ខេត្តស្វាយរៀង៖ លោក តូច ប៉ូលីវ៉ា អភិបាលរងខេត្តស្វាយរៀង កាលពីរសៀលថ្ងៃទី២៩ ខែឧសភា ឆ្នាំ២០២១នេះ បានធ្វើការអំពាវនាវដល់ប្អូនៗ ក្មួយៗ កម្មករ កម្មការិនីរោងចក្រ គួរតែធ្វើចត្តាឡីស័ក នៅក្នុងរោងចក្រ គួរកុំទៅចម្លងរោគដល់ប្តីប្រពន្ធកូនឪពុកម្ដាយបងប្អូនរបស់ខ្លួនទេ។
លោកបានបន្តទៀតថា ប្រសិនបើធ្វើចត្តាឡីស័ក នៅក្នុងរោងចក្រ វាពិបាកតែម្នាក់ឯង ប៉ុន្តែបើសិនជាទៅផ្ទះ នឹងអាចចម្លងរោគដល់ច្រើនគ្នា និងអាចមន្ត្រីជំនាញយកទៅធ្វើចត្តាឡីស័កអ្នកពាក់ព័ន្ធ ជាច្រើននាក់ទៀត។
លោកអភិបាលរងខេត្ត បានបន្តថា ការចុះពិនិត្យការងារយកសំណាកនាពេលនេះ គឺជាលើកទី៣ ហើយដល់កម្មករ កម្មការនីរោងចក្រយូលី១ ក្នុងតំបន់សេដ្ឋកិច្ចពិសេស សានតុង ក្រុងបាវិត។
លោក បានឲ្យក្រុមអ្នកសារព័ត៌មានដឹងទៀតថា ចាប់តាំងពីថ្ងៃទី២១ ដល់ថ្ងៃទី២៩ ខែឧសភា ឆ្នាំ២០២១ ក្រុមការងារយកសំណាកបានយកសំណាកកម្មករ កម្មការិនី ចំនួន ២.៥១១នាក់ និងបានរកឃើញករណីវិជ្ជមានចំនួន ៣៤៨នាក់។ រោងចក្រចំនួន ០៧ នៅក្នុងតំបន់សេដ្ឋកិច្ចពិសេស សានតុង ដែលបានយកសំណាក មានរោងចក្រ យូលី១ រោងចក្រ ប្យ៊ូលធីហ្វូលវីនដូ និងរោងចក្រ អូខ្លូត តំបន់សេដ្ឋកិច្ចពិសេស មេនហាតធេន មានរោងចក្រ សាន់ ហ្វេង រោងចក្រ ម៉ូរ៉ូហ្វូជី និងរោងចក្រ យូធីឡាយ ហើយនិងតំបន់សេដ្ឋកិច្ចពិសេស តាយសេង មានរោងចក្រ អេអិនជេ។
ចំពោះប្រភពចម្លងមានការពិបាកសន្និដ្ឋាន ដោយសារករណីខ្លះ ប្តីប្រពន្ធធ្វើការរោងចក្រផ្សេងគ្នា បើមានវិជ្ជមាន និងចម្លងគ្នា ហើយចម្លងទៅរោងចក្រផ្សេងទៀត ប៉ុន្តែមានរោងចក្រខ្លះ ថៅកែរោងចក្រអនុវត្តតាម SOP ត្រឹមត្រូវ ឃើញថា ពុំមានការចម្លងទេ។ ចំពោះប្អូនៗ ក្មួយៗ កម្មករ កម្មការិនីមួយចំនួន ដែលស្នើសុំធ្វើចត្តាឡីស័ក នៅក្នុងរោងចក្រ ដោយសារពួកគាត់យល់ដឹង ពុំចង់ចម្លងរោគដល់ក្រុមគ្រួសាររបស់ពួកគាត់ ហើយពួកគាត់ បានបញ្ជាក់ថា នៅក្នុងរោងចក្រ ត្រូវបានថៅកែរោងចក្រ គិតគូរតាំងពីការហូបចុក និងកន្លែងស្នាក់នៅ និងមិនមានការកាត់ប្រាក់ខែទៀតផង។
លោកអភិបាលរងខេត្ត បាននាំមកនូវការផ្តាំផ្ញើពីសំណាក់លោកជំទាវកិត្តិសង្កហបណ្ឌិត ម៉ែន សំអន តំណាងរាស្ត្រមណ្ឌលស្វាយរៀង និងជាប្រធានក្រុមការងារថ្នាក់ជាតិ ចុះជួយខេត្តស្វាយរៀង និងឯកឧត្ដម ម៉ែន វិបុល អភិបាលខេត្ត និងជាប្រធានគណៈកម្មការប្រយុទ្ធប្រឆាំងនឹងជំងឺកូវីដ-១៩ ខេត្ត សូមកម្មករ កម្មការិនី រោងចក្រ គោរពឱ្យបាននូវវិធានការចត្តាឡីស័ក ដែលក្រសួងសុខាភិបាលដាក់ចេញ ជាពិសេសវិធានការ ៣កុំ ៣ការពារ របស់សម្តេចតេជោ ហ៊ុន សែន។
លោកជំទាវកិត្តិសង្កហបណ្ឌិត ម៉ែន សំអន និងឯកឧត្ដម ម៉ែន វិបុល អភិបាលខេត្ត សូមប្រសិទ្ធពរជ័យ ដល់ក្មួយៗ កម្មករ កម្មការិនី មានសុខភាពល្អ ជៀសឆ្ងាយពីជំងឺកូវីដ-១៩ ដ៏កាចសាហាវនេះ។ ក្រុមការងារ បានយកបាយកញ្ចប់ មកហូបអាហារ ចែកជូនកម្មករកម្មការិនីផងដែរ៕ វ៉ាន់ ប៊ុនធឿន
ចែករំលែកព័តមាននេះ