បន្ទាយមានជ័យ៖ ផ្លូវបេតុង ១ខ្សែ នៅចំណុចព្រំប្រទល់សង្កាត់ប៉ោយប៉ែត និងសង្កាត់ផ្សារកណ្តាល ឬហៅ ផ្លូវស្តង់តាងួន (ផ្លូវខាងលិចភូមិប្រជាធម្មលិច) សាងសង់ មិនទាន់បាន…
បន្ទាយមានជ័យ៖ ផ្លូវបេតុង ១ខ្សែ នៅចំណុចព្រំប្រទល់សង្កាត់ប៉ោយប៉ែត និងសង្កាត់ផ្សារកណ្តាល ឬហៅ ផ្លូវស្តង់តាងួន (ផ្លូវខាងលិចភូមិប្រជាធម្មលិច) សាងសង់ មិនទាន់បាន ១ឆ្នាំផង ពេលនេះ ខូច និងកំពុងជួសជុលថ្មី ១០កន្លែង។ អ្នកស្រុក ដាក់ការសង្ស័យថា អាចមកពីការស្ថាបនា គ្មានគុណភាព។
តាំងពីកាចាប់ផ្តើមសាងសង់ផ្លូវមួយខ្សែនេះ មិនថា អ្នកដំណើរឆ្លងកាត់ ឬអ្នកស្រុកនោះទេ គឺបានឃើញកន្លែងខ្លះ មានបាចខ្សាច់ពីលើ។ ឯកន្លែងខ្លះ មានស្រោចកៅស៊ូ និងកន្លែងខ្លះ បែរជាសាងសង់បេតុងបន្ថែម ពីលើផ្លូវចាស់។
អ្វីដែលគេឃើញនៅចំណុចជួសជុលនេះ គឺនៅពេលយប់ មិនស្លាកសញ្ញាចរាចរណ៍ឡើយ។ អ្នកបើកបរយានយន្តខ្លះ ប៊ិះជួបគ្រោះថ្នាក់ ដោយបើកធ្លាក់ជង្ហុក នៅចំណុចជួសជុល ព្រោះតែគ្មានសញ្ញាចរាចរណ៍ ឲ្យដឹងជាមុន។ ដោយឡែក នៅកន្លែងខ្លះ គេដាក់មែកឈើ ជាសញ្ញាខ្លះ ដែលអាចឲ្យអ្នកដំណើរដឹង និងប្រុងប្រយ័ត្នបាន។
ឆ្លើយតបនឹងបញ្ហាផ្លូវធ្វើឆាប់ខូចនេះ ត្រូវបានលោក ផាន់ណា ដែលជាមេការជួសជុលផ្លូវ ១ខ្សែខាងលើ និយាយយ៉ាងខ្លីថា មកពីអំឡុងពេលជួសជុលថ្មីៗ សំណង់មិនទាន់ស្ងួតល្អ បែរជាក្រុមឡានធំ បើកបរបំពានបារ៉ាស់ឆ្លងកាត់ ទើបផ្លូវទៅជាខូចបែបនេះ ហើយថា បើចង់ច្បាស់ទៅសួរពួកជាង កំពុងជួសជុលទៅ ខណៈក្រុមជាង កំពុងជួសជុល បានបដិសេធ មិនហ៊ាននិយាយអ្វីទាំងអស់ ជាមួយអ្នកកាសែត។
បើតាមអាជ្ញាធរកន្លងមក លើកឡើងថា ផ្លូវ ១ខ្សែនេះ ជាគម្រងអភិវឌ្ឍន៍របស់រាជរដ្ឋាភិបាល និងជាថវិកាអភិវឌ្ឍន៍ឃុំសង្កាត់របស់សង្កាត់ទាំង២ សង្កាត់ផ្សារកណ្តាល និងសង្កាត់ប៉ោយប៉ែត។ ផ្លូវនេះ មានប្រវែង ១០០០ម៉ែត្រ ធ្វើពីបេតុង ទទឹង ៨ម៉ែត្រ កម្រាស់ ១តឹកកន្លះ មានគ្រោងឆ្អឹងដែក និងចំណាយទឹកប្រាក់សរុប ៨០០លានរៀល៕ មុត សារុន
ចែករំលែកព័តមាននេះ