ខេត្តកំពង់ឆ្នាំង ៖ នៅក្នុងព្រឹត្តិការណ៍សហគមន៍២០កុម្ភៈ នេះ រដ្ឋបាលខេត្តកំពង់ឆ្នាំង បានរកឃើញករណីអ្នកវិជ្ជមានកូវីដ១៩ ថ្មី ចំនួន៣៤នាក់បន្ថែមទៀត ក្នុងនោះស្រី១៥នាក់ ដែលត្រូវជាអាជីវករ, កម្មករ, បុគ្គលិកធនាគារ, អ្នកបើកតាក់ស៊ី និងមន្ត្រីរាជការជាដើម ។ នេះបើយោងតាមសេចក្តីជូនដំណឹងរបស់រដ្ឋបាលសាលាខេត្តកំពង់ឆ្នាំង នៅរសៀលថ្ងៃទី ០១ ខែកក្កដា ឆ្នាំ២០២១នេះ។
ក្នុងសេចក្តីជូនដំណឹងរបស់រដ្ឋបាលសាលាខេត្តកំពង់ឆ្នាំងនេះដែរ ក៏បានបញ្ជាក់ថា រកឃើញអ្នកមានវិជ្ជមានថ្មីចំនួន៣៤នាក់ផងដែរ ក្នុងនោះមាននៅស្រុកទឹកផុស ១នាក់, ស្រុកកំពង់ត្រឡាច ៣នាក់, ស្រុករលាប្អៀរ៩នាក់ និងក្រុងកំពង់ឆ្នាំងមានចំនួន២១នាក់ ។ អ្នកទាំងនោះ គឺជាអាជីវករ, កម្មករ, បុគ្គលិកធនាគារ, អ្នកបើកតាក់ស៊ី, មន្ត្រីរាជការ និងកុមារផងដែរ ។ ពួកគាត់ទាំងនោះ បានយកទៅដាក់ឲ្យសម្រាកព្យាបាលនៅមន្ទីរពេទ្យបង្អែកខេត្តកំពង់ឆ្នាំង, មន្ទីរព្យាបាលវិទ្យាល័យហ៊ុនសែន កំពង់ត្រឡាច និងមណ្ឌលព្យាបាលវិទ្យាល័យហ៊ុនសែនទឹកហូត ស្រុករលាប្អៀរ ។
ជាមួយនឹងការជូនដំណឹងខាងលើ រដ្ឋបាលសាលាខេត្តកំពង់ឆ្នាំង ក៏បានអំពាវនាវយ៉ាងទទូចដល់អាជ្ញាធរមូលដ្ឋាន ត្រូវយកចិត្តទុកដាក់គ្រប់គ្រងក្រុមគ្រួសារទាំងអស់នោះ ឱ្យធ្វើចិត្តាឡីស័កនៅតាមផ្ទះ នៅទីសំណាក់រៀងៗខ្លួនឱ្យបានត្រឹមត្រូវ តាមវិធានការក្រសួងសុខាភិបាល ។ ហើយបន្តតាមដានសុខភាពបងប្អូន និងជួយដោះស្រាយការលំបាកនានា តាមគ្រួសារនីមួយៗតាមជាក់ស្ដែង។
ក្នុងសេចក្តីជូនដំណឹងរបស់រដ្ឋបាលសាលាខេត្តកំពង់ឆ្នាំងដដែល ក៏បានអំពាវនាវដល់បងប្អូនប្រជាពលរដ្ឋដែលធ្លាប់ប្រាស្រ័យទាក់ទងដោយផ្ទាល់ ឬប្រយោល ជាមួយអ្នកមានវិជ្ជមានកូវីដ១៩ ខាងលើ មុនពេល១៤ថ្ងៃសូមមកពិនិត្យសំណាកនៅមន្ទីរពេទ្យខេត្តកំពង់ឆ្នាំង មន្ទីរពេទ្យបង្អែកកំពង់ត្រឡាច ឬមណ្ឌលសុខភាពដែលនៅជិតបំផុត ដើម្បីទប់ស្កាត់ការឆ្លងរាលដាលនៃជំងឺកូវីដ១៩ និងសូមបងប្អូនអនុវត្តឱ្យបានខ្ជាប់ខ្ជួននូវវិធានការ «៣ការពារ ៣កុំ» ដើម្បីគ្រួសារយើង និងសង្គមជាតិយើង។
សូមបញ្ជាក់ថា បើគិតមកដល់ថ្ងៃទី០១ ខែកក្កដា ឆ្នាំ២០២១នេះ ក្នុងព្រឹត្តិការណ៍សហគមន៍២០កុម្ភៈ ខេត្តកំពង់ឆ្នាំងបានរកឃើញអ្នកមានវិជ្ជមានសរុបចំនួន៥៨៤នាក់ ក្នុងនោះស្រី៤២២នាក់, ជាសះស្បើយសរុបចំនួន៣៧៥នាក់ ក្នុងនោះជាសះស្បើយថ្មី១៣នាក់, អ្នកស្លា.ប់សរុបមានចំនួន១២នាក់ ក្នុងនោះស្លា.ប់ថ្មី១នាក់ និងកំពុងសម្រាកព្យាបាលនៅមន្ទីរពេទ្យចំនួន១៩៧នាក់ ក្នុងនោះស្រី១៣៣នាក់។ តួលេខដែលទទួលបាននេះ ធ្វើឱ្យមានការបារម្ភក្រែងលែងសម្រាប់អ្នកខេត្តកំពង់ឆ្នាំង ដែលគេសង្ស័យថា បានចូលដល់បន្ទាត់ក្រហមនៃការរីករាលដាលនៃជំងឺកូវីដ-១៩៕
ចែករំលែកព័តមាននេះ