ខេត្តកំពង់ស្ពឺ ៖ នៅមន្ទីរពាណិជ្ជកម្មខេត្តកំពង់ស្ពឺ នាល្ងាចថ្ងៃទី១៥ វិច្ឆិកា ២០១៥ បានរៀបចំពិធីបោះឆ្នោតជ្រើសរើសប្រធានសភាពាណិជ្ជកម្មអាណត្តិថ្មី ដោយមានការចូលរួមយ៉ាងច្រើនកុះករពីសំណាក់សមាជិក សមាជិកានៃសភាពាណិជ្ជកម្មខេត្ត។ សម្រាប់បេក្ខជនដែលជាប់តំណែងប្រធានសភាពាណិជ្ជកម្មខេត្តកំពង់ស្ពឺអាណត្តិថ្មីនេះ ក៏នឹងក្លាយជាអនុប្រធានសភាពាណិជ្ជកម្មកម្ពុជាដោយស្វ័យប្រវត្តិផងដែរ ។
ក្រោយការបោះឆ្នោតរួមមក លោកឡេង សុខគា ដែលជាពាណិជ្ជករវ័យក្មេងត្រូវបានសមាជិក សមាជិកានៃសភាពាណិជ្ជកម្មទាំងអស់ផ្តល់ទំនុកចិត្តបោះឆ្នោតជ្រើសធ្វើជាប្រធានអាណត្តិថ្មីដែលមានអនុប្រធាន៥រូប ដើម្បីដឹកនាំ និងពង្រឹងការងាររបស់សភាពាណិជ្ជកម្មខេត្តកំពង់ស្ពឺ កាន់តែរីកចម្រើនថែមទៀត ។
បន្ទាប់ពីការគាំទ្រពីសមាជិក សមាជិកាទាំងអស់ ដោយធ្វើការបោះឆ្នោះឱ្យលោកឡេង សុខគា ជាប្រធានសភាពាណិជ្ជកម្មអាណត្តិថ្មីរួចមក លោកបានលើកឡើងថា សភាពាណិជ្ជកម្មខេត្តកំពង់ស្ពី ជាស្ថាប័នតំណាងឲ្យវិស័យឯកជនដែលបាននិងកំពុងបន្តរួមចំណែកអភិវឌ្ឍន៍វិស័យឯកជន និងចូលរួមដោះស្រាយបញ្ហាប្រឈមនានារបស់វិស័យឯកជនសំដៅបង្កបរិយាកាសវិនិយោគកាន់តែល្អប្រសើរសម្រាប់វិនិយោគិនជាតិ និងអន្តជាតិ ដូច្នេះរូបលោករួមជាមួយនឹងអនុប្រធាន៥រូបផ្សេងទៀត នឹងខិតខំដឹកនាំពង្រឹងការងារ ពង្រីកទំនាក់ទំនង ដើម្បីឱ្យសភាពាណិជ្ជកម្មខេត្តកំពង់ស្ពឺនេះ ដើរតួនាទីកាន់តែសំខាន់ក្នុងការអភិវឌ្ឍន៍ខេត្ត ក៏ដូចជាការគៀងគរវិនិយោគិនឱ្យមកបណ្តាក់ទុន និងបើករោងចក្រ សហគ្រាស កាន់តែច្រើនជាងមុន ដើម្បីជួយកាត់បន្ថយភាពក្រីក្រ និងផ្តល់ការងារជូនប្រជាជនធ្វើផងដែរ។
លោកឡេង សុខគា ក៏បានថ្លែងអំណរគុណដល់សមាជិក សមាជិកាទាំងអស់របស់សភាពាណិជ្ជកម្មខេត្តកំពង់ស្ពឺ ដែលបានផ្តល់ទំនុកចិត្ត និងជឿជាក់លើរូបលោក និងបានបោះឆ្នោតជូនលោកធ្វើជាប្រធានដឹកនាំសភាពាណិជ្ជកម្មខេត្តកំពង់ស្ពឺនេះ ហើយលោកសូមប្តេជ្ញាថា នឹងខិតខំបំពេញតួនាទី និងភារកិច្ចនេះឱ្យបានល្អប្រសើរ ជាពិសេសគឺខិតខំទាក់ទាញវិនិយោគិនឱ្យចូលមកវិនិយោគទុននៅកម្ពុជា ក៏ដូចជាខេត្តកំពង់ស្ពឺកាន់តែច្រើនឡើងៗ។
លោកឡេង សុខគា បានបន្ថែមថា ការងាររបស់សភាពាណិជ្ជកម្មមានច្រើនណាស់ដែលត្រូវតែធ្វើ ដូចជាការគៀងគរសមាជិកថ្មីបន្ថែម ដើម្បីពង្រឹងប្រសិទ្ធភាពការងារ ការចូលរួមចំណែកជាមួយរាជរដ្ឋាភិបាលកម្ពុជា ក្នុងសកម្មភាពទាក់ទាញវិនិយោគិនឲ្យមកវិនិយោគនៅកម្ពុជាតាមរយៈការរៀបចំឲ្យមានដំណើរទស្សនកិច្ចទៅក្រៅប្រទេស និងការសហការរៀបចំឲ្យមានជាជំនួបពាណិជ្ជកម្មជាមួយគណៈប្រតិភូធុរកិច្ចបរទេស និងការសហការរៀបចំពិព័រណ៍ ក្នុងគោលបំណងបង្កើនទំនាក់ទំនងល្អជាមួយសហគមន៍ធុរកិច្ចអន្តរជាតិ និងជួយផ្សព្វផ្សាយពីវិស័យសកា្តនុពលនៅកម្ពុជា។ ការរកទីផ្សារឱ្យកសិករ ការសម្របសម្រួលដល់ការនាំចេញកសិផលផ្សេងៗរបស់កសិករ ការពង្រីកចំណងមេត្រីភាពរវាងទីក្រុងនិងទីក្រុង ខេត្តនិងខេត្ត ខេត្តនិងប្រទេស ប្រទេសនិងប្រទេសជាដើម។ ការរៀបចំខិតបណ្ណផ្សព្វផ្សាយតាមប្រព័ន្ធអ៊ីនធើរណេត ដូចជា បណ្តាញទំនាក់ទំនងសង្គម (facebook) និងគេហទំព័ររបស់សភាពាណិជ្ជកម្មខេត្ត ដើម្បីផ្សព្វផ្សាយពីសកម្មភាពការងារប្រចាំថ្ងៃ និងសមិទ្ធផលការងារដែលសភា ពាណិជ្ជកម្មសម្រេចបាននាពេលកន្លងមក។ល។
គួររំលឹកផងដែរថា សភាពាណិជ្ជកម្មខេត្តកំពង់ស្ពឺ ចាប់ពីអាណត្តិទី១ មកដល់ពេលនេះ មានសមាជិក សមាជិកាជាង១ពាន់ ដែលដឹកនាំដោយប្រធាន១រូប និងអនុប្រធាន៥រូប ៕
ចែករំលែកព័តមាននេះ