ខេត្តស្វាយរៀង៖ នៅថ្ងៃទី២២ ខែកក្កដា ឆ្នាំ២០២១ រដ្ឋបាលខេត្តស្វាយរៀង បានប្រកាសអត្តសញ្ញាណអ្នកវិជ្ជមានកូវីដ១៩ថ្មី ចំនួន ៧៩នាក់ (ស្ត្រី ៥១នាក់)។…
ខេត្តស្វាយរៀង៖ នៅថ្ងៃទី២២ ខែកក្កដា ឆ្នាំ២០២១ រដ្ឋបាលខេត្តស្វាយរៀង បានប្រកាសអត្តសញ្ញាណអ្នកវិជ្ជមានកូវីដ១៩ថ្មី ចំនួន ៧៩នាក់ (ស្ត្រី ៥១នាក់)។ ក្នុងនោះ មានកម្មករ-កម្មការិនីរោងចក្រ ចំនួន ១១នាក់ ករណីឆ្លងលើអ្នកប៉ះពាល់ផ្ទាល់ជាមួយអ្នកកូវីដ១៩ ចំនួន ១៦នាក់ លើអ្នកមានការសង្ស័យ ២១នាក់ ករណីរអាជីវករផ្សារកំពង់ត្រាច ២៩នាក់។
ចំពោះអ្នកវិជ្ជមានកូវីដ១៩ ចំនួន ៧៩នាក់ បានបញ្ជូនទៅសម្រាកព្យាបាលនៅមន្ទីរពេទ្យស្រុកស្វាយជ្រំ ចំនួន ១៣នាក់ បញ្ជូនទៅមន្ទីរពេទ្យបង្អែកសាមគ្គីរំដួល ១១នាក់ និងបញ្ជូនទៅមជ្ឈមណ្ឌលព្យាបាលកូវីដ១៩ ក្រុងបាវិត ចំនួន ៥៥នាក់។
រដ្ឋបាលខេត្តស្វាយរៀង ក៏បានប្រកាសថា ករណីស្លាប់ថ្មី ២នាក់។ ស្ត្រីឈ្មោះ តឹក ចន្ថន អាយុ ៦០ឆ្នាំ ជាប្រជាពលរដ្ឋ នៅភូមិពោធិតាហោ សង្កាត់ពោធិតាហោ ក្រុងស្វាយរៀង មានជំងឺរ៉ាំរ៉ៃ ប្រចាំកាយ និងជាប់ពាក់ព័ន្ធអ្នកវិជ្ជមានកូវីដ១៩។ បុគ្គលខាងលើ ត្រូវធ្វើចត្តាឡីស័កនៅផ្ទះ រយៈពេល ៣ថ្ងៃ មានអាការៈក្តៅខ្លាំង ហត់សន្លប់ ហើយក្រុមគ្រួសារ បញ្ជូនតាមរថយន្តសង្គ្រោះ ទៅមន្ទីរពេទ្យខេត្ត មុនគ្រូពេទ្យ ទទួល គឺក្រុមការងារយកសំណាកពិនិត្យធ្វើតេស្តរហ័ស លទ្ធផលវិជ្ជមានកូវីដ១៩ នៅថ្ងៃទី១៥ ខែកក្កដា ឆ្នាំ២០២១ ដោយមានសភាពធ្ងន់ធ្ងរ ហើយត្រូវបញ្ជូនទៅព្យាបាលនៅមន្ទីរពេទ្យ ស្រុកស្វាយជ្រំ បានស្លាប់បាត់បង់ជីវិត នៅថ្ងៃទី២១ ខែកក្កដា ឆ្នាំ២០២១ វេលាម៉ោង ១យប់ រំលងអាធ្រាត្រ ដោយជំងឺកូវីដ១៩។ រីឯស្ត្រីម្នាក់ទៀត ឈ្មោះ យស់ វណ្ណៈ អាយុ ៦៩ឆ្នាំ ជាប្រជាពលរដ្ឋ រស់នៅភូមិចេក ឃុំសំរោង ស្រុកចន្ទ្រា មានអាការៈស្រៀវស្រាញ ក្តៅ ក្អក ឈឺក រយៈពេល ៣ថ្ងៃ ប្រើប្រាស់ឱសថផ្សំ នៅផ្ទះ មិនធូរស្រាល ក៏ត្រូវក្រុមគ្រួសារ បញ្ជូនទៅយកសំណាក នៅសាលាបឋសិក្សា សំរោង លទ្ធផលវិជ្ជមានកូវីដ នាថ្ងៃទី១៦ ខែកក្កដា ឆ្នាំ២០២១ បញ្ជូនទៅព្យាបាលនៅមណ្ឌលព្យាបាលកូវីដ ក្រុងបាវិត រយៈពេលជាច្រើនថ្ងៃ មិនធូរស្រាល បណ្តាលឲ្យស្លាប់បាត់បង់ជីវិត នៅថ្ងៃទី២០ ខែកក្កដា ឆ្នាំ២០២១ វេលាម៉ាង ១១ និង ៣០នាទីយប់ ដោយជំងឺកូវីដ១៩។
គិតត្រឹមថ្ងៃទី២១ ខែកក្កដា ឆ្នាំ២០២១ ខេត្តស្វាយរៀង មានអ្នកវិជ្ជមានកូវីដ១៩ សរុប ៤២១៨នាក់ (ស្ត្រី ២៣៣៨នាក់) ជាសះស្បើយសរុប ៣៤៣៣នាក់ (ស្ត្រី ១៩៣០នាក់) កំពុងសម្រាកព្យាបាល ចំនួន ៧០៦នាក់ (ស្ត្រី ៣៤៦នាក់)។ ករណីស្លាប់ កើនឡើងដល់ ៦៧នាក់ (ស្ត្រី ៤៥នាក់)៕
ចែករំលែកព័តមាននេះ