វើឡើងជារឿយៗដើម្បីថ្លែងអំណរគុណចំពោះបណ្ដាអ្នកសារព័ត៌មានក្នុងស្រុកទាំងឡាយដែលបានសរសេរ និងចែករំលែកព័ត៌មានស្ដីពីស្មាតហ្វូន និងបច្ចេកវិទ្យា Huawei កន្លងមក និងដើម្បីផ្ដល់ឱកាសឱ្យអ្នកសារព័ត៌មានទាំងអស់បានជួបជុំសួរសុខទុក្ខ ជជែកពិភាក្សាគ្នាពីប្រធានបទផ្សេងៗទាក់ទងនឹងស្មាតហ្វូន និងបច្ចេកវិទ្យាថ្មីៗ ។ លើសពីនេះ អ្នកសារព័ត៌មានទាំងអស់ក៏អាចធ្វើតេស្តស្មាតហ្វូនស៊េរីថ្មីៗបំផុតរបស់ Huawei ទៀតផង។
លោក យុទ្ធូ ក៏បានបង្ហើបផងដែរពីគម្រោងរបស់ក្រុមហ៊ុន Huawei ក្នុងការនាំចូលស្មាតហ្វូនស៊េរីថ្មី៣ស៊េរីក្នុងពេលតែមួយនៅដើមឆ្នាំ ២០១៦នេះ ប៉ុន្តែលោកមិនទាន់បញ្ចេញពីឈ្មោះ របស់ស្មាតហ្វូន Huawei ស៊េរីថ្មី ទាំង៣ស៊េរីនេះឡើយ ។
លោកគឹម ប៊ុន មកពីកាសែតរស្មីកម្ពុជា ដែលជាអ្នកសារព័ត៌មានរៀមច្បង និងបម្រើការផ្នែកសារព័ត៌មានប្រមាណ២០ឆ្នាំមកហើយ បានឱ្យដឹងថា លោកចូលចិត្តកម្មវិធីថ្លែងអំណរគុណអ្នកសារព័ត៌មានរបស់ក្រុមហ៊ុន Huawei ព្រោះកម្មវិធីនេះអាចឱ្យអ្នកជួបជុំពិភាក្សាគ្នាលេង ស្គាល់គ្នាកាន់តែច្បាស់ក្នុងលក្ខណៈដូចបងប្អូន ជាមួយបណ្ដាអ្នកសារព័ត៌មានដទៃជាលក្ខណៈសម្រាកកម្សាន្ត និងញ៉ាំអាហារពេលល្ងាច ។
លោកសោម ចន្ថា មកពីទូរទស្សន៍ប៉ុស្តិ៍លេខ៣ ក៏បានសម្ដែងការចាប់អារម្មណ៍ចំពោះកម្មវិធីថ្លែងអំណរគុណអ្នកសារព័ត៌មានរបស់ក្រុមហ៊ុន Huawei នេះដែរ ដោយសារតែកម្មវិធីផ្ដល់ឱកាសឱ្យអ្នកសារព័ត៌មានទទួលបានចំណេះដឹងបន្ថែមសំខាន់ៗពីស្មាតហ្វូន Huawei ដែលចែករំលែកដោយបុគ្គលិកជំនាញ និងជាពិសេសអ្នកសារព័ត៌មានគ្រប់រូបអាចស្នើសុំខ្ចីស្មាតហ្វូន Huawei ប្រើប្រាស់រយៈពេលវែងបាន ។
គួររំឭកថា ក្រៅពីការជួបជុំគ្នាញុាំអាហារ ស្ដាប់តន្ត្រី ក្រុមហ៊ុន Huawei ក៏បានផ្ដល់ជូនផងដែរការសួរសំណួរងាយៗអំពីក្រុមហ៊ុនហូវៃ ដើម្បីឈ្នះរង្វាន់ក្នុងកម្មវិធីចាប់ឆ្នោតផ្សងសំណាងជូនអ្នកសារព័ត៌មានផងដែរ ។ ក្នុងនោះរង្វាន់រួមមាន G7 Plus 01 Huawei P8lite មួយរង្វាន់ និង G Play Mini មួយរង្វាន់ ៕
ចែករំលែកព័តមាននេះ