រាជធានីភ្នំពេញ ៖ មជ្ឈមណ្ឌលសហប្រតិបត្តិការកម្ពុជា-ជប៉ុន, សាកលវិទ្យាល័យបញ្ញាសាស្ត្រ និង វិទ្យាស្ថាន ដើម្បីសិក្សាភាពជោគជ័យបានអញ្ជើញលោកព្រីម រ៉ាវ៉ាត់ (Prem Rawat) អគ្គរាជទូតតំណាងសន្តិភាពពិភពលោក ចូលរួមធ្វើជាវាគ្មិននៅក្នុងវេទិកាសាធារណៈស្តីពីការអប់រំផ្លូវចិត្ត «Educating the Heart» នៅមជ្ឈមណ្ឌលសហប្រតិបត្តិការកម្ពុជា-ជប៉ុន កាលពីរសៀលថ្ងៃច័ន្ទ ទី២៦ តុលា ២០១៥ ។
លោកឃីម សុខហេង នាយកវិទ្យាស្ថាន ដើម្បីសិក្សាភាពជោគជ័យបានមានប្រសាសន៍ថា គោលបំណងដែលអញ្ជើញលោកព្រីម រ៉ាវ៉ាត់ មកកម្ពុជា នាពេលនេះ ដោយសារតែយើងមើលឃើញថា អ្វីដែលជាសាររបស់គាត់ វាជាតម្រូវការរបស់មនុស្សចង់ស្តាប់នៅក្នុងប្រទេសកម្ពុជាយើង ព្រោះថា មនុស្សម្នាក់ៗចង់បានសន្តិភាពក្នុងចិត្ត តែពេលខ្លះមិនដឹងធ្វើដោយរបៀបណានោះទេ ។
លោកព្រីម រ៉ាវ៉ាត់ ដែលមានសម្បុរសណ្តែកបាយ វ័យ៥៧ឆ្នាំ មានសញ្ជាតិឥណ្ឌា និងអាមេរិក បានចាប់ផ្តើមនិយាយលើវេទិកាសាធារណៈតាំងពីលោកអាយុបាន៤ឆ្នាំមកម្ល៉េះ និងបានទទួលលិខិតអញ្ជើញរាប់ពាន់ពីបណ្តាប្រទេស និងស្ថាប័នជាច្រើននៅលើពិភពលោក ដែលអញ្ជើញលោកទៅនិយាយ និងចែករំលែកបទពិសោធន៍ស្តីពីសន្តិភាព ។ ជាក់ស្តែងលោកធ្លាប់បានអញ្ជើញចូលរួមនិយាយនៅក្នុង សភានៃសហគមន៍អឺរ៉ុប អង្គការសហប្រជាជាតិ សភានៃចក្រភពអង់គ្លេស ព្រឹទ្ធសភានៃអ៊ីតាលី អូស្ត្រាលី អាសង់ទីន និងណូវេសេឡង់ជាដើម ។
លោកព្រីម រ៉ាវ៉ាត់ ធ្លាប់បានលើកឡើងក្នុងសភាចក្រភពអង់គ្លេសដឹកនាំដោយអតីតមេធាវីប្រចាំចក្រភពអង់គ្លេស គឺលោក Baroness Scotland ថា សន្តិភាព គឺជាជោគជ័យដ៏អស្ចារ្យបំផុត សម្រាប់គោលគំនិតមនុស្សធម៌។ ដោយឡែកនៅក្នុងឆ្នាំ២០១៤ នេះផងដែរ។ លោកព្រីមបានចែករំលែកសារសន្តិភាពទៅកាន់មនុស្សជាងមួយលាននាក់ ក្នុងចំណោមវេទិការសាធារណៈទាំង៤៥ ដែលលោកបានបង្កើតនៅជុំវិញពិភពលោក ។
គួរបញ្ជាក់ថា លោកព្រីម រ៉ាវ៉ាត់ បានមកបំពេញទស្សនកិច្ចនៅកម្ពុជារយៈពេល២ថ្ងៃ គឺថ្ងៃទី២៦ និង២៧ តុលា ដែលនៅថ្ងៃទី១ លោកចូលរួមធ្វើជាវាគ្មិននៅក្នុងវេទិកាសាធារណៈស្តីពីការអប់រំផ្លូវចិត្ត «Educating the Heart» នៅមជ្ឈមណ្ឌលសហប្រតិបត្តិការកម្ពុជា-ជប៉ុន និងថ្ងៃទី២ លោកចូលរួមជាមួយក្មេងកំព្រានៅអង្គការស៊ីឌីអាយ ៕
ចែករំលែកព័តមាននេះ