រាជធានីភ្នំពេញ ៖ មហាជនបានសម្តែងការភ្ញាក់ផ្អើលយ៉ាងខ្លាំង ក្នុងពេលដែលបានឃើញមានការផ្សព្វផ្សាយតាមបណ្តាញសង្គមហ្វេសប៊ុក ពាក់ព័ន្ធភាគីថៃបង្ហាញគម្រោងត្រៀមសាងសង់ប្រាសាទអង្គរទី២នៅក្នុងពេលឆាប់ៗនេះ។ រូបភាពពីគម្រោងប្លង់ស្តីពីការស្ថាបនាប្រាសាទរបស់ភាគីថៃ ដែលចម្លងស្ទើរទាំងស្រុងពីប្រាសាទអង្គរវត្តខ្មែរ ត្រូវបានចែកចាយពេញបណ្តាញសង្គមហ្វេសប៊ុក ក្នុងនោះមហាជនជាច្រើនបានសម្តែងការព្រួយបារម្ភ និងមិនពេញចិត្តចំពោះបញ្ហាខាងលើនេះឡើយ។ បើយោងតាមការចុះផ្សាយពីផេកហ្វេសប៊ុកឈ្មោះបុរាណណាចារ្យ បានឲ្យដឹងថា ប្រទេសថៃនឹងសាងសង់ប្រាសាទអង្គរវត្តទី២ឆាប់ៗនេះ នៅឯវត្តភូម៉ានហ្វា ដ៏ល្បីល្បាញរបស់ថៃរឿងការសាងសង់ប្រាសាទថ្ម ដែលយើងឃើញមានការបង្ហោះក្នុងបណ្តាញសង្គមមួយរយៈនេះ បន្ទាប់ពីទទួលជោគជ័យក្នុងការកសាងប្រាសាទកំពូល៣រចនាបទខ្មែរ រួចមកហើយនោះ។
គម្រោងបន្ទាប់គឺការកសាងប្រាសាទអង្គរវត្តទី២ ដែលជាគម្រោងសាងសង់ប្រាសាទអង្គរវត្តចម្លងធំជាងគេនៅលើពិភពលោក។ គម្រោងសាងសង់ប្រាសាទអង្គរវត្តទី២ ឬប្រាសាទដែលគេប្រសិទ្ធនាមថា ប្រាសាទសីហនគរនេះ(ปราสาทสีหนคร) បានប្រារព្ធពិធីបុកគ្រឹះលើកដំបូងរបស់ខ្លួននៅថ្ងៃទី៥ ខែមេសា ឆ្នាំ២០២១ ក្នុងបរិវេណវត្តភូម៉ានហ្វា ផាយ៉ាឆាងរ៉ង ភូមិបានណងបួរ៉ាយ ឃុំបានសិង្គ ស្រុកនាងរ៉ង ខេត្តបុរីរម្យ ដោយកំណត់ថានឹងបញ្ចប់ការសាងសង់នៅរវាង៧ទៅ៨ឆ្នាំទៀត។ យើងបានភ្ជាប់ជូនអ្នកទាំងអស់គ្នានូវគម្រូប្រាសាទ និងប្លង់ប្រាសាទដែលគេនឹងចាប់ផ្តើមសាងសង់ឆាប់ៗនេះ ព្រមទាំងរូបភាពប្រាសាទកំពូល៣ដែលបានសាងសង់រូចមកហើយ និងបញ្ចប់គម្រោងឆាប់ៗនេះ។
ដោយសារតែអង្គរវត្តជាបេតិកភណ្ឌពិភពលោក ដូចនេះបើយោងទៅតាមច្បាប់អន្តរជាតិ មាត្រា៦ស្ទួន មាត្រា១០ និងមាត្រា១០ស្ទួន នៃអនុសញ្ញាទីក្រុងប៉ារីស ស្តីពីកិច្ចការពារកម្មសិទ្ធិឧស្សាហកម្ម ចុះថ្ងៃទី២០ ខែមីនា ឆ្នាំ១៨៨៣ និងគោលការណ៍ផ្សេងៗទៀត ដែលទាក់ទងដល់ការរក្សាគុណតម្លៃនៃប្រាសាទបុរាណខ្មែរ យើងមិនអាចអនុញ្ញាតឲ្យមានការសាងសង់ចម្លងតាមបែបនេះបានទេ។ យើងក៏សង្ឃឹមថា ក្រសួងវប្បធម៌ និងវិចិត្រសិល្បៈ អាជ្ញាធរពាក់ព័ន្ធនឹងចាត់វិធានការឲ្យបានឆាប់រហ័សទាក់ទងនឹងរឿងនេះ កុំឲ្យដល់ពេលគេសាងសង់ហើយទើបមានប្រតិកម្ម។ ពាក់ព័ន្ធបញ្ហាខាងលើនេះអ្នកនាំពាក្យក្រសួងវប្បធម៌ និងវិចិត្រសិល្បះលោក ឡុង ប៉ុណ្ណាសិរីវឌ្ឍ បានអះអាងប្រាប់កោះសន្តិភាពតាមសារអេឡិចត្រូនិចនៅថ្ងៃនេះថា ជាជំហានដំបូងភាគីខាងបច្ចេកទេសក្រសួង រួមជាមួយអជ្ញាធរអប្សរាបាន និងកំពុងស្វែករកព័ត៌មានបន្ថែមជាមុនសិន។
លោកបញ្ជាក់ថា ដំបូងយើបានដឹងថា ភាគីថៃបានកសាងប្រាសាទដែលមានកំពូលបីដូចប្រាសាទអង្គរខ្មែរ ហេតុនេះយើងកំពុងស្វែងអ្នកបច្ចេកសិក្សាទៅប្លង់មេនេះ ដើម្បីបានព័ត៌មានជាក់លាក់ជាមុនសិន។ លោកបន្ថែមថា ប្រសិនបើយើងសិក្សាបានច្បាស់លាស់ហើយនោះ ក្រសួងនឹងមានវិធានការតាមផ្លូវច្បាប់ និងបទដ្ឋានគតិយុទ្ធនានាដែលបានចែង ក្នុងពេលដែលមានការសាងសង់យកលំនាំតាមប្រាសាទបុរាណខ្មែរដោយគ្មានការអនុញ្ញាតបែបនេះ។ លោក ឡុង ប៉ុណ្ណាសិរីវឌ្ឍ បានឲ្យដឹងបន្ថែមទៀតថា យើងកំពុងសិក្សាបញ្ហានេះឲ្យបានច្បាស់លាស់ថា ភាគីថៃគេសាងសង់យកតាមលំនាំប្រាសាទខ្មែរយើងទាំងស្រុង ឬមានប្លង់បែបផែនផ្សេង។ លោកបញ្ជាក់ថា ឥឡូវនេះជាជំហានដំបូងគឺដឹងព័ត៌មានថាភាគីថៃគេសាងសង់ជាពុទ្ធមណ្ឌល។ យ៉ាងណាបើតាមលោក ឡុង ប៉ុណ្ណាសិរីវឌ្ឍ បច្ចុប្បន្នអាជ្ញាធរអប្សរាបានទាក់ទងតាមប្រព័ន្ធអេឡិចត្រូនិចទៅកាន់ភាគីអ្នកចេញគំរូប្លង់មេរបស់ថៃ ហើយក៏បានទាក់ទងទៅកាន់ស្ថានទូតកម្ពុជាប្រចាំប្រទេសថៃដើម្បីប្រមូលព័ត៌មានឲ្យបានច្បាស់ មុនឈានដល់ដំណោះស្រាយ និងចំណាត់ការច្បាប់ណាមួយ៕ ដោយ ៖ សុខ វាសនា
ចែករំលែកព័តមាននេះ