រាជធានីភ្នំពេញ ៖ ក្រុមហ៊ុន អ អិម អេ (ខេមបូឌា ) ដែលជាក្រុមហ៊ុននាំចូល និងចែកចាយផ្ដាច់មុខរថយន្ត Jaguar Land Rover បានប្រកាសនាំចូល និងចែកចាយរថយន្តស៊េរីថ្មីមួយប្រភេទទៀត របស់ Jaguar នោះគឺ Jaguar XE នៅក្នុងទីផ្សារប្រទេសកម្ពុជា ។ កាលពីល្ងាចថ្ងៃទី២២ តុលា ២០១៥ ពិធីប្រកាសរថយន្តស៊េរីថ្មីនេះ បានធ្វើឡើងនៅអគារតាំងបង្ហាញរថយន្ត Jaguar និង Land Rover តាមបណ្ដោយផ្លូវសហព័ន្ធរុស្ស៊ី សង្កាត់ទឹកថ្លា ខណ្ឌសែនសុខ ដោយមានវត្តមានភ្ញៀវកិត្តិយសជាច្រើនចូលរួម ។
លោក Paul Varley អ្នកគ្រប់គ្រងទូទៅរថយន្ត Jaguar & Land Rover បានមានប្រសាសន៍ថា Jaguar XE ត្រូវបានផលិតឡើងដើម្បីបំពេញតម្រូវការអ្នកប្រើប្រាស់ ក្នុងការធ្វើដំណើរដែលប្រកបដោយផាសុកភាព និងសុវត្ថិភាពខ្ពស់ និងជួយសន្សំសំចៃប្រេងដែលធ្វើឱ្យអ្នកប្រើប្រាស់កាន់តែរីករាយក្នុងការបើកបររថយន្តដ៏ប្រណីតនេះ ។ រថយន្តនេះ បានផលិតឡើងដោយគំនិតច្នៃប្រឌិតថ្មី តាមបែបរថយន្តស្ព័រ តួខ្លួនរឹងមាំ ហើយស្រាលស្រឡូន ដែលអាចធ្វើដំណើរបានយ៉ាងរហ័ស និងមានសុវត្ថិភាពខ្ពស់ រួមជាមួយភាពប្រណីតនៃផ្នែកខាងក្នុងរថយន្តដែលពោរពេញទៅដោយផាសុកភាព ។
លោកបន្តថា Jaguar បាននិងកំពុងផលិតសំណុំបច្ចេកវិទ្យាដែលធ្វើឱ្យការបើកបរមានសុវត្ថិភាពកាន់តែខ្ពស់ ហើយធ្វើឱ្យអ្នកបើកបរ និងរួមដំណើរមានអារម្មណ៍ធូរស្រាល និងកាន់តែរីករាយខ្លាំងឡើង ។ ប្រព័ន្ធបន្ថយល្បឿនដែលអាចប្រឈមនឹងហានិភ័យត្រូវបានពង្រឹងទៅជាប្រព័ន្ធហ្វ្រាំងដែលឆ្លាតវៃ ពោរពេញដោយសុវត្ថិភាព ហើយរួមទាំងការបំពាក់ប្រព័ន្ធកាមេរ៉ា សងខាងដែលអាចមើលដឹងពីស្ថានភាពផ្លូវជាមុនបានផងដែរ ។
លោកងន សាំង អគ្គនាយកក្រុមហ៊ុន អ អិម អេ (ខេមបូឌា ) បានប្រសាសន៍ដែរថា រថយន្ត Jaguar បានក្លាយជាយានជំនិះជាផ្លូវការ និងជាប្រចាំរបស់នាយករដ្ឋមន្ត្រីនៃប្រទេសអង់គ្លេស ក្នុងរយៈពេលប៉ុន្មានឆ្នាំចុងក្រោយនេះ ។ រថយន្ត Jaguar ក៏ទទួលបានព្រះរាជដីទទួលស្គាល់ពីសំណាក់ព្រះមហាក្សត្រនៃប្រទេសអង់គ្លេស ដោយបានជាវយកទៅធ្វើជាព្រះទីនាំង គឺព្រះមហាក្សត្រី Elizabeth II និងព្រះមហាក្សត្រ Charles ផងដែរ ។ ទាំងនេះ បានបង្ហាញឱ្យឃើញច្បាស់ពីគុណតម្លៃរបស់រថយន្ត Jaguar ហើយយើងក៏មានមោទនភាពផងដែរ ដែលយើងអាចប្រើប្រាស់រថយន្តដូចគ្នា ដែលនាយករដ្ឋមន្ត្រីនៃអង់គ្លេសប្រើប្រាស់ ។
គួរបញ្ជាក់ថា រថយន្ត Jaguar ដែលនាំចូលមកកម្ពុជា ត្រូវបានផលិតឡើងយ៉ាងពិសេសសម្រាប់ប្រទេសកម្ពុជា ដូចជា ប្រព័ន្ធប្រេងត្រូវបានផលិតឡើងតម្រូវតាមគុណភាពប្រេងនៅប្រទេសកម្ពុជា ប្រព័ន្ធម៉ាស៊ីនត្រជាក់ ត្រូវផលិតឡើងសមស្របទៅនឹងបរិយាកាស និងប្រព័ន្ធគ្រឿងក្រោមរថយន្តផលិតផលឡើងទៅតាមស្ថានភាពផ្លូវនៅប្រទេសកម្ពុជា ។ ក្នុងឱកាសសម្ពោធដាក់លករថយន្តប្រណីត Jaguar XE នាពេលនេះ ក្រុមហ៊ុន អ អិម អេ (ខេមបូឌា ) នឹងផ្ដល់សេវាត្រួតពិនិត្យរថយន្ត Jaguar Land Rover គ្រប់ស៊េរីទាំងអស់ដោយឥតគិតថ្លៃ ហើយអតិថិជនដែលជាវរថយន្តពីក្រុមហ៊ុនផ្ទាល់ នឹងទទួលបានការធានា៣ឆ្នាំ ឬ១០ម៉ឺនគីឡូម៉ែត្រ ៕
ចែករំលែកព័តមាននេះ