ខេត្តសៀមរាប ៖ ក្រុមហ៊ុន មេនូឡាយហ្វ៍ ដែលជាក្រុមហ៊ុនធានារ៉ាប់រងអាយុជីវិតធំមួយនៅក្នុងប្រទេសកម្ពុជា បានបរិច្ចាគថវិកាជូនមន្ទីរពេទ្យកុមារអង្គរខេត្តសៀមរាប ចំនួន២ម៉ឺន៥ពាន់ដុល្លារអាមេរិក ដើម្បីឱ្យមន្ទីរពេទ្យនេះ បន្តជួយសង្គ្រោះជីវិតកុមារជាច្រើនដែលមកសម្រាកព្យាបាលជំងឺនៅក្នុងមន្ទីរពេទ្យរាប់ម៉ឺននាក់ក្នុងមួយឆ្នាំៗ ។ ពិធីប្រគល់ទឹកប្រាក់បរិច្ចាគដល់មន្ទីរពេទ្យកុមារអង្គរពីសំណាក់ក្រុមហ៊ុនធានារ៉ាប់រងអាយុជីវិត មេនូឡាយហ្វ៍ បានធ្វើឡើងកាលពីព្រឹកថ្ងៃទី០៥ ធ្នូ ២០១៥ នៅមន្ទីរពេទ្យអង្គរខេត្តសៀមរាប ។
លោកវេជ្ជបណ្ឌិត ងួន ចាន់ភក្ត្រា នាយកមន្ទីរពេទ្យកុមារអង្គរបានមានប្រសាសន៍ថា មន្ទីរពេទ្យកុមារអង្គរបានបង្កើតឡើងតាំងពីឆ្នាំ១៩៩៩ ហើយរហូតមកដល់ពេលនេះ កុមារជាង១,៥លាននាក់ត្រូវបានជួយសង្គ្រោះអាយុជីវិតដោយឥតគិតថ្លៃ ។ សព្វថ្ងៃក្នុងមួយឆ្នាំៗមន្ទីរពេទ្យកុមារអង្គរ បានជួយសង្គ្រោះជីវិតកុមារព្យាបាលដោយឥតគិតថ្លៃប្រមាណ១៥០.០០០នាក់ ហើយក៏នៅតែបន្តសកម្មភាពជួយសង្គ្រោះជីវិតកុមារកម្ពុជា ដោយឥតគិតថ្លៃបន្តទៀត ។
លោកបន្តថា តាមរយៈសកម្មភាពរបស់មន្ទីរពេទ្យកុមារអង្គរក៏មានអង្គការ និងបណ្ដាក្រុមហ៊ុនសប្បុរសធម៌ជាច្រើនបានបរិច្ចាគជូនមន្ទីរពេទ្យ ដើម្បីបន្តសកម្មភាពជួយសង្គ្រោះជីវិតកុមារបន្តទៀត ជាក់ស្ដែងពេលនេះ ក្រុមហ៊ុនមេនូឡាយហ្វ៍បានបរិច្ចាគថវិកាសម្រាប់សកម្មភាពមនុស្សធម៌របស់យើងជាដើម ។
លោក Roy Gori ប្រធានអគ្គនាយកប្រតិបត្តិនៃក្រុមហ៊ុន មេនូឡាយហ្វ៍ ប្រចាំតំបន់អាស៊ីបានមានប្រសាសន៍ថា ក្រុមហ៊ុនមេនូឡាយហ្វ៍ កំពុងបន្តជួយប្រជាសហគមន៍នៅទូទាំងតំបន់អាស៊ីរយៈពេលជាច្រើនឆ្នាំមកហើយតាមរយៈសកម្មភាពមនុស្សធម៌ផ្សេងៗ ។ យើងពិតជាមានក្តីសោមនស្សរីករាយក្នុងការគាំទ្រមន្ទីរពេទ្យកុមារអង្គរ ដែលបានផ្តល់ការព្យាបាលឲ្យកុមារកម្ពុជាជាង១.៥លាននាក់ ចាប់តាំងពីឆ្នាំ១៩៩៩ មកនោះ ។
លោក Robert Elliott អគ្គនាយកប្រតិបត្តិ និងជានាយកចាត់ការទូទៅរបស់ក្រុមហ៊ុន មេនូឡាយហ្វ៍ (ខេមបូឌា) មានប្រសាសន៍ថា ការគាំទ្រមន្ទីរពេទ្យកុមារអង្គរ ឆ្លុះបញ្ចាំងអំពីឆន្ទៈរបស់ក្រុមហ៊ុនមេនូឡាយហ្វ៍ ក្នុងការជួយក្រុមគ្រួសារនៅកម្ពុជា កសាងអនាគតដ៏ប្រសើរមួយ ពីព្រោះកុមារ គឺជាទំពាំងស្នងឬស្សីរបស់យើង ៕
ចែករំលែកព័តមាននេះ