រាជធានីភ្នំពេញ៖ការនាំចេញមុខទំនិញពីកម្ពុជាទៅបណ្តាទីផ្សារគោលដៅសំខាន់ៗនៅត្រីមាសទី១ឆ្នាំ២០២១នេះ មានទំហំទឹកប្រាក់ជាង៣.៨០៥លានដុល្លារអាមេរិកក្នុងនោះកម្ពុជានាំចេញទៅទីផ្សារអាមេរិកឈានមុខគេដែលមានទឹកប្រាក់ជាង១.៤៩៦លានដុល្លារអាមេរិក។
យោងតាមរបាយការណ៍របស់អគ្គនាយកដ្ឋានគយនិងរដ្ឋាករបង្ហាញថាការនាំចេញទំនិញពីកម្ពុជាទៅទីផ្សាសំខាន់ៗក្នុងត្រីមាសទី១ដើមឆ្នាំ២០២១នេះមាន ប្រទេសអាស៊ានមានជាង២៩៧លានដុល្លារអាមេរិក, សហភាពអឺរ៉ុប មានជាង៧១៩លានដុល្លារអាមេរិក, សហរដ្ឋអាមេរិកមានជាង១.៤៩៦លានដុល្លារអាមេរិក, ចិនមានជាង៣៣៣លានដុល្លារអាមេរិក,ជប៉ុន២៩៥លានដុល្លារអាមេរិ,អង់គ្លេសមានជាង១៦៤លានដុល្លារអាមេរិកនិងប្រទេសផ្សេងទៀតមានទឹកប្រាក់ជាង៤៩៨លានដុល្លារអាមេរិក ។
ពាក់ព័ន្ធនិងការនាំចេញពីកម្ពុជាទៅសហរដ្ឋអាមេរិកមានការកើនឡើងជាលំបាប់ឬនាំមុខគេនៅមួយរយៈចុងក្រោយនេះបើតាម ឯកឧត្តម ស៊ាង ថៃ រដ្ឋលេខាធិការនិងជាអ្នកនាំពាក្យនៃក្រសួងពាណិជ្ជកម្ម មានប្រសាសន៍ឱ្យដឹងនៅថ្ងៃទី១០ឧសភានេះថា ការនាំចេញរបស់កម្ពុជាទៅកាន់សហរដ្ឋអាមេរិក នៅតែមានកំណើន ដោយសារមូលហេតុមួយចំនួន ដូចជា៖
១)- ក្រសួង-ស្ថាប័នពាក់ព័ន្ធរបស់រាជរដ្ឋាភិបាលកម្ពុជា បានខិតខំបន្តអនុវត្ត និងពង្រីកកិច្ចសហប្រតិបត្តិការទ្វេភាគី។ ២)- កន្លងទៅ ឯកឧត្ដម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បាន អំពាវនាវឱ្យក្រុមហ៊ុនបញ្ជាទិញ សូមកុំលប់ការបញ្ជាទិញ និងសូមបន្ត ការបញ្ជាទិញទំនិញពីកម្ពុជា។៣)- មានការជឿទុកចិត្តពីអ្នកបញ្ជាទិញ ព្រោះកម្ពុជាបានបង្ហាញថា កម្ពុជាអាចផ្គត់ផ្គង់ទំនិញបានទាន់ពេល និងគ្រប់ចំនួនតាមការបញ្ជាទិញ។៤)-ទំនិញមួយចំនួនជាមុខទំនិញដែលមានតម្រូវការថ្មីនៅសហរដ្ឋអាមេរិក។
ឯកឧត្តម ស៊ាង ថៃ មានប្រសាសន៍ថា«មុខទំនិញនាំចេញសំខាន់ៗ ដែលមានកំណើនមធ្យមតែមានទំហំទឹកប្រាក់ធំ មានដូចជា សម្លៀកបំពាក់ ស្បែកជើង សំភារៈធ្វើដំណើរ កាបូបគ្រប់ប្រភេទ។ល។ ប៉ុន្តែក្នុងនោះ មានទំនិញខ្លះមានមានទំហំទឹកប្រាក់មិនសូវធំ តែមានការកើនឡើងខ្ពស់ ដូចជា ទោចក្រយាន សង្ហារឹម អំពូល ខ្សែចម្លងអគ្គិសនី ក្ដារកុងប្ល៉ាកេ ជាដើម»៕
ចែករំលែកព័តមាននេះ