ខេត្តស្វាយរៀង ៖ ឯកឧត្តមតូច ប៉ូលីវ៉ា អភិបាលរងខេត្តស្វាយរៀងដឹកនាំកម្លាំងអាជ្ញាធរក្រុងស្វាយរៀង ចុះធ្វើរដ្ឋបាល និងធ្វើកិច្ចសន្យាបិទអាជីវកម្មជាបណ្តោះអាសន្ន ចំពោះម្ចាស់ហាងដែលមានលក់គ្រឿងស្រវឹង ហាងបៀរហ្គាឌិន និងខាររ៉ាអូខេក្នុងក្រុងស្វាយរៀង…
ខេត្តស្វាយរៀង ៖ ឯកឧត្តមតូច ប៉ូលីវ៉ា អភិបាលរងខេត្តស្វាយរៀងដឹកនាំកម្លាំងអាជ្ញាធរក្រុងស្វាយរៀង ចុះធ្វើរដ្ឋបាល និងធ្វើកិច្ចសន្យាបិទអាជីវកម្មជាបណ្តោះអាសន្ន ចំពោះម្ចាស់ហាងដែលមានលក់គ្រឿងស្រវឹង ហាងបៀរហ្គាឌិន និងខាររ៉ាអូខេក្នុងក្រុងស្វាយរៀង ដែលបើកធ្វើអាជីវកម្ម និងទទួលភ្ញៀវឲ្យចូលផឹកស៊ីធ្វើការអប់រំណែនាំ និងបញ្ឈប់កុំឲ្យមានបើកលក់នូវគ្រឿងស្រវឹងដែលមានការប្រមូលផ្តុំគ្នាបន្តទៀត ។
ស្របពេលដែលខេត្តស្វាយរៀងកំពុងផ្ទុះការឆ្លងរាលជំងឺកូវីដ១៩ នៅក្នុងសហគមន៍ និងសូមស្តាប់តាមការណែនាំរបស់ក្រសួងសុខាភិបាល និងអនុវត្តវិធានការរបស់រាជរដ្ឋាភិបាល «៣ ការពារ ៣ កុំ »។
ករណីចុះបង្ក្រាបនេះ កើតឡើងនៅវេលាម៉ោង៨និង៣០នាទីយប់ថ្ងៃទី០៣ មិថុនា ២០២១ នៅតាមបណ្តោយផ្លូវច្រាំងទន្លេវ៉ៃគោ ស្ថិតនៅភូមិមេភ្លើង សង្កាត់ស្វាយរៀង ក្រុងស្វាយរៀង ។
គួររំលឹកផងដែរថា ខេត្តស្វាយរៀងអ្នកវិជ្ជមានកូវីដ១៩ កើនឡើងដល់៩៣០នាក់ ស្រី៥៤៧នាក់ (ជនជាតិខ្មែរ៨៨៦នាក់ ជនបរទេសចំនួន៤៤នាក់» ករណីជាសះស្បើយ៤៦៣នាក់ ស្រី២២២នាក់ ស្លាប់០៦នាក់ ។
នេះបើតាមរបាយការណ៍របស់លោកវេជ្ជបណ្ឌិត កែរ រដ្ឋា ប្រធានមន្ទីរសុខាភិបាលខេត្តស្វាយរៀង ។
បើតាមមន្ត្រីនគបាលក្រុងស្វាយរៀងបានឲ្យដឹងថា ការចុះបង្ក្រាប នេះធ្វើឡើង នៅវេលាម៉ោង៨ និង៣០នាទីយប់ ថ្ងៃទី៣ ខែមិថុនា ឆ្នាំ២០២១ នៅក្នុងក្រុងស្វាយរៀងដែលដឹកនាំដោយឯកឧត្តមតូច ប៉ូលីវ៉ា អភិបាលរងខេត្ត លោក ណុប ចំរើន អភិបាលក្រុងស្វាយរៀង ចៅសង្កាត់ និងកម្លាំងនរគបាលប៉ុស្តិ៍រដ្ឋាភិបាល និងក្រុងបានចុះធ្វើរដ្ឋបាលផ្អាកបណ្តោះអាសន្ន ហាងផឹកស៊ីចំនួន០៣កន្លែងដែលមានយីហោ «បៀរហ្គាឌិនខ្យល់ទន្លេ» ហាងលក់គ្រឿងក្លែមគ្រប់មុខយីហោ «ណារិនសំណាង »និងហាងលក់គ្រឿងក្លែម យីហោ«សុខា លីសា »ត្រង់ចំណុចបណ្តោយផ្លូវច្រាំងមាត់ទន្លេវ៉ៃគោ ស្ថិតនៅក្នុងភូមិមេភ្លើង សង្កាត់ស្វាយរៀង ក្រុងស្វាយរៀង ខេត្តស្វាយរៀង។
ឯកឧត្តមតូច ប៉ូលីវ៉ា បានណែនាំដល់ម្ចាស់ហាង និងអ្នកបម្រើការងារក្នុងហាងព្រមទាំងភ្ញៀវ ចូលផឹកស៊ី ដើម្បីឲ្យយល់ដឹងពីជំងឺរាកត្បាតនៃមេរោគកូវីដ.១៩ ដ៏កាចសាហាវ និងអនុវត្តវិធានការ ៣ការពារ ៣កុំ ។
បន្ទាប់លោកអភិបាលក្រុងស្វាយរៀងបានឲ្យម្ចាស់ហាងធ្វើកិច្ចសន្យាបិទអាជីវកម្មបណ្តោះអាសន្នរង់ចាំអាជ្ញាធរអនុញ្ញាតពីក្រសួងទេសចរណ៍ជាថ្មីហើយទើបបន្តបើកលក់បាន ប៉ុន្តែអាចលក់បាន បាយ ម្ហូប ស៊ុប វិចខ្ចប់ ប៉ុណ្ណោះ ៕
ចែករំលែកព័តមាននេះ