រាជធានីភ្នំពេញ ៖ អគ្គនាយកដ្ឋានគយ និងរដ្ឋាករកម្ពុជា បានបង្ហាថា ការប្រមូលចំណូលលើការនាំចូលយានយន្ត និងគ្រឿងចក្រមានទំហំទឹកប្រាក់ជាង ១,៩៨៥ ប៊ីលានរៀល គ្របដណ្តប់ជាង…
រាជធានីភ្នំពេញ ៖ អគ្គនាយកដ្ឋានគយ និងរដ្ឋាករកម្ពុជា បានបង្ហាថា ការប្រមូលចំណូលលើការនាំចូលយានយន្ត និងគ្រឿងចក្រមានទំហំទឹកប្រាក់ជាង ១,៩៨៥ ប៊ីលានរៀល គ្របដណ្តប់ជាង ៤២% នៃចំណូលសរុបគិតត្រឹមរយៈពេល ៦ ខែដើមឆ្នាំ ២០២១ នេះ ស្របពេលសញ្ញានៃការនាំចូលរថយន្តមកទីផ្សារកម្ពុជានូវបន្តមានការធ្លាក់ចុះ ។
ប្រធានសហព័ន្ធឧស្សាហកម្មយានយន្តកម្ពុជា លោកបណ្ឌិត តាន់ មុនីវណ្ណ បានឱ្យដឹងថា ការប្រមូលចំណូលពីរថយន្ត និងគ្រឿងចក្រផ្សេងៗ គឺជាផ្នែកមួយនៃការរួមចំណែកក្នុងកំណើនសេដ្ឋកិច្ចយ៉ាងល្អប្រសើរ តែស្ថិតនៅក្នុងស្ថានភាពនៃការរីករាលដាលជំងឺកូវីដ-១៩ នេះ ការនាំចូលរថយន្ត និងគ្រឿងចក្រផ្សេងៗបានថមថយចុះខ្លះៗ ទាំងការនាំចូល និងការលក់រថយន្តនៅលើទីផ្សារក្នុងស្រុក ហើយដោយឡែក ទោះបីការនាំចូលគ្រឿងចក្រផ្សេងៗវិញមានការធ្លាក់ចុះខ្លះៗក្តី រាជរដ្ឋាភិបាលបានលើកទឹករួចមកហើយ ក្នុងនោះសម្រាប់គោលនយោបាយចុងក្រោយនេះ ចំពោះវិស័យកសិកម្ម និងកែច្នៃផលិតកម្មកសិកម្ម រាជរដ្ឋាភិបាលមានការអនុគ្រោះបន្ថែមជាច្រើនចំពោះក្រុមហ៊ុនដែលមានគោលការណ៍ច្បាស់លាស់ និងការរក្សាបាននូវនិរន្តភាព ។ លោកបណ្ឌិតសង្កត់ធ្ងន់ថា «យើងសង្ឃឹមថា នាពេលខាងមុខ ការនាំចូលគ្រឿងចក្រ អាចនឹងមានកំណើនកើនឡើងបន្ថែមទៀត សម្រាប់ការអភិវឌ្ឍ និងចំណូលនៃសេដ្ឋកិច្ច» ។
លោក ងន សាំង តំណាងក្រុមហ៊ុន RMA បានឱ្យដឹងថា ការប្រមូលប្រាក់ចំណូលពីវិស័យយានយន្ត បានចូលរួមចំណែកច្រើននៅក្នុងសេដ្ឋកិច្ចជាតិ ហើយបើសិនជាជំងឺកូវីដ ១៩ មានការស្រាកស្រាន្តទៅវិញ តម្រូវការថយន្ត និងគ្រឿងចក្រ និងកើនឡើងច្រើន ជាងមុនដែលកម្ពុជាមានជំងឺកូវីដ ១៩ ថែមទៀត ។ លោកបន្តថា នៅឆ្នាំ ២០២១ នេះដោយសារបញ្ហាកូវីដ ១៩ គឺចំនួនរថយន្តនាំចូលមកដាក់លក់នៅកម្ពុជាមានការថយចុះជាង ៣០% ក្នុងនោះការនាំចូលរថយន្តជជុះ ឬមួយទឹកមានការធ្លាក់ចុះច្រើនជាងរថយន្តថ្មី ។ ប៉ុន្តែសម្រាប់ RMA ការលក់រថយន្តថ្មីនៅក្នុងឆមាសទី ១ ឆ្នាំ ២០២១ កន្លងទៅនេះកើនឡើងពី ២០ ទៅ ៣០% បើប្រៀបធៀបនិងរយៈពេលដូចគ្នាឆ្នាំ ២០២០ ។
បើតាមអគ្គនាយកដ្ឋានគយ និងរដ្ឋាករកម្ពុជា នៅក្នុងរយៈពេល ៦ ខែ ឆ្នាំ ២០២១ នេះ បើគិតតាមប្រភេទពន្ធ និងអាករ ដែលអនុវត្តន៍ដោយគយ និងរដ្ឋាករកម្ពុជា ឃើញថា អាករលើតម្លៃបន្ថែមប្រមូលបានជាង ១,៧៧៥ ប៊ីលានរៀល ត្រូវជាង ៣៧%, អាករពិសេសជាង ១,៧៦៥ ប៊ីលានរៀល ជាង ៣៧%, ពន្ធគយជិត ៨៤៨ ប៊ីលានរៀល ត្រូវជាង ១៨%, អាករបន្ថែមលើផលិតផលប្រេង ២១៤ ប៊ីលានរៀល ជាង ៤% និងអាករនាំចេញនិងកម្រៃផ្សេងៗមានជាង ៩៤ ប៊ីលានរៀល ត្រូវប្រមាណជា ២% នៃចំណូលសរុបផងដែរ ។
ដោយឡែកប្រភេទទំនិញវិញ បើគិតតាមក្រុមទំនិញ, ចំណូលពីយានយន្ត និងគ្រឿងចក្រមានចំនួនជាង ១,៩៨៥ ប៊ីលានរៀល គ្របដណ្តប់ជាង ៤២%, ទំនិញចម្រុះជាង ១,៣១៦ ប៊ីលានរៀល ត្រូវ ២៨%, ផលិតផលតេលសិលាជិត ១,១០២ ប៊ីលានរៀល ស្មើជាង ២៣% និងសម្ភារសំណង់ និងកម្រៃផ្សេងៗ មានចំនួនជាង ២៩២ ប៊ីលានរៀល ស្មើជាង ៦% នៃចំណូលសរុប ៕
ចែករំលែកព័តមាននេះ