រាជធានីភ្នំពេញ ៖ លោក ងី មានហេង ប្រធានមន្ទីរសុខាភិបាលរាជធានីភ្នំពេញបានឱ្យកោះសន្តិភាពដឹងតាមរយៈទូរស័ព្ទដៃនៅព្រឹកថ្ងៃទី២១ ខែកក្កដាថា ក្រោយមានការអនុញ្ញាតពីរាជរដ្ឋាភិបាលក្រុមការងាររបស់ក្រុមគ្រូពេទ្យ សហការជាមួយអជ្ញាធរមូលដ្ឋានបានអនុញ្ញាត និងរៀបចំឱ្យប្រជាពលរដ្ឋរាជធានីភ្នំពេញ អាចសម្រាក និងព្យាបាលជម្ងឺកូវីដ១៩នៅតាមផ្ទះ ក្រោយពីរកឃើញថា គាត់មានវិជ្ជមានកូវីដ១៩ ។
លោកបន្តថា គិតពីចុងខែមេសារហូតមកដល់ពេលនេះ ប្រជាពលរដ្ឋរាជធានីភ្នំពេញបាន និងកំពុងសម្រាកព្យាបាលជម្ងឺកូវីដ១៩នៅតាមផ្ទះមានជាង២ពាន់នាក់ និងជាសះស្បើយចំនួន២៧៤នាក់ ។
លោក ងី មានហេង បានពន្យល់ថា ចំពោះអ្នក ដែលរកឃើញ មានវិជ្ជមានជម្ងឺកូវីដ-១៩ ហើយ ស្ម័គ្រចិត្តព្យាបាលតាមផ្ទះត្រូវព្យាបាលឱ្យបាន១៣ថ្ងៃ ។ នៅពេលពិនិត្យយកសំណាកនោះ បើទោះបីជារកឃើញ ឬរកមិនឃើញជម្ងឺកូវីដ-១៩ក៏ដោយក៏ត្រូវតែបន្តដាក់ខ្លួនអោយនៅដាច់ដោយឡែកចំនួន១៤ថ្ងៃបន្តទៀតមិនអាចចេញក្រៅបានទេ ។
ដោយឡែកសម្រាប់នៅក្នុងកិច្ចប្រជុំគណៈបញ្ជាការឯកភាពរាជធានីភ្នំពេញ ដើម្បីត្រួតពិនិត្យការផ្តល់ការព្យាបាលអ្នកជំងឺកូវីដ-១៩នៅតាមផ្ទះ តាមរយៈ Video Conferenceនៅសាលារាជធានីភ្នំពេញ កាលពីល្ងាច ថ្ងៃទី២០ កក្កដា ២០២១នេះ លោកឃួង ស្រេង អភិបាលរាជធានីភ្នំពេញបានជំរុញឱ្យអាជ្ញាធរខណ្ឌទាំង១៤ មន្ទីរពាក់ព័ន្ធ និងមន្ត្រីកងកម្លាំងទាំងអស់ត្រូវតែយកចិត្តទុកដាក់ឱ្យបានខ្ពស់បំផុត ចំពោះការព្យាបាលតាមផ្ទះ ដើម្បីឱ្យប្រជាពលរដ្ឋកាន់តែមានទំនុកចិត្ត ជឿមកលើក្រុមគ្រូពេទ្យ និងអាជ្ញាធររបស់យើងស្ម័គ្រចិត្ត ព្យាបាលតាមផ្ទះកាន់តែច្រើន ។
លោកក៏បានជំរុញឱ្យមន្ទីរទេសចរណ៍ និងអាជ្ញាធរខណ្ឌបន្តចុះត្រួតពិនិត្យ រឹតបន្តឹងការគ្រប់គ្រងការជួបជុំការលួចបើកទីតាំងម៉ាស្សា KTV និងកន្លែងសប្បាយភាពផ្សេងៗទៀត ។
លោកឃួង ស្រេង បានមានប្រសាសន៍ថា ការព្យាបាលតាមផ្ទះជាជំរើសដ៏ល្អ ហើយត្រូវបានប្រជាពលរដ្ឋស្ម័គ្រចិត្តចូលរួមក្នុងការព្យាបាលតាមផ្ទះនេះកាន់តែច្រើនឡើង។ ដូច្នេះអ្វីដែលត្រូវអនុវត្តនោះ គឺអាជ្ញាធរខណ្ឌទាំង១៤ មន្ទីរពាក់ព័ន្ធនិងមន្ត្រី កងកម្លាំងទាំងអស់ ត្រូវតែយកចិត្តទុកដាក់អោយបានខ្ពស់បំផុត ចំពោះការព្យាបាលតាមផ្ទះនេះ ដើម្បីឱ្យប្រជាពលរដ្ឋកាន់តែមានទំនុកចិត្ត ជឿមកលើក្រុមគ្រូពេទ្យ និងអាជ្ញាធររបស់យើង ។
លោកបន្តថា ចំពោះ ខណ្ឌនីមួយៗត្រូវបង្កើតឲ្យមានទីបញ្ជាការស្រាល១កន្លែងក្នុងមួយខណ្ឌ ដើម្បីប្រចាំបញ្ជាជួយអន្តរាគមន៍ ប្រជាពលរដ្ឋពេលមានបញ្ហាអ្វីមួយ ហើយប្រធានការិយាល័យសុខាភិបាលស្រុកប្រតិបត្តិ (OD) ក៏ត្រូវតែនៅក្នុងទីបញ្ជាការស្រាលនេះដែរពោល គឺនៅពេលមានបញ្ហាអ្វីយើងអាចជួយសូវ៉េ បានទាន់ពេលវេលាមិនគ្រោះថ្នាក់ដល់អាយុជីវីត ។
លោកឃួង ស្រេង បានបញ្ជាក់ថា ចំពោះអ្នកដែលពិនិត្យរកឃើញថា មានវិជ្ជមានជម្ងឺកូវីដ-១៩ និងបានសម្រេចចិត្តព្យាបាលនៅតាមផ្ទះហើយ តែបែជាល្មើស និងច្បាប់ ដោយលួចចេញមកខាងក្រៅនិងបានចម្លងដល់អ្នកដទៃថែមទៀតនោះ អ្នកនោះក្រោយពីព្យាបាលជម្ងឺបានជាសះស្បើយហើយនឹងចាប់មកទទួលទោសទៅតាមផ្លូវច្បាប់ធ្ងន់ធ្ងរ ដោយមិនមានការលើកលែងឡើយ ៕
ចែករំលែកព័តមាននេះ